ހދ. ކުޅުދުއްފުށީ އެއަރޕޯޓަށް ރޭގަޑުގެ ދަތުރުތައް ފަށާ، އެއަރޕޯޓަކީ 24 ގަޑިއިރު ޚިދުމަތް ދޭ އެއަރޕޯޓަކަށް ބަދަލުކުރުމަށް ނިންމައިފިއެވެ.
ކުޅުދުއްފުށި އެއަރޕޯޓު ހިންގަމުންދާ ރީޖަނަލް އެއަރޕޯޓްސް ކުންފުނިން ހާމަ ކޮށްފައިވާގޮތުގައި، ކުޅުދުއްފުށީ އެއަރޕޯޓްގައި ނައިޓް ލޭންޑިންގ ސިސްޓަމް ގާއިމުކޮށް، ނައިޓް ލޭންޑިންގްގެ ޚިދުމަތް ރަސްމީކޮށް ފެއްޓުމަށް ބާއްވަންޖެހޭ ޓެސްޓް ފްލައިޓް މިއަދު ކާމިޔާބުކަމާއިއެކީ ވަނީ ޖައްސާފައެވެ.
ރީޖަނަލް އެއަރޕޯޓްސް ކުންފުނިން އިތުރަށް ހާމަކޮށްފައިވާ ގޮތުގައި މިއެއަރޕޯޓު ރޭގަޑުވެސް އޮޕަރޭޓް ކުރާންފެށުމުން އެއަރޕޯޓު ބަދަލުވެގެން ދާނީ 24 ގަޑިއިރު ޚިދުމަތްދޭ އެއަރޕޯޓަކަށެވެ.
އޭގެ އިތުރަށްވެސް ރީޖަނަލް އެއަރޕޯޓްސް ކުންފުނިން ހާމަކޮށްފައިވާ ގޮތުގައި މި އެއަރޕޯޓަށް ރޭގަޑު ދަތުރުތައް ފެށުމުން ކުޅުއްދުއްފުއްޓާއި ކަރި ރަށްރަށުގެ ރައްޔިތުންނަށް ކުރިމަތިވެފައިވާ ދަތުރުފަތުރުގެ ދަތިތަކަށް ވަރަށް ބޮޑު ހައްލެއް ލިބިގެންދާނެއެވެ. އޭގެ އިތުރުންވެސް ބަލިމީހުން އުފުލުމުގައިވެސް މިހާރު ކުރިމަތިވެފައިވާ ބައެއް ގޮންޖެހުންތަކަށް ހައްލު ލިބިގެންދާނެ ކަމުގައިވެސް އެކުންފުނިން ހާމަކޮށްފައި ވެއެވެ.
ހަމައެއާއެކު މި ބަދަލުގެ ސަބަބުން ވިޔަފާރިތަކަށް ކުރިއެރުން ލިބި، ގެސްޓުހައުސް ވިޔަފާރިއަށްވެސް ހެޔޮ ބަދަލުތަކެއް އަންނާނެކަމަށް ރީޖަނަލް އެއަރޕޯޓްސް ކުންފުނިން އުއްމީދު ކުރެއެވެ.
ރީޖަނަލް އެއަރޕޯޓުން ދަނީ، ހޯރަފުށި އެއާޕޯޓާއި މާވަރުލު އެއާޕޯޓުގައިވެސް ރޭގަނޑު ފްލައިޓް ޖެއްސޭނެ ސިސްޓަމް ގާއިމްކުރުމުގެ މަސައްކަތް ކުރަމުންނެވެ. އެކުންފުނިން އުއްމީދު ކުރަނީ ކުރިޔަށް އޮތް މަހެއްހާ ދުވަހުގެ ތެރޭގައި މިމަސައްކަތްތައް ނިންމާލެވި ނައިޓްލޭންޑިންގެ ޙިދުމަތް މިއެއަރޕޯޓުތަކުންވެސް ލިބިގެންދިއުމަށެވެ.
ކުޅުދުއްފުށި ހިމެނޭގޮތުން ނައިޓްލޭންޑިންގެ ޙިދުމަތް ލިބޭ އެއަރޕޯޓުތަކުގެ އަދަދު މިހާރުވަނީ 4 އަށް އަރާފައެވެ.
