7 އަތޮޅެއްގެ 7 ރަށެއްގައި ކުވައިތު ފަންޑުގެ އެހީގައި އެޅުމަށް މި ސަރުކާރުން ނިންމާފައިވާ 7 ހޮސްޕިޓަލްގެ ބިޑިން މަރުޙަލާ ނިމި، މަސައްކަތްކުރާނެ ބަޔަކު ހޮވާ، ކޮންޓްރެކްޓަރުންނާއި މިއަދު މަސައްކަތް ހަވާލު ކޮށްފިއެވެ.
މިގޮތުން 7 ހޮސްޕިޓަލް އެޅުމުގެ މަސައްކަތް ހަވާލުކުރުމުގެ އެއްބަސްވުންތަކުގައި ސޮއި ކޮށްފައިވަނީ މިއަދު ހެލްތު މިނިސްޓްރީގައި ބޭއްވުނު ރަސްމިއްޔާތެއްގައެވެ.
ސަރުކާރުން 7 ހޮސްޕިޓަލް ތަރައްގީ ކުރުމަށް ހަމަޖައްސާފައިވާ ރަށްތަކަކީ، ހދ. ހަނިމާދޫ، ށ. މިލަންދޫ، ނ. ވެލިދޫ، ކ. ތުލުސްދޫ، އދ. މާމިގިލި، ވ. ފެލިދޫ އަދި ތ.ވިލުފުށީގައެވެ. މިއިން ކޮންމެ ހޮސްޕިޓަލެއްގައި 30 އެނދާއެކު އިތުރު ޚިދުމަތްތައް ލިބެން ހުންނާނެކަމަށް ސަރުކާރުން ހާމަކޮށްފައި ވެއެވެ.
މިއަދު ހަވާލުކުރި 7 ހޮސްޕިޓަލްގެ ތެރެއިން ހދ. ހަނިމާދ،ޫ އދ. މާމިގިލ،ީ ވ. ފެލިދޫ އަދި ތ. ވިލުފުށީގެ ހޮސްޕިޓަލްތައް ހަވާލުކުރީ ޑްޕްލެކްސް ޕްރައިވެޓްއާ އެވެ. އަދި ށ. މިލަންދ،ޫ ނ. ވެލި ދޫ އަދި ކ. ތުލުސްދޫގެ ހޮސްޕިޓަލްތައް ހަވާލުކުރީ އާނަންޑް ބިލްޑްޓެކް ޕްރައިވެޓް ލިމިޓެޑާއެވެ.
ހެލްތު މިނިސްޓްރީން ބުނެފައިވަނީ މި ހޮސްޕިޓަލްތައް އިމާރާތް ކުރަނީ ފްލޫ ކްލިނިކާއި، އައިސޮލޭޝަން ފެސިލިޓީ ހިމެނޭގޮތަށް ކަމަށެވެ. އޭގެ ބޭނުމަކީ ކޯވިޑް ރޯގާއެއްފަދަ ބައްޔެއް ފެތުރޭ ހާލަތުގައިވެސް ހޮސްޕިޓަލްތަކުގެ އޮޕަރޭޝަންތައް ނުހުއްޓި ކުރިޔަށް ދިއުންކަމުގައިވެސް ހެލްތު މިނިސްޓްރީން ބުނެފައި ވެއެވެ.
އޭގެ އިތުރުން މި ހޮސްޕިޓަލްތަކުގެ ހުރިހާ އެދަކަށްވެސް ޕައިޕްޑް އޮކްސިޖަނ،ް މެޑިކަލް އެއަރ އަދި ސަކްޝަން އަޅާ، ހޮސްޕިޓަލްތަކުގައި އޮކްސިޖަން ޕްލާންޓުތައްވެސް ބެހެއްޓުމަށް ވަނީ ހަމަޖެހިފައެވެ. މި އޮކްސިޖަން ޕްލާންޓްތަކުން ކައިރި ރަށްރަށް އޮކްސިޖަން ސަޕްލައި ކުރެވިގެން ދާނެއެވެ.
އޭގެ އިތުރުން މި ހޮސްޕިޓަލްތަކުގައި ކަރަންޓަށް ކުރާ ހޭދަ ކުޑަކުރުމަށްޓަކާ 150 ކިލޯ ވޯޓުގެ ސޯލަރ ޕީވީ ސިސްޓަމް ހަރުކުރުމަށްވެސް ވަނީ ހަމަޖެހިފައެވެ.
މިއީ ޖުމްލަ 686.1 މިލިއަން ރުފިޔާއަށް 540 ދުވަހުގެ ތެރޭގައި ނިންމުމަށް ހަވާލު ކޮށްފައިވާ މަޝްރޫޢު ތަކެކެވެ.
