ކުރިޔަށް އޮތް 5 އަހަރަށް ރާއްޖޭގެ ވެރިކަމަށް އިސްކުރާނެ ފަރާތެއް ހޮވުމަށް ބޭއްވުމަށް ހަމަޖެހިފައިވާ ރިޔާސީ އިންތިޚާބު އަންނަ ސެޕްޓެމްބަރުމަހުގެ 9 ވަނަ ދުވަހު ބޭއްވުމަށް ހަމަޖެހިފައިވާއިރު، އިންތިޚާބަށް މިހާރު ބާކީ އޮތީ އެންމެ 123 ދުވަހެވެ.

މިގޮތުން ކުރިޔަށް އޮތް ރިޔާސީ އިންތިޚާބަށް އަމާޒުކޮށް ބައެއް ސިޔާސީ ޕާޓީތަކުން އެޕާޓީތަކުގެ ރިޔާސީ ކެނޑިޑޭޓުން އައްޔަންކޮށް، ކެމްޕޭންގެ ސްޓްރަޓަޖީތައް އެކުލާވާލަމުންދާއިރު، ގިނަ ބަޔަކު ފާހަގަކުރަމުންދާ އެއްކަމަކީ، ރާއްޖޭގަ މިވަގުތު އޮތް އެންމެ ބޮޑު އެއް ސިޔާސީ ޕާޓީގެ ހާލަތެވެ. އެތައްހާސް މެމްބަރުންނެއް އެޕާޓީއެއްގެ މެމްބަރުންގެ ގޮތުގައި ތިބި، އިދިކޮޅު ޕީޕީއެމްގެ ހާލަތެވެ.

ހަމަ އެއާއެކު ފާހަގަ ކޮށްލާންޖެހޭ އެއްކަމަކީ އިދިކޮޅު ޕީޕީއެމްއަކީ ކުރިޔަށް އޮތް ރިޔާސީ އިންތިޚާބަށް އަމާޒުކޮށް އެންމެ ފުރަތަމަ ރިޔާސީ ޓިކެޓް ހަވާލުކުރި ޕާޓީ ކަންވެސްމެއެވެ. ޕީޕީއެމްއިންވަނީ އެޕާޓީގެ ރިޔާސީ ޓިކެޓް، ފާއިތުވި އަހަރުގެ ޖުލައިމަހު، މިހާރު ޖަލުގައި އޮންނެވި އެޕާޓީގެ ރައީސް، ކުރީގެ ރައީސް ޔާމިންއާއި ހަވާލު ކޮށްފައެވެ.

މިގޮތުން، ރައީސް ޔާމިން 11 އަަހަރުގެ ޖަލު ހުކުމެއް ތަންފީޒު ކުރައްވަން ފެއްޓެވިތާ މިއަދާއި ހަމައަށް 135 ދުވަސް ފާއިތުވެގެން ގޮސްފައިވާއިރުވެސް، އަދި ގާނޫނުގައި ވާގޮތުގެމަތިން، ޕާޓީގެ ލީޑަރެއްގެ ހައިސިއްޔަތުން ޔާމިނަށް މިހާރު އެއްވެސް ދައުރެއް ނެތް ނަމަވެސް، އިދިކޮޅު ޕީޕީއެމްއިން އަދިވެސް ވަކާލާތު ކުރަމުން ދަނީ އެޕާޓީގެ ފަރާތުން ރިޔާސީ އިންތިޚާބުގައި ވާދަކުރައްވާނޭ ބޭފުޅަކީ އެމަނިކްފާނު ކަމުގައެވެ.

ދެވަނަ ފަރާތަކަށް އެޕާޓީގެ ފަރާތުން ރިޔާސީ އިންތިޚާބުގައި ވާދަކުރުމަށް ފުރުސަތެއް ނޯންނާނޭކަމުގައި ވިދާޅުވެ، ޔާމީނަށް ކުރިމަތި ނުލެވިއްޖެ ހާލަތެއްގައި ޓިކެޓަށް މުޑި ނަންގަވައިގެން ތިއްބެވި ބޭފުޅުންނަށްވެސް ވިދާޅުވާން ޖެހިފައިވާ ލަވައަކީ މިލަވައެވެ.

ކުރުކޮށް ދަންނަވާނަމަ، ޕީޕިއެމްގެ ލީޑަރޝިޕުގެ ބައެއް ބޭފުޅުންވެސް ފާހަގަ ކުރައްވާ ގޮތުގައި، ޔާމިން ޖަލަށް ވަޑައިގެންނެވީ ހުރިހާ "ތަޅުދަނޑި"އެއް ހިތްޕަވައިގެންނެވެ.

އެއީ ރަސްމީކޮށް ޕާޓީގެ ޓިކެޓް އެމަނިކުފާނަށް އަރުވާފައި ވުމާއެކު، ޕާޓީގެ ފަރާތުން އެހެން ރިޔާސީ ކެނޑިޑޭޓަކު އައްޔަން ކުރުމުގެ އެއްވެސް މަސައްކަތެއް ރަސްމީ ހައިސިއްޔަތުން ޕާޓީގެ ސެނެޓަށްވެސް ކުރެވެން ނެތީއެވެ.

އަދި އޭގެ އިތުރުން، ޕާޓީގެ ލީޑަރޝިޕްގައި ތިއްބެވި ބައެއް ފަރާތްތަކުން، ރައީސް ޔާމިނަށް ކުރިމަތި ނުލެވޭ ހާލަތުގައި، ޕީޕީއެމްއިން ކެނޑިޑޭޓަކު ނުނެރެ، އެޕާޓީން ޖުމުހޫރީ ޕާޓީގެ ރިޔާސީ ކެނޑިޑޭޓް ގާސިމް އިބުރާހިމަށް ތާއީދު ކުރުމަށް، ރައީސް ޔާމިނަށް ވިސްނަވައި ދެއްވުމަށް މަސައްކަތް ކުރަމުންދާކަމަށްވެސް ލީޑަރޝިޕްގައި ތިއްބެވި ބައެއް ބޭފުޅުން ގެންދަވަނީ ތުހުމަތު ކުރައްވަމުންނެވެ.

ޕާޓީގެ އެތައްހާސް މެމްބަރުން އަނެއް 5 އަހަރު މަގުމަތިވާން ދޫކޮށްލާންވީތަ؟

ދިވެހިރާއްޖެ މަލްޓިޕާޓީ ޑިމޮކްރަސީއަށް އަލިވިލުމަށްފަހު، އެ ނިޒާމުގެ ތެރެއިން އުފެދިގެންދާ ހުރިހާ ސިޔާސީ ޕާޓީއެއްގެވެސް މައިގަޑު އެއް އަމާޒެއް އޮންނާން ޖެހެއެވެ. އެއީ، ޕާޓީ ނިޒާމުގެ ތެރެއިން ގައުމަށް ޚިދުމަތް ކުރުމަށް ވެރިކަމަށް އައުމެވެ. އެއީ ކޯލިޝަން ޕްލެޓްފޯމަކުން ނަމަވެސް، ނުވަތަ ގިނަ ކަންޏާ ވާދަކޮށްގެން ނަމަވެސް ވެރިކަމަށް އައިސް، އެޕާޓީއެއްގެ ސިޔާސަތު ތަންފީޒުކޮށް، އެމަގުން ގައުމަށް ޚިދުމަތް ކުރުމެވެ.

މިގޮތުން ބަލާއިއިރު، ވަކީން ޚާއްސަކޮށް، އިދިކޮޅު ޕީޕީއެމް ފަދަ ވަރުގަދަ މެމްބަޝިޕެއް އޮވެފަ، ރައްޔިތުންގެ ތާއީދުވެސް އިންތިހާއަށް އޮތް ޕާޓީއަކަށް މިމަގުސަދު ހާސިލްކުރުމަށް އޮތް ޒިންމާއާއި މަސްއޫލިއްޔަތު އެތައް ގުނައަކުން ބޮޑުވެގެންދާ ކަމުގައިވެސް ދަންނަވާން ޖެހެއެވެ.

އޭގެ އެންމެ ބޮޑު އެއް ސަބަބެއްގެ ގޮތުގައި ފާހަގަވާން އޮތީ، ކުރިަޔަށް އޮތް ދައުރުގައި ޕާޓީއަށް ވެރިކަމަށް އާދެވި، 5 އަހަރުވަންދެން މަގުމަތީގައި މުޒާހިރާ ކުރަމުންދިޔަ ފަރާތްތަކުން އެނޫން ގޮތެއް ހޯދުމަށް ދެކެމުން އައިސްފައިވާ ހުވަފެންތަކެވެ. ޕީޕީއެމްއަށް އޮތް ތާއީދާއެކީ، އެޕާޓީއަށް ވެރިކަމަށް އާދެވޭނެ ކަމުގެ އުއްމީދުގައި ޕާޓީގެ ދިދަ ހިފައިގެން މަގުތަކަށް ނިކުމެ ކަރުނަ ގޭހާއި މުގުރުގެ ވޭން ތަހައްމަލް ކޮށްގެން ނަމަވެސް، އެކަމަށްޓަކައި ފާއިތުވީ 5 އަހަރު ގުރުބާންވީ އެތައް ބަޔަކު، ޕާޓީއަށް ވެރިކަމަށް އާދެވި، މިނޫން ދުވަހެއް ފެނާނޭ ކަމުގައި ކުރަމުން އައިސްފައިވާ އުއްމީދުތަކެވެ.

ހަމައެއާއެކު، ފާހަގަވާން އޮތް އަނެއްކަމަކީ، ބޮޑު ޕާޓީއެއްގެ ގޮތުގައި ޕީޕީއެމް އޮވެފައި، ރައީސް ޔާމިނަށް ކުރިމަތި ނުލެވިއްޖެ ހާލަތެއްގައި ޕާޓީގެ ފަރާތުން ވާދަކުރެއްވުމަށް ބައެއް ބޭފުޅުން މިހާރުވެސް ޓިކެޓަށް ފައި ނަންގަވައިގެން ތިއްބެވިކަމެވެ. މިގޮތުން، ކުރީގެ ރައީސް ޑރ. ވަހީދުއާއި، މާލޭ ސިޓީގެ މޭޔަރ ޑރ. މުއިއްޒުގެ އިތުރުން، ނައިފަރު ދާއިރާގެ މެމްބަރު އަހުމަދު ޝިޔާމްއަކީ ޕީޕީއެމްގެ ރިޔާސީ ޓިކެޓަށް މިހާރުވެސް މުޑި ނަންގަވައިގެން، ޓިކެޓްގެ އުއްމީދުގައި ތިއްބެވި ބެފުޅުންކަން އެއީ ޕާޓީގެ ތެރޭގައިވެސް އެންމެން ދަންނަ ބޮޑު ސިއްރެއްގެ ގޮތުގައި އޮތް ކަމެކެކެވެ.

އެހެންކަމުން ހުރިހާ ގޮތަކުން ބެލި ކަމުގައިވި ނަމަވެސް، އިދިކޮޅު ޕީޕީއެމްގެ ރިޔާސީ ކެނޑިޑޭޓަކު ކުރިޔަށް އޮތް ރިޔާސީ އިންތިޚާބަށް ނުނެރުމަކީ އެޕާޓީގެ އެއްވެސް މެމްބަރެއްގެ މަސްލަހަތު އޮވެދާނެ ނިންމުމެއް ނުވަތަ ސިޔާސަތެއް ކަމުގައި ދުށުމަށް އެއްވެސް ޖާގައެއް ނެތެވެ.

އަދި ޕާޓީގެ ރިޔާސީ ކެނޑިޑޭޓު "ނުހައްގުން" ޖަލުގައި އޮވެގެން ނަމަވެސް، ޕާޓީގެ ބައިލައްކައެއްހާ މެމްބަރުންގެ މަސްލަހަތު އެމަގުން ގުރުބާން ކުރެވިގެން ނުވާނޭކަމުގައި، ޚުދު ޕާޓީގެ ލީޑަރޝިޕްގެ ގިނަބަޔަކުވެސް ދަނީ ދެކެމުންނެވެ.

ރައީސް ޔާމިން ޖަލުގައި އޮންނެވީ ނުހައްގުން. އެމަނިކްފާނު ސަލާމަތްކުރުމަށް މުޅި ޕާޓީ އަދިވެސް ކެނޑިނޭޅި މަސައްކަތް ކުރަމުންދަނީވެސް އެ ސަބަބަށްޓަކާ. އެހެންނަމަވެސް، އެއީ ފަހަރެއްގައިވެސް، ޕާޓީގެ އެތައްހާސް މެމްބަރުންގެ އުއްމީދު އެކަމަކަށްޓަކާ ގުރުބާން ކުރާންވީ ސަބަބެއް ނޫން. ރިޔާސީ އިންތިޚާބަށް ކެނޑިޑޭޓަކު ނުނެރުމަކުން ރައީސް ޔާމިނަށްވެސް ލިބެން އޮތް ފައިދާއެއް ނޯންނާނެ.

އިދިކޮޅު ޕީޕީއެމްއިން ކުރިޔަށް އޮތް ރިޔާސީ އިންތިޚާބަށް ކެނޑިޑޭޓަކު ނުނެރެފާނެކަމަށް މޭރުން ކުރަމުން ޕާޓީގެ ލީޑަރޝިޕްގައި ހިމެނޭ ބޭފުޅަކު ވިދާޅުވެފައި ވެއެވެ.

އެހެންނަމަވެސް ފެންނާން އޮތް އެއް ހަގީގަތަކީ، ކުރިޔަށް އޮތް ރިޔާސީ އިންތިޚާބަށް އެހެން ހުރިހާ ޕާޓީތަކުން ކާޑުތައް ކުޅެ، ހިސާބުތައް ޖަހާ، ވެވެން އޮތް ތައްޔާރީއެއް ވަމުންދާއިރު އިދިކޮޅު ޕީޕީއެމް ހަނު އޮތް ކަމެވެ. ރިޔާސީ އިންތިޚާބަށް އަމާޒުކޮށް އުފެއްދުންތެރި އެއްވެސް ތައްޔާރީއެއް އެޕާޓީން ވަމުން ނުދާކަމެވެ.

ފެންނަމުންދަނީ، ޕާޓީގެ ރިޔާސީ ކެނޑިޑޭޓު ޖަލުގައި 11 އަހަރުގެ ޖަލު ހުކުމެއް ތަންފީޒު ކުރަމުންދާއިރު، އަދި މަތިމައްޗަށް އެތައް ދައުވާއެއް އުފުލިފައި ވާއިރުވެސް، ކުރިޔަށް އޮތް ރިޔާސީ އިންތިޚާބުގައި ވާދަކުރެއްވޭނެ ކަމުގެ ހުވަފެން ބައެއް ފަރާތްތަކުން ރައީސް ޔާމިނަށް ދައްވަމުން ގެންދަވާ ތަނެވެ.

ނުވަތަ، ޔާމިނަށް ވާދަ ނުކުރެވިއްޖެ ހާލަތެއްގައި، އެހެން ކެނޑިޑޭޓަކު ޕާޓީން ނިކުމެ ރިޔާސީ އިންތިޚާބު ކާމިޔާބުކޮށް، ޕާޓީ ޖަހައިގަންނާނޭކަމުގެ، ނުރަގަޅު ވަސްވާސް ޔާމިނުގެ ވިސްނުންފުޅުގައި ދައުރުވެ، އެންމެ މީހެއްގެ މުށުތެރޭގައި ބޮޑު ޕާޓީއެއް ހިސޯރުވެފައި އޮތްތަނެވެ.

ކެމްޕޭން ކުރަން ވަގުތު ގެއްލި، ޕާޓީއަށް ގޮތް ހުސްވުމުގެ ކުރިން ގޮތެއް ނިންމާން ޖެހޭ!

ބައެއް ފަރާތްތަކުން ތުހުމަތު ކުރާ ގޮތުގައި ރައީސް ޔާމިނަށް ކުރިމަތު ނުލެވޭ ހާލަތުގައި، ޕީޕީއެމްގެ ކެނޑިޑޭޓެއް ރިޔާސީ އިންތިޚާބުގައި ނުނެރުމަށް އެންމެ ބޮޑަށް މަސައްކަތް ކުރައްވަމުން ގެންދަވަނީ ރައީސް ޔާމިންގެ އިސް ވަކީލެއްގެ ގޮތުގައި ހުންނެވި، ކުރިން ޔާމިންއާއި ދެކޮޅަށް މަސައްކަތް ކުރެއްވި ޑރ. މުހައްމަދު ޖަމީލް އަހުމަދެވެ.

ހަމައެއާއެކު، ޔާމިންއާއި ބައްދަލުކޮށް، ވަކީލެއްގެ ހައިސިއްޔަތުން ދުވަހުން ދުވަހަށް ޔާމިނާއި މުއާމަލާތު ކުރުމުގެ ފުރުސަތު އެންމެ ބޮޑަށް އޮތް ފަރާތަކީވެސް ޑރ. ޖަމީލްކަމަށް ވުމާއެކު، ޔާމީނަށް ކަންކަން ވަކި ގޮތަކަށް ވިސްނައި ދިނުމަށް އޮތް ފުރުސަތު ޖަމީލަށް އިންތިހާއަށް ބޮޑުކޮށް އޮތްކަންވެސް މިފުސަތުގައި ފާހަގަ ކޮށްލާން ޖެހެއެވެ.

ޑރ. ޖަމީލު މަސައްކަތް ކުރައްވަނީ، ރައީސް ޔާމިނަށް ކުރިމަތި ނުލެވޭ ހާލަތުގައި، ޕީޕީއެމްގެ ކެނޑިޑޭޓަކު ނުނެރެ، ގާސިމް އިބުރާހިމަށް ޕީޕީއެގެ ތާއީދު ހޯއްދެވުމަށް. ރައީސް ޔާމިނަށް ވިސްނަވައި ދެއްވަނީ، ޕީޕީއެމްއިން އެހެން ބޭފުޅަކު ވެރިކަމަށް އަތުވެއްޖެނަމަ ޕާޓީގެ ކޮންޓްރޯލް އެމަނިކުފާނަށް ގެއްލޭނެ ކަމަށް.

އިދިކޮޅު ރިޔާސީ ކެނޑިޑޭޓަކާއި ގުޅޭގޮތުން ގޮތެއް ނުނިންމި، ކުރިޔަށް ނުދެވިފައި ޕީޕީއެމް އޮންނަ އޮތުމަށް ރިއާޔަތްކޮށް ލީޑަރޝިޕްގައި ހިމެނޭ ބޭފުޅަކު ވިދާޅުވިއެވެ.

އެހެންނަމަވެސް ފާހަގަ ކޮށްލާންޖެހޭ އެންމެ މުހިންމު އެއް ނުކުތާއަކީ، ޕީޕީއެމްއަކީ ދައުލަތުން ޚަރަދުކުރާ މުވައްސަސާއެއް ކަމެވެ. އަދި އަމުދުން އެޕާޓީއަކީ، ގާސިމް އިބުރާހިމްގެ އަމިއްލަފުޅު ޖީބުން ޚަރަދު ކުރައްވައިގެން ޖުމުހޫރީ ޕާޓީ ހިންގަވަމުންދަވާ ބީދައިން، ރައީސް ޔާމިން އަމިއްލަފުޅަށް އެއްވެސް ޚަރަދެއް ކުރައްވައިގެން ހިންގަމުންދާ ޕާޓީއެއް ނޫންކަންވެސް ފާހަގަ ކޮށްލާން ޖެހެއެވެ.

އެހެންކަމުން، އެންމެ ފަރުދެއްގެ މައްސަލަހަތުގައި ޕާޓީގެ އެތައްހާސް މެމްބަރުންގެ އުއްމީދުތައް ވިއްސިވިހާލި ކުރެވިގެން ނުވާނޭކަން ހަމަ ކޮންމެ މީހަކަށްވެސް ގަބޫލުކުރާން މަޖުބުރުވެއެވެ. ފާއިތުވި 5 އަހަރު މަގުމަތުވެފައިތިބި، ޕާޓީގެ އެތައްހާސް މެމްބަރުން އަނެއް 5 އަހަރު މަގުމަތިވިޔަ ދީގެން ނުވާނެއެވެ.

ވަގުތު ފާއިތުވުމުގެ ކުރިން އިދިކޮޅު ޕީޕީއެމްއިން ރިޔާސީ ކެނޑިޑޭޓަކު ދެއްކުމަކީ މިއަދު އެޕާޓީގެ ލީޑަރޝިޕަށް އޮތް ގާނޫނީ ވާޖިބަކަށް ވެގެންގޮސްފައިވާކަމީ ކަށަވަރުވެ ޔަގީންވާން އޮތް ކަމެކެވެ.