އެސްއެމްއީ ހަބުގެ ދެވަނަ ފަންގިފިލާ ވިޔަފާރިތަކަށް ހުޅުވާލައި އެތަން ބަލާލަން ބޭނުންވާ ފަރާތްތަކަށް ފުރުޞަތު ހުޅުވާލައިފިއެވެ.
ބިޒްނަސް ސެންޓަރ ކޯޕަރޭޝަން (ބީސީސީ)ން ވިދާޅުވީ ކިއޮސްކަށް އެދި ހުށަހަޅަން ބޭނުންވާ ފަރާތްތަކަށް އެތަން ބަލާލުމުގެ ފުރުޞަތު މިއަދުން ފެށިގެން ބުރާސްފަތި ދުވަހާއި ހަމައަށް ކޮންމެ ދުވަހަކު މެންދުރު 13:00 އިން ފެށިގެން 17:00އަށް ހުޅުވާލާފައިވާކަމަށެވެ. އެސްއެމްއީ ހަބުގެ ދެވަނަ ފަންގިފިލާގެ ކިއޮސްކުތަކަށް އެދި ފޯމް ހުށަހެޅުމުގެ ފުރުޞަތު 22 މެއި 2023 ވާ ހޯމަދުވަހާއި ހަމައަށް ބީސީސީން ވަނީ ހުޅުވާލާފައެވެ.
އެސްއެމްއީ ހަބުގެ ދެވަނަ ފަންގިފިލާގައި ޖުމްލަ 10 ކިއޮސްކު ހުންނައިރު މީގެ ތެރެއިން 3 ކިއޮސްކެއް އަންނައުނު ވިއްކާ ފަރާތްތަކަށް ޚާއްޞަކޮށްފައިވާއިރު، ބާކީ 7 ކިއޮސްކު ޚާއްޞަކޮށްފައިވަނީ އަރޓް އެންޑް ކްރާފްޓް، އެސެސަރީޒް އަދި ރީތިވުމަށް ބޭނުންކުރާ ސާމާނު ވިއްކުމަށެވެ. މި ކިއޮސްކުތަކުގައި ވިއްކޭނީ ހަމައެކަނި ދިވެހި އަމިއްލަ އުފެއްދުންތައް ކަމަށް ބީސީސީން ވިދާޅުވެއެވެ. ދިވެހި އުފެއްދުމެއްގެ ގޮތުގައި ބެލުމަށް ހަމަޖެހިފައިވަނީ އެ އުފައްދާ ބާވަތެއްގެ 30 އިންސައްތައަކީ ސީދާ ރާއްޖޭގައި ކުރެވޭ މަސައްކަތްތަކަކަށް ވާނަމަ އެކަނި ކަމަށް ވެސް ބީސީސީން ވިދާޅުވެއެވެ.
އެސްއެމްއީ ހަބުގެ ދެވަނަ ފަންގިފިލާއިން ދޫކުރާ ކިއޮސްކް ކުއްޔަށް ހިފުމަށް އެދޭ ފަރާތްތަކުގެ ޝަރުތުތައް :
- ދިވެހި ރައްޔިތެއްކަމުގައިވުން
- 18 އަހަރު ފުރިފައިވުން
- ދިވެހިރާއްޖޭގެ ކުދި އަދި މެދުފަންތީގެ ވިޔަފާރިތަކާބެހޭ ޤާނޫނުގައި ބަޔާންކޮށްފައިވާ ވިޔަފާރިތަކުގެ ގިންތިކުރާ މިންގަނޑުތަކުގެ ތެރޭގައި ހިމެނޭ އެންމެ ކުދި ނުވަތަ ކުދި ގިންތީގެ ވިޔަފާރިއަކަށްވުން
- އެސްއެމްއީ ހަބްގެ ފުރަތަމަ ފަންގިފިލާއިން ކިއޮސްކެއް ހިންގަމުންދާ ފަރާތެއްކަމުގައި ނުވުން
އެސްއެމްއީ ހަބުގެ ދެވަނަ ފަންގިފިލާ ހުޅުވާއިރު އެތަނުގައި މިނީ ސިނަމާއަކާއި، ސެލޫނާއި، ކުރެހުންތެރިންނަށް ޚާއްޞަ އާރޓް ގެލަރީއެއްގެ އިތުރުން ގޭމިން އޭރިއާއަކާއި އަދި ސްޓެމް އެޑިއުކޭޝަނަށް ޚާއްސަ ސަރަހައްދެއް ހުންނާނެކަމަށް ބީސީސީން ވިދާޅުވިއެވެ.
އެންމެ ކުދި، ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް ކުރަމުންދާ މަސައްކަތުގެ ދަށުން ބީ.ސީ.ސީއިން "އެސްއެމްއީ ހަބް" ހުޅުވާފައިވަނީ 15 ޑިސެމްބަރ 2022ގައެވެ. އެސްއެމްއީ ހަބު ހުންނަނީ ޗާނދަނީ މަގު އެލައިޑް ބިލްޑިންގގައެވެ.
ކޮމެންޓު ފޮނުވާ