އެމްއެމްޕީއާރުސީގެ ޚިޔާނާތުގެ ދައުވާ ސާބިތުވެ، ޖުމްލަ ދެމިލިއަން ރުފިޔާ ދައުލަތަށް ދެއްކުމަށް ކުރިމިނަލް ކޯޓުން ކުރި ހުކުމާއި އެއްގޮތަށް ޖޫރިމަނާގެ ފައިސާ ނުދައްކާތީ އޭޖީ އޮފީހުން ސިވިލް ކޯޓުގައި ދައުވާ ކޮށްފިއެވެ.
އޭޖީ އޮފީހުން ސިވިލް ކޯޓުގައި ދައުވާ ކޮށްފައިވަނީ، އެމްއެމްޕީއާރުސީގެ ޚިޔާނާތާއި ގުޅިގެން ދައުވާކުރި މަނީ ލޯންޑަރިންގެ ދެ ދައުވާ ސާބިތުވެ، ޖުމްލަ ދެމިިއަން ރުފިޔާއިން ޖޫރުމާނާކޮށް، އެފައިސާ 1 މަސްދުވަހުގެ ތެރޭގައި ދައުތަކަށް ދެކުމަށް ކުރި ހުކުމާއި އެއްގޮތަށް 1 މިލިއަން ރުފިޔާ ދައްކާފައި ނުވާތީ އެފައިސާ އަދީބުއަތުން ނަގައިދިނުމަށް އެދިއެވެ.
އޭޖީން ސިވިލްކޯޓުގައި ކުރި މި ދައުވާގެ އަޑުއެހުމެއް މިމަހުގެ 2 ވަނަ ދުވަހު ސިވިލް ކޯޓުގައި ބާއްވާފައި ވެއެވެ. މި އަޑު އެހުމުގައި އަދީބު ފައިސާ ދައްކަން ބޭނުންވާ ގޮތުގެ ޕްރޮޕޯސަލެއް ޝަރީއަތަށް ހުށަހަޅަން ބޭނުންވާތީ އެ ފުރުސަތު ދިނުމަށް އެދިފައެވެ.
އެއަށްފަހު މިމައްސަލާގައި މިއަދު ބޭއްވުނު އަޑުއެހުމުގައި ގާޒީ ވިދާޅުވެފައިވަނީ، އަދީބުގެ ފަރާތުން ފައިސާ ދެއްކުމަށް ބޭނުންވާގޮތުގެ ޕްރޮޕޯސަލް ފާއިތުވި ހަފްތާގައި ކޯޓަށް ހުށަހަޅާފައިވާކަމުގައެވެ. އަދި ހަމަ މި ޕްރޮޕޯސަލް އަދީބުގެ ފަރާތުން އޭޖީ އޮފީހަށް ލިބިފައިވާކަމަށް އެޖީ އޮފީހުގެ ވަކީލުވެސް ޝަރިއަތުގެ މަޖިލިހުގައި ވިދާޅުވެފައި ވެއެވެ.
1 މިލިއަން ރުފިޔާގެ ޖޫރިމަނާ ފައިސާ ދެއްކުމަށް އަދީބު ހުށަހަޅާފައިވާ ގޮތް:
- 1 މިލިއަން ރުފިޔާގެ ތެރެއިން ފުރަތަމަ 1 ލައްކަ ރުފިޔާ ދެއްކުމަށްފަހު ބާކީ އޮތްބައި މަހަކު 20،000 ރުފިޔާގެ މަގުން ދައްކާ ޚަލާސް ކުރުމަށް.
އެހެންނަމަވެސް ދައުލަތުން ބުނެފައިވަނީ ކޮމިންޓްމަންޓެއްގެ ގޮތުގައި 1 މިލިއަން ރުފިޔާގެ %20 އަދީބު ދައުލަތަށް ދައްކަން ޖެހޭނެ ކަމުގައެވެ. މިގޮތުން 2 ލައްކަ ރުފިޔާ ދައުލަތަށް ދެއްކުމަށްފަހު ބާކީ އޮންނަ އަދަދު 3 އަހަރަށް ބަހާލައިގެން މަހުން މަހަށް ދެއްކުމުގައި މައްސަލައެއް ނެތްކަމުގައެވެ.
މިއަދު ޝަރީއަތުގައި އަދީބުގެ ފަރާތުން ބުނެފައިވަނީ ކޮމިޓްމަންޓުގެ ގޮތުގައި ފައިސާ ދެއްކުމަށް މީގެ ކުރިން ހުށަހަޅާފައި ނުވާތީ އެފައިސާ ދެއްކުމަށް އެއްބަސްވުމުގެ ކުރިން ދައުލަތާއި މަޝްވަރާ ކުރަން ބޭނުންވާކަމުގައެވެ. ގާޒީ މިއަދުގެ އަޑުއެހުން ނިންމަވާލެއްވީ އަދީބުއަށް އެފުރުސަތު ދިނުމަށް ފަހުއެވެ.
އެމްއެމްޕީއާރުސީގެ ޚިޔާނާތުގެ މައްސަލާގައި އަދީބު ދެމިލިއަން ރުފިޔާއިން ޖޫރިމަނާ ކޮށްފައިވާއިރު، 1 މިލިއަން ރުފިޔާ ހޯދުމަށް ދައުލަތުން ސިވިލް ކޯޓުގައި ދައުވާ ކޮށްފައިވަނީ އަނެއް 1 މިލިއަން ރުފިޔާ އަދީބު ދައުލަތަށް ދައްކާ ޚަލާސްކޮށްފައިވާކަމެއް ޔަގީން ކުރެވިފައެއް ނުވެއެވެ.
