ކ. ހިންމަފުށީގައި ހުންނަ އައްސޭރި ޖަލަށް ވައްދަން މަސައްކަތް ކުރި މަސްތުވާތަކެއްޗާއެކު ހައްޔަރުކުރި ޖަލު އޮފިސަރުގެ ބަންދަށް 15 ދުވަސް ޖަހައިފިއެވެ.
ޖަލު އޮފިސަރުގެ ބަންދަށް 15 ދުވަސް ޖަހާފައިވަނީ އޭނާގެ ބަންދުގެ މުއްދަތާމެދު ގޮތެއް ކަނޑައެޅުމަށް ފާއިތުވި ހުކުރު ދުވަހު ކޯޓަށް ހާޒިރު ކުރުމުންނެވެ.
ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅު އިއްޔެ ވިދާޅުވީ، އައްސޭރިޖަލަށް ވައްދަން މަސައްކަތް ކުރި މަސްތުވާތަކެތި، ކަރެކްޝަނަލް ސާރވިސްގެ އޮފިސަރަކާއި އެކު އަތުލައިގެންގައިވަނީ އިންޓެލިޖަންސްއަށް ލިބުނު މަޢުލޫމާތަކާއި ގުޅިގެން ދިވެހި ފުލުހުންގެ ޚިދުމަތާއި، މޯލްޑިވްސް ކަރެކްޝަނަލް ސަރވިސް ގުޅިގެން ހިންގި އޮޕަރޭޝަނެއްގައި ކަމުގައެވެ.
އޭނާ އިތުރަށް ވިދާޅުވެފައިވަނީ، އެ އޮފިސަރު ފުލުހުން ހައްޔަރުކޮށްފައިވާއިރު، ކަރެކްޝަނަލް ސަރވިސްގެ ޚިދުމަތުންވެސް އޭނާ ސަސްޕެންޑްކޮށްފައިވާކަމަށެވެ.
ކޮމިޝަނަރ އޮފް ޕްރިޒަންސް ވަނީ މިފަދަ ކަންކަމުގައި މަދުންނަމަވެސް ޖަލު ބަލަހައްޓާ އޮފިސަރުން ބައިވެރިވާކަން ފާހަގަކުރައްވާ އެކަމުގެ ކަންބޮޑުވުން ފާޅުކުރައްވާފައެވެ. ހައްޔަރު ކުރި އޮފިސަރުގެ ވަނަވަރެއް ކަރެކްޝަނުން ހާމައެއް ނުކުރެއެވެ.
ރާއްޖޭގައި ހިންގާ ޖަލުތަކަށް ޤަވާއިދާ ޚިލާފަށް އެއްޗެހި ވެއްދުމާއި، އެނޫންވެސް ގޮތްގޮތުން ޤާނޫނާ ޚިލާފުވާ ޖަލު އޮފިސަރުންނާ ދެކޮޅަށް އޮޕަރޭޝަން ހިންގައި މީގެ ކުރިން ބައެއް އޮފިސަރުން ހައްޔަރުކޮށްފައިވެއެވެ.
