ޗާގޮސްގެ މައްސަލާގައި ރައްޔިތުންގެ މަޖިލީހަށް ވައްދަމުންދާ ނޯކޮންފިޑެންސް މޯޝަންތަކުގައި އެމްޑީޕީގެ ނަޝީދު ފެކްޝަނަށް ނިސްބަތްވާ ހުރިހާ މެމްބަރުން ސޮއި ކޮށްފައި ނުވާކަމަށް "ޚަބަރު އޮންލައިން"އަށް މައުލޫމާތު ލިބިއްޖެއެވެ.
މިގޮތުން މިހާރު ރައްޔިތުންގެ މަޖިލީހަށް ވައްދާފައިވާ، ބަންޑާރަ ނައިބު އިބުރާހިމް ރިއްފަތުގެ ނޯކޮންފިޑެންސް މޯޝަންގައިވެސް ނަޝީދު ފެކްޝަނަށް ނިސްބަތްވާ ހުރިހާ މެމްބަރުން ސޮއިކޮށްފައި ނުވާއިރު، މިއަދު ރައްޔިތުންގެ މަޖިލިހަށް ވެއްދި ފޮރިން މިނިސްޓަރ ޝާހިދުގެ ނޯކޮންފިޑެންސް މޯޝަންގައިވެސް ނަޝީދު ފެކްޝަނަށް ތާއީދުކޮށްގެން ތިބި އެމްޑީޕީގެ ގިނަ މެމްބަރުން ސޮއިކޮށްފައި ނުވާކަމަށް، މައުލޫމާތު އެނގިހުރި ފަރާތަކުން "ޚަބަރު އޮންލައިން" އަށް މައުލޫމާތު ދީފައި ވެއެވެ.
މައުލޫމާތު ލިބިފައިވާ ގޮތުގައި ފޮރިން މިނިސްޓަރ ޝާހިދުގެ ނޯ ކޮންފިޑެންސް މޯޝަން މިއަދު މަޖިލިހަށް ވެއްދުމަށްފަހު ވަނީ އަބުރާ ގެންގޮސްފައެވެ. އެހެންނަމަވެސް މިމައްސަލަ އަބުރާ ގެންދިޔަ ސަބަބުން އަދި ސާފުވާގޮތް ވަނީ ނުވެފައެވެ.
ޗާގޮސްގެ މައްސަލާގައި ސަރުކާރަށް ފާޑު ކިޔަމުންދާ ސިޔާސީ ޕާޓީތަކާއި އަދި ސިޔާސީ ފަރާތްތައް އެކުވެގެން އުފައްދާފައިވާ "ކަނޑު ވިއްކުމާއި ދެކޮޅު" ކޯލިޝަންއިން ރޭ ބޭއްވި ނޫންވެރިންގެ ބައްދަލުވުމުގައި އެ ކޯލިޝަންއިން ބުނެފައިވަނީ ފޮރިން މިނިސްޓަރ ޝާހިދުގެ ނޯކޮންފިޑެންސް މޯޝަން މިއަދު މަޖިލިހަށް ވައްދާނެ ކަމުގައެވެ.
އަދި އެކޯލިޝަން ރޭ އިއުލާން ކޮށްފައިވާ ގޮތުގައި، އަންނަ ޖޫންމަހުގެ 2 ވަނަ ދުވަހުވަނީ ކަނޑު ވިއްކުމާއި ދެކޮޅަށް، "މަސް ބާނަބާނާ ތިއްބާ އެ ވިއްކާލީ ކަނޑު" މި ނަމުގައި ބޮޑު ޖަލްސާއެއް ބޭއްވުމަށް ވަނީ ހަމަޖެހިފައެވެ. އަދި އެ ކޯލިޝަނުން ދަނީ ރާއްޖޭގެ ކަނޑު އަބުރާ ހޯދުމަށް ގޮވާލާ، ރައީސް ސާލިހަށް ހުށެހެޅުމަށް ޕެޓިޝަނެއްގައި ސޮއިކުރަންވެސް ފަށާފައެވެ.
