އެމްޑީޕީގެ ރައީސް މުހައްމަދު ނަޝީދުގެ ސެކިއުރިޓީ ބަލަހައްޓަން ހިނގާ ޚަރަދު ދައުލަތުގެ ބާކީ ތިބި ހުރިހާ ވެރިންނަށް ވުރެ ބޮޑު ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވީ ރައީސް ނަޝީދު މަރާލަން ދިން ބޮމުގެ ހަމަލާއަށް 2 އަހަރު ފުރުމާއި ގުޅިގެން ރައީސް ނަޝީދަށް ތާއީދު ކުރާ މަޖިލިސް މެމްބަރުންނާއި ފިކުރެއްގެ ދިރުމަށް ނިސްބަތްވާ ބޭފުޅުން ދައްކަވަމުންދާ ވާހަތަކަށް ރައްދު ދެއްވައި ކުރެއްވި ޓުވީޓުގައެވެ. މޭ 6، 2021 ވަނަ ދުވަހުގެ ރޭ 8:27 ހާއިރު ގ. ކެނެރީގެ އިން ނަޝީދު ބޮޑީގާޑުންނާ އެކު ނުކުމެވަޑައިގެން ކާރުކޮޅާ ދިމާއަށް ވަޑައިގަންނަވަނިކޮށް ދިން ބޮމުގެ ހަމަލާއި އެމަނިކުފާނަށް ވަނީ ބޮޑެތި ޒަޚަމްތަކެއް ލިބިފައެވެ. އޭޑީކޭގައި ފަރުވާ ހޯއްދެވުމަށްފަހު ނަޝީދު ވަނީ ޖަރުމަނާއި، އިނގިރޭސި ވިލާތުގައިވެސް ފަރުވާ ހޯއްދަވާފައެވެ.

މިހަމަލާއާއި ގުޅިގެން ދެކެވޭ ވާހަކަތަކަށް އިޝާރާތް ކުރައްވައި ޝަރީފް ވިދާޅުވީ މުޅި ދައުލަތުގެ ހުރިހާ ވެރިންނަށް ދެމުންދާ ސެކިުރިޓީއާއި ނުބައްދަލު ސެކިއުރިޓީއެއް ނަޝީދަށް ދެމުންދާކަމަށެވެ. އަދި މިމައްސަލާގައި ތުހުމަތު ކުރެވޭ އެންމެން ހައްޔަރުކޮށް ޝަރީއަތް ހިންގަމުންދާއިރުވެސް މިކަމަށް އިންސާފު ހޯދަން މަސައްކަތް ނުކުރާކަމަށް ވާހަކަ ދައްކަވަނީ އެހެން މަގުސަދެއްގައި ކަމަށް ޝަރީފް ވިދާޅުވިއެވެ.

މުހައްމަދު ނަޝީދުގެ ސެކިއުރިޓީ ބަލަހައްޓަން ހިންގާ ޚަރަދު ދައުލަތުގެ ބާކީ ތިބި ހުރިހާ ވެރިންނަށް ވުރެ ބޮޑު. އެކަމަކު ސެކިއުރިޓީދޭ ކަމަކަށްނުވޭ. ފުލުހުންގެ ހުރިހާ ވަސީލަތެއް ބޭނުންކޮށްގެން ތަހުގީގުކޮށް، ތުހުމަތު ކުރެވޭ މީހުންގެ ޝަރީއަތް ހިންގުމުން ދަނީ އިންސާފު ލިބޭ ކަމަކަށް ނުވޭ.

– ޝަރީފް ވިދާޅުވިއެވެ.

ޝަރީފް ވިދާޅުވީ މަޖިލީހުގެ މަތިވެރި ދާއިރާގެ މެމްބަރަށް ދާދިފަހުން ދިން ހަމަލާއާއި ގުޅިގެން ސެކިއުރިޓީއަށް އެދުމުންވެސް މަޖިލީހުން އެކަން ހަމަޖައްސައި ނުދިންކަމަށެވެ. ނަމަވެސް ނަޝީދަށް ދައުލަތުން ބޮޑު ހޭދައެއް ކުރަމުންދާއިރު އެއީ މައްސަލައެއް ނޫންކަމަށް ވިދާޅުވެ ޝަރީފް ވަނީ ފާޑު ވިދާޅުވެފައެވެ.

ސެކިއުރިޓީ އަށް 52 މިލިއަން ޚަރަދު ކޮށްގެން ކުރިޔަށް ގެންދާއިރު އެވަރުވެސް ހިންހަމަ ނުޖެހެންޏާ މުޅި ދައުލަތުގެ ބަޖެޓް ހުސްކޮށް ޚަރަދު ކުރިޔަސް ހިތެއް ހަމައެއް ނުޖެހޭނެ. ހަސަން ކުރުސީ ކުރެއްވި ޓުވީޓަކާއި ގުޅިގެން މެމްބަރު ޒަރީރަށް މަރުގެ ހަމަލާއެއް ދިނީމާވެސް މަޖިލިސް އިން އެއްވެސް ސެކިއުރިޓީ އަށް ނުދިން.

– ޝަރީފް ވިދާޅުވިއެވެ.

މިހާތަނަށް އެ މައްސަލާގައި ހުކުމެއް އައިސްފައި ވަނީ އެންމެ މީހެއްގެ މައްޗަށެވެ. އެއީ ބޮމުގެ ހަމަލާ ދިނުމުގައި އަމަލީ ގޮތުން ބައިވެރިވި އަހުމަދު އަދުހަމްގެ މައްޗަށެވެ. އޭނާގެ މައްޗށް އައިސްފައި ވަނީ 23 އަހަރުގެ ޖަލު ހުކުމެކެވެ.

އެހެން މީސްމީހުންގެ ޝަރީއަތް ކްރިމިނަލް ކޯޓުގައި މިހާރު ކުރިއަށް ގެންދާއިރު، މިދިޔަ އޭޕްރީލް 19 ގައި ބޭއްވި ޝަރީއަތުގައި، އެ މައްސަލަ ބައްލަވާ ގާޒީ ސޮފްވަތު ހަބީބް ވިދާޅުވީ، އަޑުއެހުންތައް ބާއްވާނެ ގޮތުގެ ތާވަލެއް އެކުލަވާލުމަށް ފަހު ދެ ފަރާތާ ހިއްސާ ކޮށްފައިވާނެ ކަމަށެވެ. އެ ތާވަލް އޮތް ގޮތުން އަންނަ އޮގަސްޓް މަހުގެ 31 ވަނަ ދުވަހު ނިންމޭނެ ކަމަށް ގާޒީ ވިދާޅުވިއެވެ.

އެ މައްސަލައިގެ ތަހުގީގަށް ރައީސް އިބްރާހިމް މުހައްމަދު ސޯލިހު އައްޔަން ކުރެއްވި މަންދޫބު، އިނގިރޭސި ވިލާތުގެ އައްބާސް ފާއިޒް ވެސް ވަރަށް ފަހުން ވިދާޅުވެފައި ވަނީ ޓެރަރިސްޓް ހަމަލާގެ ބައިވެރިންގެ މައްޗަށް ހިންގާ ޝަރީއަތް ލަސްވާ ކަމަށް އިދާރާތަކުން ބުނާ ސަބަބު ބަލައި ނުގަނެވޭ ކަމަށެވެ.

"މި މައްސަލައިގެ ޝަރީއަތް ލަސްވާން ޖެހޭ ކަމަށް ގަބޫލުކުރެވޭ ސަބަބުތަކެއް ރާއްޖޭގެ ޝަރުއީ އިދާރާތަކަށް ދެއްކިފައެއް ނެތް," ކްރިމިނަލް ކޯޓުގެ ރަޖިސްޓްރާ ހުސައިން ރަޝީދާ މި އަހަރުގެ މާޗު މަހު ބައްދަލު ކުރެއްވުމަށް ފަހު އައްބާސް ވިދާޅުވިއެވެ.