ރާއްޖޭގެ ރުއްތަކަށް ނުރައްކާތެރި ބައްޔެއް ޖެހި، ކާށި ލިބުން ދަތިވާތީ އެކަމަށް ހައްލެއް ހޯދަން ރާއްޖެއަށް ގެނައި ރުއްތައް އަންނަ ހަފްތާގައި ރަށްރަށަށް ބަހަން ފަށާނެ ކަމަށް އެގްރިކަލްޗާ މިނިސްޓްރީން ބުނެފި އެވެ.
ރާއްޖޭގައި އިންދުމަށް އިންޑިއާގެ ކެރެލާއިން ވަނީ 5،000 ރުއް ގެނެސްފައެވެ.
އެގްރިކަލްޗާ މިނިސްޓްރީއިން މަޢުލޫމާތުދޭ ގޮތުގައި ފުރަތަމަ ބުރުގައި ގެނައި ރުއްތައް ބަހަން ނިންމާފައި ވަނީ 11 ރަށަކަށެވެ. އެ ރަށްތަކަށް، އަންނަ ހަފްތާގެ ތެރޭގައި ރުއްތައް ފޮނުވަން ފަށާނެ ކަމަށް ވެސް އޭނާ ވިދާޅުވި އެވެ.
ރުއްތައް ފޮނުވުމަށް ހަމަޖެހިފައިވާ 11 ރަށަކީ، މ. މުލި، ހއ. އުތީމު، ހދ ނޭކުރެންދޫ، ރ. ހުޅުދުއްފާރު، ނ. ވެލިދޫ، ހދ. ވައިކަރަދޫ، ރ. ފައިނު، އދ. ދަނގެތި، ނ. މަނަދޫ، ނ. ކެނދިކުޅުދޫ އަދި އއ. ތޮއްޑޫ އެވެ.
ރާއްޖޭގެ ރުއްތަކަށް ޖެހިފައިވާ ބަލިތަކަށް ހައްލެއް ހޯދަން ބޭއްވި މަޝްވަރާ ބައްދަލުވުމެއްގައި އެގްރިކަލްޗާ މިނިސްޓަރު ޑރ. ހުސައިން ރަޝީދު ވިދާޅުވީ ރުއް އާލާ ކުރުމުގެ ޕްރޮގްރާމެއް މި ސަރުކާރުން ރާވާފައިވާ ކަމަށެވެ.
މި ރުއްތައް މި ވަގުތު ހުރީ މިނިސްޓްރީގެ ބެލުމުގެ ދަށުގައި ހދ. ހަނިމާދޫގަ އެވެ. ރުއްތައް ބަހަން ފެށުމުގެ ކުރިން އެއްވެސް ބައްޔެއް ހުރިތޯ ބަލާނެ ކަމަށް މިނިސްޓްރީން ބުނެފައިވެއެވެ.
