ފްރެންޗް ލީގުގެ ލޮރިއެންއާ ދެކޮޅަށް ކުޅުނު މެޗުން ތާވަލުގެ އެއްވަނައިގައި އޮތް ޕީއެސްޖީ ބަލިވެއްޖެއެވެ.
އަމިއްލަ ދަނޑުގައި ރޭ ކުޅުނު މެޗުން ޕީއެސްޖީ ބަލިވީ ތިން ލަނޑު އެއް ލަނޑުންނެވެ. މިއީ މި އަހަރު ފެށި ފަހުން އެ ޓީމަށް ކުރިމަތިލާން ޖެހުނު ނުވަވަނަ ބައްޔެވެ. އަދި މިއީ މި ސީޒަނުގެ ލީގުގައި ޕީއެސްޖީ ބަލިވި ހަވަނަ މެޗެވެ.
ރޭގެ މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ލޮރިއެންއިންނެވެ. މެޗުގެ 15 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އެންޒޯ ލެ ފީއެވެ. މެޗުގެ ކުރީކޮޅުގައި ރީނދޫ ކާޑެއް ދެއްކި ޕީއެސްޖީގެ އަޝްރަފް ހަކީމީއަށް ވަނީ މެޗުގެ 20 ވަނަ މިނެޓުގައި ދެވަނަ ރީނދޫ ކާޑާއެކު ރަތް ކާޑެއް ދައްކާފައެވެ.
ނަމަވެސް އޭގެ ނުވަ މިނެޓު ފަހުން، ޕީއެސްޖީން ވަނީ ލަނޑެއް ޖަހައި ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ކިލިއަން އެމްބާޕޭއެވެ. ނަމަވެސް އޭގެ 10 މިނެޓު ފަހުން ޑާލިން ޔޮންގްވާ ވަނީ ލަނޑެއް ޖަހައި، ލޮރިއެންއަށް އަނެއްކާވެސް ލީޑު ނަގައިދީފައެވެ. އަދި މެޗުގެ 87 ވަނަ މިނެޓުގައި ބަމްބާ ޑިއޭންގް ވަނީ ލޮރީއެންއަށް ތިންވަނަ ލަނޑު ޖަހައިދީފައެވެ.
މި ނަތީޖާއާއެކު ތާވަލުގެ އެއްވަނައިގައި ޕީއެސްޖީ އޮތީ ކުޅުނު 33 މެޗުން ލިބުނު 75 ޕޮއިންޓާއެކުގައެވެ. ދެވަނައިގައި އޮތް މާސޭއަށް 32 މެޗުން ލިބިފައިވަނީ 67 ޕޮއިންޓެވެ. ޕީއެސްޖީއަށް ލީގުގައި ބާކީ ފަސް މެޗު އޮތް އިރު، މާސޭއަށް ލީގުގައި ބާކީ އަދި ހަ މެޗު އެބައޮތެވެ.
