ލޯކަލް ގަވަމެންޓް އޮތޯރިޓީ (އެލްޖީއޭ)ގެ ސީއީއޯގެ މަގާމުން އަފްޝަން ލަތީފު އިސްތިއުފާ ދެއްވަން ނިންމަވައިފިއެވެ.
އަފްޝަން ބައެއް މީޑިއާތަކަށް މައުލޫމާތު ދެއްވަމުން ވިދާޅުވީ އޭނާގެ އިސްތިއުފާގެ ސިޓީ މިހާރު ވަނީ ފޮނުވާފައިކަމަށެވެ. އަދި އަންނަ ބުރާސްފަތި ދުވަހަކީ އޭނާ ވަޒީފާއަށް ނުކުންނަވާނެ އެންމެ ފަހު ދުވަސް ކަމަށް ވިދާޅުވިއެވެ. އިސްތިއުފާ ދެއްވަނީ އާއިލާއަށް ވަގުތު ދިނުމަށާއި އަމިއްލަ ކަންތައްތަކެއް ހުރުމުންކަމަށް އޭނާ ވިދާޅުވިއެވެ.
އަފްޝަންއަކީ އެސްޓީއޯގެ މެނޭޖިން ޑިރެކްޓަރުކަމުން ވަކި ކުރި ރައީސް މުހައްމަދު ނަޝީދުގެ ފިކުރެއްގެ ދިރުމުގެ ފެކްޝަންގައި އިސްކޮށް ހަރަކާތްތެރިވާ ހުސެއިން އަމްރުގެ އަނބިކަނބަލުންނެވެ. އަފްޝަން އެލްޖީއޭގެ ސީއީއޯކަމަށް އައްޔަން ކުރީ 2020 ވަނަ އަހަރުގެ ޖޫން މަހުގައެވެ.
އަފްޝަން އެލްޖީއޭއަށް އައްޔަންކުރުމުގެ ކުރިން ހުންނެވީ އެމްޑީޕީގެ ސެކްރެޓަރީ ޖެނެރަލްކަމުގެ މަގާމުގައެވެ. އަދި ޕާޓީގެ އިދާރީ ގިނަ މަސައްކަތްތަކެއް އޭނާ ކުރެއްވިއެވެ.
އަފްޝަންގެ ސީއީއޯ ކަމުގައި އެލްޖީއޭއިން ވަނީ ލާމަރުކަޒީ އުސޫލުން އިދާރީ ދާއިރާތައް ހިންގުމަށްޓަކައި މުހިންމު މަސައްކަތްތަކެއް ކޮށްފައެވެ. އެގޮތުން މާލެއާއި އެކި އަތޮޅުތަކުގެ ކައުންސިލްތަކަށް އަމާޒުކޮށްގެން ބޭއްވާ ފަނޯއްލަ ދަރުބާރާއި އެނޫންވެސް ގިނަ ކަންތައްތަކެއް ވަނީ ކޮށްފައެވެ.
