ޔޫއެފާ ނޭޝަންސް ލީގުގައި އަންނަ އާދީއްތަ ދުވަހުގެރޭ ޕޯޗުގަލްއާ ދެކޮޅަށް ނުކުތުމުގެ ކުރިން މިއީ ތައްޔާރުވާން ލިބޭ ފުރުސަތެއް ކަމަށް ފްރާންސްގެ ފޯވާޑް އޮލިވަރ ޖިރޫޑް ބުނެފިއެވެ.
މިރޭ އެކުވެރިކަމުގެ މެޗެއްގައި ޔޫކްރެއިންނާ ދެކޮޅަށް ނުކުތުގެ ކުރިން ވާހަކަދައްކަމުން ޖިރޫޑް ބުނީ މިއީ އެކުވެރިކަމުގެ މެޗަކަށް ވިޔަސް ފްރާންސުން ނުކުންނާނީ ކާމިޔާބުކުރަން ކަމަށެވެ. އާދީއްތަ ދުވަހު ޕޯޗުގަލް އަތުން މޮޅެއް ބޭނުން ކަމުގައި ވަނީނަމަ މިމެޗުގައި ރަނގަޅު ކުޅުމެއް ދައްކަން ޖެހޭ ކަމަށް ޖިރޫޑް ބުނިއެވެ. ބައިނަލްއަގުވާމީ 100 ވަނަ މެޗަށް ނުކުންނަ ޖިރޫޑް ބުނީ 2014 ވަނަ އަހަރުގެ ވޯލޑްކަޕުގައި ޔޫކްރެއިނާ ދެކޮޅަށް ކުޅުނު މެޗުގެ ފޮނިހަދާންތައް އާވާކަމަށެވެ.
"މިއީ އަހަނަށް ވަރަށް ހާއްސަ މެޗެއް، އަހަރެން ހަމަގައިވެސް ފަހުރުވެރިވޭ ގައުމީ ޖާޒީގައި 100 ވަނަ މެޗު ކުޅެވޭނެތީ، ޕްލެޓްނީގެ ރެކޯޑްވެސް މުގުރާލަން ބޭނުންވަނީ " ފްރާންސްގެ ފޯވާޑް ޖިރޫޑް ބުންޏެވެ.
ފްރާންސް ކުރީގެ ތަރި މިޝޭލް ޕްލެޓީނީގެ ރެކޯޑް މުގުރާލަން ޖިރޫޑް ބޭނުންވަނީ ހަމަ އެންމެ ލަނޑެކެވެ. މިހާތަނަށް ގައުމީޓީމަށް އެންމެ ގިނަ ގޯލްޖަހާފައިވަނީ ތިއެރީ އޮންރީއެވެ. އޭނާ ވަނީ 51 ލަނޑުޖަހާފައެވެ.
