ހުޅުމާލޭގައި މީހުން ދިރިއުޅެން ފެށިތާ 19 އަހަރު މި މެއި މަހުގެ 12 ވަނަ ދުވަހު ފުރޭ އިރު، އެ ދުވަސް ފާހަގަކުރުމުގެ ގޮތުން އަރބަންކޯއިން ގިނަ ހަރަކާތްތަކެއް ރާވައިފިއެވެ.
އެގޮތުން މޯލްޑިވްސް ނެޝެނަލް ހައުސިން އެސޯސިއޭޝަންއާއި އަރބަންކޯއިން ގުޅިގެން 12 ވާ ހުކުރު ދުވަހުގެ ހަވީރު ހުޅުމާލޭގައި ކުޑަކުދިންގެ ހަވީރެއް ބޭއްވުމަށް ވަނީ ހަމަޖައްސާފައެވެ. އަދި އިއްޔެ ފާހަގަކުރި ކުޑަކުދިންގެ ދުވަހާއި ހުޅުމާލެ އަށް 19 އަހަރު ފުރުން ފާހަގަކުރުމުގެ ގޮތުން ކުޑަކުދިންގެ ހަވީރު ބާއްވަން ހަމަޖެހިފައި ވަނީ ހަވީރު 4ން 6އަށް ދެވަނަ ފިޔަވަހީގެ ހިޔާ ޕާކުގައެވެ.
މި ހަވީރުގައި ލަވަކިޔުންތެރިޔާ ޝަލަބީ އަދި ރޮބޯމޭންގެ ހަރަކާތްތައް ކުދިންނަށް ދައްކާލުމަށް ހަމަޖައްސާފައިވާއިރު، ސްޕޯޓްސް ކާ ޝޯވެސް ކުރިއަށްދާނެއެވެ. މީގެ އިތުރަށް އަރބަންކޯގެ އިސްނެގުމަށް ހިޔާ މެޑިކަލް ސެންޓަރ އާ ގުޅިގެން ގެންދާ ހެލްތު ޗެކްއަޕް ސްޓޭޝަނެއްވެސް މި ހަވީރުގައި ހިމަނާފައިވާނެއެވެ.
މި ހަރަކާތުގެ މަގުސަދަކީ ކުޑަކުދިންނަށް އުފާވެރި ވަގުތެއް ހޯދައިދީ، މުޖުތަމައުގެ މެދުގައި އޮންނަ ގުޅުން އެއްބައިވަންތަކޮށް، ބާރުވެރިކޮށް، ބަދަހިކުރުމެވެ. އަދި މުޖުތަމަޢުގައި ދިރިއުޅޭ މީހުންނަށް، ގެއިން ބޭރުގައިވެސް ދަރިންނަށް އުފާވެރި، ހަރުދަނާ، ޞުލްޙަވެރި މާޙައުލެއް ޤާއިމުކުރެވިދާނެކަން ދައްކުވައިދިނުމެވެ. .
