ހިޔާ ފްލެޓްގެ ދެ އެޕާޓްމެންޓް އެއްކޮށްލި މައްސަލާގައި އެޕާޓްމަންޓުތަކުގެ ވެރިފަރާތް ކޮށްފައިވާ 200،000 ރުފިޔާގެ ޖޫރިމަނާ ދެއްކުމަށް ދިން 5 ދުވަހުގެ މުއްދަތުގެ ތެރޭގައި ދައްކާފައި ނުވާކަން އާބަންކޯއިން ހާމަކޮށްފިއެވެ.
އާބަންކޮއިން ބައެއް މީޑިއާތަކަށް މައުލޫމާތު ދީފައިވާ ފޮތުގައި ފަސްދުވަހުގެ ތެރޭގައި ފައިސާ ދެއްކުމުގެ އިތުރުން 10 ދުވަހުގެ ތެރޭގައި އިމާރާއި ކުރިން ހުރިގޮތަށް ބަދަލުކުރުމަށް ވަނީ އަންގާފައެވެ. އެހެންނަމަވެސް ދީފައިވާ މުއްދަތުގައި އެޕާޓްމަންޓުގެ ވެރިފަރާތުން އެންގުމާއި އެއްގޮތަށް އަމަލު ކޮށްފައި ނުވާކަމަށް އާބަންކޯއިން ބައެއް މީޑިއާތަކަށް މައުލޫމާތު ދީފައި ވެއެވެ.
އޭގެ އިތުރުން މި ފެލެޓްގެ ވެރިފަރާތަކީ ފްލެޓްތަކުގެ އަގު ކުޑަކުރުމަށް ވަކާލާތު ކުރާފަރާތަކަށް ވާއިރު، އެ ވެރިފަރާތަކީ ގަވާއިދުން ފެލްޓްގެ ކުލިވެސް ދައްކަމުން ނުދާ ފާރާތެއްކަމަށް ވަނީ މައުލޫމާތު ލިބިފައެވެ.
ހިޔާ ފްލެޓުތަކުގެ އިމާރާތެއްގައި ދެ އެޕާޓްމަންޓް އެއްކޮށްލައިގެން ހަދާފައިވާކަމުގެ ރިޕޯޓު އާބަންކޯއަށް ލިބުމާއިގުޅިގެން، އަކަން ބެލުމަށްފަހު އެޕާޓްމަންޓުގެ ސްޓަރކްޗަރއަށް ބަދަލު ގެނައި ފަރާތްތަކަށް އާބަންކޯއިން ފިޔަވަޅު އަލާފައިވަނީ މިމަހުގެ 5 ވަނަ ދުވަހުއެވެ.
އާންބަންކޯއިން ބުނެފައިވަނީ، މިކަން އެ ކޯޕަރޭޝަންގެ ސަމާލުކަމަށް އައުމާއެކު، އެކޯޕަރޭޝަނުން ބެލި ބެލުމުން އެއީ ކޮން އެޕާޓްމަންޓްތަކެއްކަން ދެނެގަނެވިފައި ވާކަމުގައެވެ.
އަދި މިއެޕާޓްމަންޓުތަކުގެ އިންޓީރިއަރ ހެދުމުގެ މަސައްކަތް ކުރި އިރު، އެކޯޕަރޭޝަނުން ހަދާފައިވާ އުސޫލުތަކާއި ހިލާފަށް، ދެފަރާތުން ވަނީ ދެ އެޕަރޓްމަންޓުގެ މެދު ފާރު ތަޅާލައި، 4 ކޮޓަރީގެ އެއް އެޕާޓްމަންޓަކަށް ބަދަލުކޮށްފައި ކަމުގައިވެސް އާބަންކޯއިން ބުނެފައި ވެއެވެ.
މިގޮތުން މި މައްސަލަ ބެލުމަށް ފަހު މިއިން ކޮންމެ އެޕާރޓްމަންޓެއްވެސް، 100،000ރ އިން ޖޫރިމަނާކޮށް، ފަސް ދުވަހުގެ ތެރޭގައި ދެ ފަރާތުން ވެސް އެ ފައިސާ ދެއްކުމަށް ވަނީ އަންގާފައި ވާކަމަށްވެސް އާބަންކޯއިން ހާމަކޮށްފައި ވެއެވެ.
