ރައްޔިތުންގެ މަޖިލިހުގައި ސިޔާސީ ޕާޓީތަކުން ބާއްވާ ސިޔާސީ ހަރަކާތްތައް ރައްޔިތުންގެ މަޖިލިހުގެ ރަސްމީ ވެބްސައިޓުން ލައިވް ސްޓްރީމް ކޮށްދޭން ފަށައިފިއެވެ.
މިގޮތުން، ރައްޔިތުންގެ މަޖިލިހުގައި ހިމެނޭ އިނދިކޮޅު މެމްބަރުން ޗާގޮސްގެ މައްސަލާގައި ސަރުކާރާއި ދެކޮޅަށް ބޭއްވި ނޫސްވެރިންގެ ބައްދަލުވުން ރައްޔިތުންގެ މަޖުލީހުގެ އިދާރާއިން މިއަދުވަނީ ލައިވް ސްޓްރީމް ކޮށްދީފައެވެ. އިދިކޮޅު ފަރާތްތަކުން މިއަދު ބޭއްވި ނޫސްވެރިންގެ ބައްދަލުވުމަކީ ޗާގޮސްގެ މައްސަލާގައި، ބަންޑާރަނައިބު އިބުރާހިމް ރިއްފަތުގެ އިތުބާރު ނެތްކަމުގެ މައްސަލަ މަޖިލީހަށް ވެއްވުމަށްފަހު ބޭއްވި ނޫސްވެރިންގެ ބައްދަލުވުމެކެވެ.
ރައްޔިތުންގެ މަޖިލިހުގެ އިދާރާ، ސިޔާސީ ޕާޓީތަކުން ބާއްވާ ސިޔާސީ ހަރަކާތްތަކަށް ބޭނުން ކުރަމުގެ ފުރުސަތު މީގެކުރިން މިބީދައިން ދޫކޮށްފައެއް ނުވެއެވެ. އަދި ސިޔާސީ ޕާޓީތަކުން އިންތިޒާމްކޮށްގެން ބާއްވާ ސިޔާސީ ހަރަކާތްތަކަށްވެސް މަޖިލިހުގެ އިދާރާގެ ބޭނުންކުރުމަކީ ރައްޔިތުންގެ މަޖިލިހުގެ ކުރީގެ ރައީސުން އަމަލު ކުރައްވާފައިވާ އުސޫލެއް ނޫންކަންވެސް ފާހަގަ ކޮށްލެވެއެވެ. އަދި އެއީ މަޖިލިހުގެ ގަވާއިދު ތަންދޭކަމެއް ނޫންކަންވެސް ފާހަގަ ކޮށްލެވެއެވެ.
އެހެންނަމަވެސް އެމްޑީޕީގެ ރައީސް މުހައްމަދު ނަޝީދު އެމްޑީޕީގެ ލީޑަރޝިޕާއި ޚިޔާލުތަފާތުވެ، ވަކިން ސިޔާސީ ހަރަކާތް ހިންގަވަން ފެށިފަހުން، މަޖިލިހުގެ މަސައްކަތްތަކާއި ސީދާ ގުޅުންނެތް ސިޔާސީ ހަރަކާތްތަކަށް ރައްޔިތުންގެ މަޖިލިސް ބޭނުން ކުއްރައްވަން ފައްޓަވާފައިވާކަން ފާހަގަ ކޮށްލެވެއެވެ.
މިގޮތުން ނަޝީދުވަނީ ޗާގޮސްގެ މައްސަލާގައި، އިދިކޮޅު ޕާޓީތަކާއި ދާދި ފަހުން މަޖިލިސް އިދާރާގައި ބައްދަލުކޮށް މަޝްވަރާކޮށްފައެވެ. މިބައްދަލުވުމުގައި މަޖިލިހުގެ މެމްބަރުންގެ ގޮތުގައި ނުހިމެނޭ ސިޔާސީ ފާރާތްތައްވެސް ވަނީ ބައިވެރި ވެފައެވެ.
އެހެންނަމަވެސް ޗާގޮސްގެ މައްސަލާގައި އިދިކޮޅު ޕާޓީތަކުން ގުޅިގެން ބޭއްވި ނޫސްވެރިންގެ ބައްދަލުވުން ފާހަގަވެގެން ދިޔައީ، ސިޔާސީ ޕާޓީތަކުން އިންތިޒާމްކުރި ސިޔާސީ އިވެންޓެއް ރައްޔިތުންގެ މަޖިލިހުން ރަސްމީކޮށް ލައިވްކުރި ފުރަތަމަ ފަހަރު ކަމުގައެވެ.
ރައްޔިތުންގެ މަޖިލިހުގެ އިދާރާ ހިންގެވުމުގެ ހުރިހާ އިޚްތިޔާރެއް އޮންނަނީ އެވަގުތަކު މަޖިލިހުގެ ރައީސްކަން ކުރައްވާ ބޭފުޅަކަށެވެ. އެހެންނަމަވެސް ރައްޔިތުންގެ މަޖިލިހުގެ ރައީސް މަޖިލިސް ހިންވަން ޖެހިވަޑައިގަންނަވަނީ ރައްޔިތުންގެ މަޖިލިހުގެ ގަވާއިދުގައި ބަޔާންކޮށްފައިވާ އުސޫލުގެ މަތިންނެވެ.
One Response
މަޖިލީހުގެ ރައީސް ކަމުގަ މިވަގުތު ހުރީ ޗާޓުން ބޭރުން ކަންކަން ކުރުމުގެ ޝަގަަފަތެއް ގެންގުޅޭ އެ ފިކުރި ދިރުވަން އަރުވާޖަހައިގެން ހުރި އިއްޒަތްތެރި މެމްބަރެއް ވީމާ ގަވާއިދުގަ ނެތަސް ކުރެވޭނެ.