ފުވައްމުލަކު ސްކޫލްގެ ބާނީ އަދި އެސްކޫލްގެ ކުރީގެ ނާޒިރު ފުވައްމުލަކު ދޫޑިގަން، ލައިޓް ޢަބްދުލްޙަމީދު ޢަލީދީދީ ނިޔާވެއްޖެއެވެ.
ޢަބްދުލްޙަމީދު ޢަލީދީދީ ވަނީ ފުވައްމުލަކު ދަރިވަރުންނަށް ތަޢުލީމް ދެއްވުމަށް އަގުހުރި މަސައްކަތްތަކެއް ކޮށްދެއްވައިފައެވެ. އެގޮތުން ފުވައްމުލަކުގައި އަމިއްލައަށް ސްކޫލެއް ބިނާކުރައްވައި "މަކުތަބުއްނޫރާނިއްޔާ"ގެ ނަމުގައި 1969ވަނަ އަހަރު ސްކޫލެއް ރަޖިސްޓްރީ ކުރެއްވިއެވެ. އޭގެ ފަހުން ސްކޫލްގެ ނަން "ފުވައްމުލަކު މަކުތަބު"ގެ ނަމަށް ބަދަލުކުރެއްވިއެވެ.
އޭގެ ފަހުން ސްކޫލަށް އައި ޢުމްރާނީ ތަރައްޤީއާއެކު 1989ވަނަ އަހަރު އެސްކޫލްގެ ނަން "ފުވައްމުލަކު ސްކޫލް"ގެ ބަދަލުކުރައްވައި 1992 ވަނަ އަހަރު ޕްރައިމަރީ ފެންވަރަށް ހިންގާ ސަރުކާރުގެ ސްކޫލެއްގެ ގޮތުގައި ހަމަޖެހިގެން ދިއުމާ ހަމައަށްވެސް ޢަބްދުލްޙަމީދު ޢަލީދީދީ ވަނީ ރައްޔިތުންގެ ސްކޫލެއްގެ ގޮތުގައި އަމިއްލައަށް ހުރިހާ ކަމެއް ކުރައްވައިގެން އެސްކޫލް ހިންގަވައިފައެވެ.
ޢަބްދުލްޙަމީދު ޢަލީދީދީ ފުވައްމުލަކު ތަޢުލީމަށް އަގުނުކުރެވޭ ފަދަ ޚިދުމަތްތަކެއް ކުރެއްވި ބޭފުޅެއް ކަމަށް ނައިބު ރައީސް ފައިޞަލް ނަސީމް ވެސް ވަނީ ވިދާޅުވެފައެވެ. ނާއިބު ރައީސް ކުރެއްވި ޓުވިޓެއްގައި ވަނީ ޢަބްދުލްޙަމީދު ޢަލީދީދީ ފުރާނަފުޅަށް ސުވަރުގޭގެ ދާއިމީ ނިޢުމަތް މިންވަރު ކުރައްވައި ޢާއިލާއަށް ކެތްތެރިކަން މިންވަރު ކުރެއްވުން އެދި ދުޢާކުރައްވައިފައެވެ.
ފުވައްމުލަކު ސްކޫލްގެ ބާނީ، އަޅުގަނޑުގެ އުސްތާޛް އަދި އަޚް އަބްދުލް ހަމީދު އަލި ދީދީއަކީ ރަށުގެ ތަޢުލީމަށް އަގުނުކުރެވޭ ފަދަ ހިދުމަތްތަކެއް ކުރެއްވި ބޭފުޅެއް،ހަމީދު ބޭބޭގެ ފުރާނަފުޅަށް ސުވަރުގޭގެ ދާއިމީ ނިޢުމަތް މިންވަރު ކުރައްވައި އާއިލާއަށް ކެތްތެރިކަން މިންވަރު ކުރައްވާށި امين
— Faisal Naseem (@FaisalNasym) May 6, 2023
ޢަބްދުލްޙަމީދު ޢަލީދީދީ ނިޔާވުމާ ގުޅިގެން މިނިސްޓްރީ އޮފް އެޑިއުކޭޝަނުން ވަނީ ތަޢުޒިޔާގެ މެސެޖެއް ފޮނުއްވާފައެވެ. މިމެސެޖްގައި ޢަބްދުލްޙަމީދު ޢަލީދީދީ ނިޔާވުމަކީ ފުވައްމުލަކަށާއި މުޅި ތަޢުލީމީ ޢާއިލާއަށް ލިބުނު ފުން ހިތާމައެއް ކަމަށް ބަޔާންކުރައްވައިފައިވެއެވެ. އަދި މިފުން ހިތާމައިގައި މިނިސްޓަރ އޮފް އެޑިއުކޭޝަނާއި އެމިނިސްޓްރީގެ ވެރިންނާއި މުވައްޒަފުންގެ ނަމުގައި ޢަބްދުލްޙަމީދު އަލީދީދީ ޢާއިލާއަށް ތަޢުޒިޔާ ފޮނުއްވާފައިވެއެވެ.
