ރާއްޖޭގެ ޤައުމީ ޓީމުގެ ގޯލްކީއްޕަރުގެ މަޤާމާއި، ފުރަތަމަ ޑިވިޝަންގެ އެކި ކްލަބްތަކުގައި ގޯލްކީއްޕަރުކަން ކުރި އަސްލަމްއާއިއެކު ޖުމްހޫރީ ޕާޓީއާއި ޒުވާނުންތަކެއް ގުޅިއްޖެއެވެ.
މިބޭފުޅުންގެ ފޯމުތަކާއި ހަވާލުވީ ޖުމްހޫރީ ޕާޓީގެ ލީޑަރު ޤާސިމް އިބްރާހިމްއެވެ. ޖުމްހޫރީ ޕާޓީން ރިޔާސީ އިންތިޚާބުގައި ވާދަކުރާއިރު، އެޕާޓީން ދަނީ އިންތިޚާބު ކާމިޔާބު ކުރުމަށް ގިނަ މަސައްކަތްތަކެއް ކުރަމުންނެވެ.
ޖުމްހޫރީ ޕާޓީގެ ތަރުޖަމާނު އަލީ ޞާލިހު ވިދާޅުވީ ޖުމްހޫރީ ޕާޓީއާއި މިއަދު އަލަށް ގުޅިވަޑައިގެންނެވި ޒުވާނުންނަށް ޕާޓީގެ ލީޑަރު އޮނަރަބަލް ޤާސިމް އިބްރާހީމާއި ޕާޓީގެ ލީޑަރޝިޕުގެ ނަމުގައި މަރުޙަބާ އާއި ތަޙްނިޔާ ދަންނަވާކަމަށެވެ. އެޕާޓީއަކީ ހުރިހާފަންތިއަކާއި ގިންތިއަކަށް ވެސް ފުރުޞަތު އޮންނާނެ ޕާޓީއެއްކަމަށް އޭނާ ވިދާޅުވިއެވެ.
ޖުމްހޫރީ ޕާޓީއާއި މިއަދު އަލަށް ގުޅިވަޑައިގެންނެވި ޒުވާނުންނަށް ޕާޓީގެ ލީޑަރު އޮނަރަބަލް ޤާސިމް އިބްރާހީމާއި @qasimibrahim ޕާޓީގެ ލީޑަރޝިޕުގެ ނަމުގައި މަރުޙަބާ އާއި ތަޙްނިޔާ ދަންނަވަމެވެ. މި ޕާޓީއަކީ ހުރިހާފަންތިއަކާއި ގިންތިއަކަށް ވެސް ފުރުޞަތު އޮންނާނެ ޕާޓީއެކެވެ. pic.twitter.com/igR6TgEBpk
— ali solih (@alisolih) May 7, 2023
ޖޭޕީން އަންނަ ރިޔާސީ އިންތިހާބުގެ ރޭހަށް ނުކުންނަ އިރު، އެ ޕާޓީއާއެކު ކޯލިޝަން ހެދުމާ މެދު މިހާތަނަށް ރަސްމީކޮށް އެއްބަސްވެވިފައި ވަނީ ނަޝީދުގެ ފަޅިން އެކަންޏެވެ.
ޖޭޕީއާ އެކުގައި ކޯލިޝަން ހެދުމަށް ސިޔާސީ ބައެއް ޕާޓީތަކަށް ދައުވަތު ދެއްވި ނަމަވެސް، ގިނަ ޕާޓީތަކުން ވަނީ އިންތިހާބުގެ ފުރަތަމަ ބުރުގައި ޖޭޕީގެ ފަހަތަށް ނާރާނެ ކަމަށް ބުނެފައެވެ. ކުރީގެ ރައީސް މައުމޫން އަބްދުލްގައްޔޫމްގެ އެމްއާރުއެމް އިން މިކަމުގައި އަދި ވަކި ގޮތެއް ނިންމާފައެއް ނުވެއެވެ.
މިފަހަރުގެ ރިޔާސީ އިންތިހާބުގައި ވާދަކުރައްވާނެ ކަން މިހާތަނަށް އިއުލާން ކުރައްވާފައި ވަނީ ގާސިމްގެ އިތުރުން ރައީސް އިބްރާހިމް މުހައްމަދު ސޯލިހާއި، ޕީޕީއެމްއިން ރައީސް ޔާމީނާއި އެމްއެންޕީގެ ރައީސް މުހައްމަދު ނާޒިމާއި ކުރީގެ ހޯމް މިނިސްޓަރު އުމަރު ނަސީރާއި ކުރީގެ ބަންޑާރަ ނައިބު ޑރ. މުހައްމަދު މުނައްވަރާއި އެލްޖީއޭގެ ކުރީގެ ނައިބު ރައީސް ޝުޖާއު ހުސެއިނެވެ.
ޖޭޕީގެ ލީޑަޝިޕްގެ ބޭފުޅުން އެއްބަސްވެވަޑައިގަންނަވާ ގޮތުގައި މިފަހަރު ރިޔާސީ އިންތިހާބު ކާމިޔާބު ކުރުމަށް އެންމެ ފަހި ފުރުސަތެއް އޮތީ ގާސިމަށެވެ.
