ސިވިލް ކޯޓުގެ އިސްޤާޟީ އަދި ކްރިމިނަލް ކޯޓުގެ އިސްޤާޟީ އައްޔަނުކޮށް ފަތްކޮޅު އެރުވައިފިއެވެ.
ސިވިލް ކޯޓުގެ އިސްޤާޟީ އަދި ކްރިމިނަލް ކޯޓުގެ އިސްޤާޟީ ކަމަށް ކުރިމަތިލުމަށް ކޮމިޝަނުން ކޮށްފައިވާ 02 އިޢުލާންގެ ދަށުން މި ދެ މަޤާމަށް ކުރިމަތިލީ ފަރާތްތަކާ "ފަނޑިޔާރުން ޢައްޔަންކުރުމުގައި ކޮމިޝަނަށް ލަފާދޭ ކޮމިޓީ"އިން އިންޓަރވިއުކުރުމަށްފަހު ކްރިމިނަލް ކޯޓުގެ އިސްޤާޟީ ކަމަށް ހަމަޖެއްސުމަށް ކޮމިޝަނަށް ލަފާ އަރުވާފައިވާ ޅ.ހިންނަވަރު، މާތިލަ، އަލްއުސްތާޛު އާދަމް މުޙައްމަދެވެ.
ޤާޟީ އާދަމް މުހައްމަދަކީ 2021 ވަނަ އަހަރު ޖެނުއަރީ މަހު ކްރިމިނަލް ކޯޓަށް އައްޔަންކުރި ޤާޟީ އެކެވެ. އޭގެ ކުރިން ޕްރޮސެކިއުޓާ ޖެނެރަލްގެ އޮފީހުގައާއި ދިފާއީ ވަކީލެއްގެ ގޮތުގައި އޭނާ މަސައްކަތް ކުރެއްވިއެވެ. މީގެ ކުރިންވެސް ޤާޟީ އާދަމް މުޙައްމަދާއި ވަނީ ކްރިމިނަލް ކޯޓުގެ ހިންގުން ހަވާލު ކުރައްވާފައެވެ. އެފަހަރު ހިންގުން ހަވާލު ކުރެއްވީ ކްރިމިނަލް ކޯޓު ހިންގުމާ ޙަވާލުވެ ހުންނެވި ފަނޑިޔާރު އަލްއުސްތާޛު ޢަލީ ރަޝީދު ޙުސައިން، ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރެއްވުމާ ގުޅިގެންނެވެ.
އަދި ސިވިލް ކޯޓުގެ އިސްޤާޟީ ކަމަށް ހަމަޖެއްސުމަށް ކޮމިޝަނަށް ލަފާއަރުވާފައިވާ ގއ.މާމެންދޫ، ފެހިގެ، އަލްއުސްތާޛު އަޙްމަދު ނިމާލް ޖުނައިދު ސިވިލް ކޯޓުގެ އިސްޤާޟީ ކަމަށް ހަމަޖެއްސުމަށް 2023 މޭ 03 ވަނަ ދުވަހު ބޭއްވުނު މި ކޮމިޝަންގެ ބައްދަލުވުމުގައި ނިންމާ، 2023 މޭ 09 ވަނަ ދުވަހު ވަނީ ފަތްކޮޅު އަރުވާފައެވެ.
