ރާއްޖޭގައި ރުއް އާލާކުރުމަށް ހިންގާ ޤައުމީ ޕްރޮގްރާމް "ރުކުގެ އާ ޖީލެއް" މިއަދު އިފްތިތާޙުކޮށްފިއެވެ.
މި ޕްރޮގްރާމް އިފްތިތާޙުކޮށްފައިވަނީ ހދ.ވައިކަރަދޫގައެވެ. މި ޕްރޮގްރާމާ ބެހޭގޮތުން އެގްރިކަލްޗަރ މިނިސްޓަރ ޑރ.ޙުސައިން ރަޝީދު ޙަސަން ވިދާޅުވީ، ރާއްޖޭގައި ރުކުގެއާޖީލެއް ބިނާކުރުމަށް ސަރުކާރުން ހިންގާ ރުއް އާލާކުރުމުގެ ޤައުމީ ޕްރޮގްރާމް މިއަދު ހެނދުނު، ހދ. ވައިކަރަދޫގައި އިފްތިތާޙު ކުރުމަކީ ލިބުނު ވަރަށް ބޮޑު އުފަލެއްކަމަށެވެ.
މޯލްޑިވްސް ގްރީން ފަންޑުގެ މާލީއެހީގައި މިހާރުވަނީ، 3-4 އަހަރުތެރޭ ފޯދޭ، ކުރު ރުކުގެ (ޑްވާފް ކޮކޮނަޓް ގެ) ދެވައްތަރެއްގެ (ފެއްސާއި އޮރެންޖު ކުލައިގެ މަތިވަރު ލިބޭ) 5000 ރުއް ބޭރުން ހޯދާ ރާއްޖެ ގެނެސްފައިކަމަށް މިނިސްޓަރ ވިދާޅުވިއެވެ.
މިރުއްތައް، ހަނިމާދޫ އެގްރިކަލްޗަރ ސެންޓަރުގައި ބަހައްޓައިގެން ކަރަންޓީނުކޮށް ބަލިނެތްކަން ކަށަވަރުކޮށްފައިވެއެވެ. މިރުއަދަށް އިންދައި ރުވަން މިފެށީ، ހުޅަނގު މޫސުމުގެ ވާރޭ ވެހެންފެށުމާއެކޖުއެވެ.
"އަޅުގަނޑު ތިލަދުން މައްޗަށް މިކުރާ ދަތުރުގައި، ވައިކަރަދޫގެ އިތުރުން ނޭކުރެންދޫ، އުތީމު އަދި ހޯރަފުށީގައި ރުއް އިންދުމަށްވެސް ވަނީ ހަމަޖެހިފައެވެ. ކައުންސިލުތަކަށް ރުއްގަނޑު އަޅާ ދިނުމަށް ބިންހޯދުމަށް މިނިސްޓްރީެިން ހުށައެޅުމުން، ރަށުގެ ލޭންޑްޔޫޒް ޕްލޭނަށް ބިނާކޮށް ރުއްއިންދުމަށް ޖާގަ ދެއްވި ހުރިހާ ކައުންސިލަކަށް ހިލޭ ރުއް ހަދިޔާ ކުރުމަށް މިހާރު ވަނީ ނިންމާފައެވެ." މިނިސްޓަރ ވިދާޅުވެފައިވެއެވެ.
މިނިސްޓަރ ވިދާޅުވީ ރުއް ހޯދުމަށް ބޭނުންވާ އެހެން ކައުންސިލްތަކުންވެސް، ރަށުގެ ލޭންޑް ޔޫޒް ޕްލޭނުގައި ރުއް އެޅުމަށް ލިބެންއޮތް ބިމުގެ ބޮޑުމިނާއި ސަރަހައްދު އެނގޭގޮތަށް އެގްރިކަލްޗަރ މިނިސްޓްރީއަށް ހުށައެޅުއްވުމުން، ރުއްލިބެންހުރި ނިސްބަތަކުން، އެރަށްރަށަށްވެސް ރުއް ހަދިޔާކުރުމަށް ވަނީ ހަމަޖެހިފައިކަމަށެވެ. ރުއް މިއިންދަނީ ކޮންމެ ދެރުކެއް ދޭތެރޭ 20 ފޫޓު ހުނަގޮތަށް ތަރުތީބުންކަމަށްވެސް މިނިސްޓަރ ވިދާޅުވިއެވެ.
ދާދިފަހުން ރާއްޖޭގެ ގިނަ ރަށްރަށުގެ ރުއްތަކަށް ބައްޔެއްޖެހި އެކަމުގެ ކަންބޮޑުވުން ރަށްރަށުން ވަނީ ފާޅުކޮށްފައެވެ. އަދި ރާއްޖެއަށް ކާށި ލިބުމުގައި ދަތިތަކާ ކުރިމަތިވެ، ބޭރުން ގިނަ ޢަދަދެއްގެ ކާށި އެތެރެކޮށްފައިވެއެވެ.
