އިނގިރޭސި ޕްރިމިއާ ލީގުގައި ރޭ ފަހު ވަގުތު ބްރައިޓަން އިން 1-0 އިން މެންޗެސްޓާ ޔުނައިޓެޑް ބަލިކޮށްފިއެވެ.
ބްރައިޓަންގެ ދަނޑުގައި ރޭ ކުޅުނު މެޗު ފަށައިގެން ޔުނައިޓެޑުން އައީ ބޯޅަ ހިފެހެއްޓުމުގެ ބަދަލުގައި އެޓޭކްކުރެވޭތޯ މަސައްކަތް ކުރަމުންނެވެ. ފުރަތަމަ ހާފުގައި އެންތޮނީ މާޝިއަލް ފޮނުވާލި ހަމަލާތައް ދިފާއުކުރީ މި މެޗުގައި މޮޅު ކުޅުމެއް ދެއްކި ބްރައިޓަންގެ ތަޖުރިބާކާރު ގޯލްކީޕަރު ޖޭސަން ސްޓީލްއެވެ.
ދެވަނަ ހާފް ފެށިގެން ބްރައިޓަން އިން އެޓީމުގެ ކުޅުން ވަރަށް ބޮޑަށް ރަނގަޅުކުރިއެވެ. މިގޮތުން މުޅި ޓީމު ކުރިޔަށް ޖެހި ގިނަ އެޓޭކްތަކެއް ބްރައިޓަންގެ ގޯލަށް ޔުނައިޓެޑުން ވަނީ ފޮނުވާލާފައެވެ. ނަމަވެސް ބްރައިޓަންގެ ކީޕަރު ވަނީ ހަމަލާތައް ދިފާއުކޮށްފައެވެ.އޭގެ ފަހުން ޔުނައިޓެޑުން ހާފުގައި ރަނގަޅު ކައުންޓާ އެޓޭކްތަކެއް އުފައްދާ ބްރައިޓަންގެ ގޯލަށް ނުރައްކާ ކުރަން މަސައްކަތްކޮށްފައި ވެއެވެ.
މި މެޗުގައި ފެނިގެންދިޔަ ހަމައެކަނި ގޯލު ބްރައިޓަން އިން ކާމިޔާބު ކުރީ މެޗުގެ ފަހު ވަގުތުކޮޅުތެރޭ ލިބުނު ޕެނަލްޓީއަކުންނެވެ. ޔުނައިޓެޑްގެ ޑިފެންޑަރު ލޫކް ޝޯގެ އަތުގައި ބޯޅަ ޖެހުމުން ލިބުނު ޕެނަލްޓީ ކާމިޔާބުކޮށްދީ ބްރައިޓަން އަށް ތިން ޕޮއިންޓް މި މެޗުން ހޯދައިދިނީ އެލެކްސިސް މެކަލިސްޓާ އެވެ. މިއާއެކުވެސް ޔުނައިޓެޑުން ފުލުފުލުގައި އެޓޭކް ކުރި ނަމަވެސް، ބްރައިޓަންއިން ވަނީ ޔުނައިޓެޑް ހިފަހައްޓާފައެވެ. މި މޮޅާއެކު އަންނަ ސީޒަނުގެ ޔޫރޮޕާ ލީގަށް ކޮލިފައިވުމަށް ބްރައިޓަން އިން ކުރަމުން އަންނަ އުއްމީދުތައް ވަނީ އިތުރަށް ވަރުގަދަ ވެފައެވެ.
ގަދަ ހަތަރެއްގެ ފަހު ދެ ޖާގަ އަށް ވާދަކުރާ ކްލަބްތަކުގެ ތެރޭގައި ބްރައިޓަން އާއި ޔުނައިޓެޑް ހިމެނެއެވެ. ތިން ވަނައިގައި އޮތް ނިއުކާސަލް ޔުނައިޓެޑަށް 33 މެޗުން 65 ޕޮއިންޓް ލިބިފައިވާއިރު، ހަތަރެއްގައި އޮތް ޔުނައިޓެޑަށް ވަނީ 33 މެޗުން 63 ޕޮއިންޓް ލިބިފަ އެވެ. ފަސް ވަނައިގައި އޮތް ލިވަޕޫލަށް 34 މެޗުން 59 ޕޮއިންޓް ލިބިފައިވާއިރު، ހަ ވަނަ އަށް ޖެހިލި ބްރައިޓަން އަށް ވަނީ 32 މެޗުން 55 ޕޮއިންޓް ލިބިފައެވެ.
