ރައީސުލްޖުމްހޫރިއްޔާގެ މެޑަލް ދެވެންވާނީވެސް އަދި އަތުލެވެން ވާނީވެސް ބަލަންވާވަރަށް ބެލުމަށްފަހުގައި ކަމަށް ކުރީގެ ކަމިޝަނާ އޮފް ޕޮލިސް ރިޔާޒު ވިދާޅުވެއްޖެއެވެ.

ރިޔާޒު މިހެން ވިދާޅުުވީ ފުލުހުންގެ ވަޒީފާ އިން ވަކި ކުރަން ޕޮލިސް ބޯޑުން ލަފާ ދީފައިވާ ޗީފް ސުޕްރިންޓެންޑެންޓް މުހައްމަދު ދާއޫދަށް ރައީސުލްޖުމްހޫރިއްޔާގެ ޝަރަފުގެ މެޑަލް ދެއްވި މައްސަލައެއް އެ ބޯޑުން ބަލަން ފަށުމާއި ގުޅިގެން އެކަމަށް ފާޑުކިޔައި ކުރެއްވި ޓުވީޓެއްގައެވެ.

ރިޔާޒު ވިދާޅުވީ އެއްވެސް ފިކުރެއް ވިސްނުމެއް ނެތި ކަންކަން ކުރަމުންދާކަމީ މިއަދު ފެންނަ މަންޒަރުކަމަށެވެ. ރައީސުލްޖުމްހޫރިއްޔާ ދެއްވާ މެޑަލްތަކަކީ ވަކި އުސޫލަކުން ދެވޭ އެއްޗަކަށްވާއިރު އުސޫލުން ބޭރުން އެއްވެސް ހަމައެއްނެތި މިކަން ކުރުމަކީ ވަރަށް ޒިންމާދާރުކަން ކުޑަ ކަމެއްކަމަށް ރިޔާޒު ވިދާޅުވިއެވެ.

ރައީސުލްޖުމްހޫރިއްޔާގެ މެޑަލް ދެވެންވާނީވެސް އަދި އަތުލެވެން ވާނީވެސް ބަލަންވާވަރަށް ބެލުމަށްފަހު! ވިސްނުމެއް، ރޭވުމެއް އަދި ހިންގުންތެރި ކަމެއްނެތް ބަޔަކު ވެރިކަމުގަ ތިބެގެން ކަންކުރާގޮތައް ކަންތައްތައް ކުރާމަންޒަރު މިއަދު މިފެންނަނީ.

– ރިޔާޒު ވިދާޅުވިއެވެ.

ޕޮލިސް ބޯޑުގެ ރައީސް އަދި ކުރީގެ ޕޮލިސް ކޮމިޝަނަރު އަހުމަދު ފަސީހު ވިދާޅުވީ ވަޒީފާ އިން ވަކި ކުރަން ލަފާ ދީފައިވާ ފުލުހަކަށް ރައީސްގެ ޝަރަފުގެ މެޑަލް ދޭން ޖެހުނީ ކީއްވެތޯ ބަލަމުން އަންނަ ކަމަށެވެ. އެ މެޑަލް އޭނާ އަށް ދޭން ނިންމީ ކޮން ގޮތަކަށް ބަލާފައިތޯ ހޯދަން ޕޮލިސް ކޮމިޝަނަރަށް ދަންނަވާފައިވާ ކަމަށް އޭނާ ވިދާޅުވިއެވެ.

ފުލުހުންގެ ވަޒީފާ އިން ވަކި ކުރަން ބޯޑުން ލަފާ ދީފައިވާ ބޭފުޅުންގެ ތެރޭގައި ދާއޫދުގެ އިތުރުން އެސިސްޓަންޓް ކޮމިޝަނާ އަހުމަދު މުހައްމަދާއި އެސިސްޓަންޓް ކޮމިޝަނާ ފަރުހާދު ފިކުރީ އާއި އެސިސްޓެންޓް ކޮމިޝަނާ މުހައްމަދު ޖަމްޝީދާއި ޗީފް ސުޕްރިންޓެންޑެންޓް ޝަރީފް އާއި ޗީފް ސުޕްރިންޓެންޑެންޓް އަހުމަދު ޝުހާދު އަދި ސުޕްރިންޓެންޑެންޓް އިސްމާއިލް ޝަމީމެވެ. އެ ބޭފުޅުން ވަކި ކުރުުމުގެ މައްސަލަ އަދިވެސް އޮތީ ކޯޓުގައެވެ.