ޖަލުގައި ތިބި ޤައިދީންގެ ތެރެއިން މިހާތަނަށް އެންމެ ގިނަ ޚިދުމަތްދެވުނު އެއްބޭފުޅަކީ ވ. އާރަށުގެ މައްސަލައިގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީގެ ރައީސް ޔާމީންކަމަށް ހޯމް މިނިސްޓަރ އިމްރާން ވިދާޅުވެއްޖެއެވެ.
މިނިސްޓަރ އިމްރާން މިހެން ވިދާޅުވީ ރައީސް ޔާމީން ހުންނެވި ކޮޓަރީގައި ކެމެރާ ހަރުކޮށް މިނިސްޓަރ އިމްރާން މޮނީޓާ ކުރައްވާކަށް އިދިކޮޅު ފަރާތްތަކުން ކުރެއްވި ތުހުމަތުތަކާއި ގުޅިންނެވެ. އަދި ރައީސް ޔާމީނާއި ގުޅޭގޮތުން މިނިސްޓަރ އިމްރާންގެ ބަސްމަގު ހުންނަވާ ގޮތުންވެސް އިދިކޮޅު ފަރާތްތަކުން ވަނީ ރައީސް ޔާމީންގެ ސަލާމަތާއި ގުޅޭގޮތުންވެސް ސުވާލު އުފައްދަވާފައެވެ.
އިދިކޮޅު ޕީޕީއެމް-ޕީއެންސީ ކޯލިޝަންގެ ލީޑަޝިޕުން ރޭ ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް އަބްދުﷲ (އަދުރޭ) ވަނީ ޔާމީން ޖަލުގައި ހުންނަވާ ކޮޓަރީގެ ފާހަނާގައިވެސް ކެމެރާ ހަރުކޮށްފައިވާ ކަމަށް ތުހުމަތު ކުރައްވާފަ އެވެ.
އިދިކޮޅު ފަރާތްތަކުން ދެއްކެވި ވާހަކަތަކާއި ގުޅިގެން މިނިސްޓަރ އިމްރާން ކުރެއްވި ޓުވީޓެއްގައި ވިދާޅުވީ ރައީސް ޔާމީންނަކީ ޖަލުގަިއ ތިބި ޤައިދީގެން ތެރެއިން މިހާތަނަށް އެންމެ ގިނަ ޚިދުމަތްތަކެއް ދެވުނު އެއްބޭފުޅާކަމަށެވެ. ދެފަހަރެއްގެ މަތީން ޖަލުގައި ހުކުމް ތަންފީޒު ކުރައްވަމުންދާއިރު، ރައީސް ޔާމީންގެ ސަލާމަތާއި ރައްކާތެރިކަމަށް ގިނަ ޚިދުމަތްތަކެއް ކަރެކްޝަންގެ އޮފިސަރުން ދެއްވާފައިވާކަމަށް މިނިސްޓަރ އިމްރާން ވިދާޅުވިއެވެ.
އަދި ހޯމް މިނިސްޓަރގެ ހައިސިއްޔަތުންވެސް، ޢާންމު ފަރުރެއްގެ ހައިސިއްޔަތުންވެސް ރައީސް ޔާމީންގެ އިންސާނީ ހައްޤަށް އުނިކަން އަންނާނެއެއްވެސް ކަމެއް ކުރުމަކީ ޟަމީރުވެސް ޤަބޫލު ކުރައްވާ ކަމެއް ނޫންކަމަށް މިނިސްޓަރ އިމްރާން ވިދާޅުވިއެވެ.
ރައީސް ޔާމީންގެ އިންސާނީ ހައްގާއި، ކަރާމަތަށް އުނިކަމެއް ލިބޭނެ އެއްވެސް ކަމެއް ކުރުމަކީ އަޅުގަނޑުމެން ޟަމީރު ތަންދޭ ކަމެއް ނޫން. ޖަލުގައި މިހާތަނަށް އެންމެ ގިނަ ޚިދުމަތް ދެވުނު ޤައިދީއަކަށްވާނީ ރައީސް ޔާމީންކަން މޯލްޑިވްސް ކަރެކްޝަނަލް ސާވިސްގެ އޮފިސަރުންނަށް އެނގިވަޑައިގަންނަވާނެ.
– މިނިސްޓަރ އިމްރާން ދާޅުވިއެވެ.
ވ. އާރަށުގެ މައްސަލައިގައި ދައުލަތުން ރައީސް ޔާމީންގެ މައްޗަށް އުފުއްލެވި ދެ ދަޢުވާއެއް ސާބިތުވުމާ ގުޅިގެން އެމަނިކުފާނުގެ މައްޗަށް 11 އަހަރުގެ ޖަލު ޙުކުމެއް މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ވަނީ އިއްވަވައިފައެވެ. އަދި އެމަނިކުފާނު މިވަގުތު ހުންނެވީ ޙުކުމް ތަންފީޒުކުރެއްވުމަށް ކ.މާފުށީ ޖަލުގައެވެ.
މޯލްޑިވްސް ކަރެކްޝަނަލް ސާވިސް އިން ކުރިން ހާމަކޮށްފައިވާ ގޮތުގައި ޔާމީން ޖަލު ހުކުމް ތަންފީޒު ކުރަމުން ގެންދަނީ މާފުށީ ޖަލުގެ ސްޕެޝަޕް ޕްރޮޓެކްޝަން ޔުނިޓް (އެސްޕީޔޫ) ގައެވެ.
