ރިޓަޔަމެންޓް ޕެންޝަން ސްކީމްގެ ދަށުން، މި އަހަރު މީހުން ހައްޖަށް ގެންދިއުމަށް ޝައުގުވެރިވާ ފަރާތްތަކަށް އެ ފުރުސަތު ޕެންޝަން އޮފީހުން އިއްޔެ ހުޅުވާލައިފިއެވެ.
ޕެންޝަން އޮފީހުން ކުރި އިއުލާނެއްގައި ބުނީ އެ އޮފީހާއެކު އެއްބަސްވުން ޤާއިމުކުރަން، މީހުން ޙައްޖަށް ގެންދިއުމުގެ ޚިދުމަތް ބޭނުންވާ ފަރާތްތައް، މިމަހުގެ 14ވަނަ ދުވަހުގެ 14:00ގެ ކުރިން ސިޓީއަކުން އެކަން އެންގުމަށް ހުޅުވާލާފައިވާކަމަށެވެ. އެގޮތުން [email protected] މެދުވެރިކޮށް، ސިޓީ ނުވަތަ އީ-މެއިލްއެއް މެދުވެރިކޮށް އެކަން ޕެންޝަން އޮފީހަށް އެންގޭނެކަމަށް އެ އޮފީހުން ބުންޏެވެ.
އެ އޮފީހުގެ ބުނީ ހައްޖުވުމަށް މޯލްޑިވްސް ރިޓަޔަމެންޓް ޕެންޝަން ސްކީމްގެ ފައިސާ ދޫކުރުމާ ބެހޭ ގަވާއިދުގެ ދަށުން، މި އަހަރު މީހުން ހައްޖަށް ގެންދިއުމުގެ ހިދުމަތް ދިނުމަށް ޝައުގުވެރިވާ ފަރާތްތަކުން އެކަމަށް ކުރިމަތިލުމުގެ ފުރުސަތު ހުޅުވާލާފައިވާ ކަމަށެވެ. އެ ގަވާއިދުގެ ދަށުން ހައްޖަށް ގެންދިއުމުގެ ހިދުމަތް ދޭނީ ޕެންޝަން އޮފީހާ އެކު، އެއްބަސްވުން ހަދާފައިވާ، ހައްޖަށް ގެންދިއުމުގެ ހިދުމަތް ދޭ ފަރާތްތަކަށް އެކަނި ކަމަށް އިއުލާނުގައި ބުންޏެވެ.
ޙައްޖުވުމަށް ޕެންޝަން ސްކީމުން ފައިސާ ދޫކުރުމަށް ހަމަޖެހިފައިވަނީ ފަރުޟު ޙައްޖުގެ އަޅުކަން އަދާކޮށްފައިނުވާ ފަރާތްތަކުގެތެރެއިން، ރިޓަޔަރމަންޓް ސޭވިންގްސް އެކައުންޓު ބެލެންސްގައި މަދުވެގެން 336،000 (ތިންސަތޭކަ ތިރީސް ހަހާސް) ރުފިޔާ ޖަމާކުރެވިފައިވާ މީހުންނަށެވެ.
ޙައްޖުވުމަށް ޕެންޝަން ސްކީމުގެ މެންބަރުންނަށް ބޭނުންކުރެވެން ހުރި ޢަދަދު، އެ މެންބަރެއްގެ ރިޓަޔަރމަންޓް ސޭވިންގްސް އެކައުންޓު ސްޓޭޓްމަންޓުންނާއި ޕެންޝަން އޮފީހުގެ މޯބައިލް އެޕްލިކޭޝަނުން ބެލޭނެ އިންތިޒާމުވެސް ޕެންޝަން އޮފީހުން ވަނީ ހަމަޖައްސާފައެވެ.
ފަރުޟު ޙައްޖުގެ އަޅުކަން އަދާކުރުމަށް ޕެންޝަން ފަންޑުން 80 އިންސައްތަ ދޫކުރެވޭގޮތަށް ޕެންޝަނާ ބެހޭ ޤާނޫނަށް ގެނައި އިސްލާހު ރައީސުލްޖުމްހޫރިއްޔާ ތަސްދީޤުކުރެއްވީ 2019 އޮގަސްޓްގައެވެ.
