ރާއްޖޭގެ މަސްކަނޑު ސަރުކާރަށް ހިމާޔަތް ނުކުރެވުނު ކަމަށާއި، އޮޓްލޮސް އިން ނިންމި މައްސަލާގައި އޮތްގޮތުން ރާއްޖޭގެ މަސްވެރިނަށް ގެއްލުނީ 44،000 އަކަ ކިލޯމީޓަރު ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގު ވިދާޅުވެއްޖެއެވެ.
ރާއްޖޭގެ ދެކުނުގެ ކަނޑުގެ ސަރަޙައްދު ކަށަވަރުވުމުގެ ސަބަބުން ދެކުނުގެ މަސްކަނޑުތައް ޙިމާޔަތްކުރުމަށް މަސައްކަތްކުރުމުގެ ބާރު މިހާރު ސީދާ ދިވެހި ސަރުކާރަށް ލިބިވަޑައިގެންފައިވާކަމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ. ޙުސައިން ރަޝީދު ޙަސަން ވަނީ ވިދާޅުވެފައެވެ.
މިނިސްޓަރ މިހެން ވިދާޅުވި ނަމަވެސް މޮރިޝަސްގެ ފަރާތުން ދިވެހިރާއްޖެއާއި ޗާގޮސްއާ ދެމެދު އޮތް ކަނޑުގެ ސަރަހައްދުގެ ތެރެއިން ފުށުއަރާ ސަރަހައްދާއި ގުޅޭގޮތުން ޔުނައިޓެޑް ނޭޝަންސް ކޮންވެންޝަން އޮން ދަ ލޯ އޮފް ދަ ސީ (މުޢާހަދާ)ގެ ދަށުން 23 އޮގަސްޓު 2019 ގައި ހުށަހެޅި މައްސަލާގައި އިންޓަރނޭޝަނަލް ޓްރައިބިއުނަލް ފޮރ ދަ ލޯ އިފް ދަ ސީ (ޓްރައިބިއުލަން) ކުރި ހުކުމުގައި، ދެގައުމުގެ މެރިޓައިމް ބައުންޑަރީގައި ފުށުއަރާ 92،563 އަކަ ކިލޯ މީޓަރުގެ ސަރަހައްދުން ރާއްޖެއަށް ލިބިފައިވަނީ 47،232 އަކަ ކިލޯ މީޓަރުގެ ސަރަހައްދެކެވެ. އަދި މޮރިޝަސްއަށް ދޭން ކޯޓުން ހުކުމް ކޮށްފައިވަނީ 45،331 ގެ ސަރަހައްދެކެވެ.
މިކަމާއި ގުޅިގެން ކަންބޮޑުވުން ފާޅުކޮށް، ރާއްޖޭގެ ބޮޑު ކަންނެލީގެ އެންމެ ގިނަ މަސްވެރިން ހިމެނޭ މަހިބަދޫ ދާއިރާގެ މެމްބަރު ތޯރިގު ވިދާޅުވީ ބޮޑު ކަންނެލީގެ މަސްވެރިކަން ކުރާ ފަރާތްތަކުގެ އާދޭހަކީ ދިވެހި މަސްކަނޑު ހިމާޔަތް ކުރުންކަމަށެވެ. އެންމެ އިންޗިއެއްވެސް އެހެން ބަޔަކަށް ލިބުމަކީ ދިވެހި މަސްވެރިން އެދޭ ގޮތެއް ނޫންކަމަށެވެ. ނަމަވެސް އިއްޔެ މައްސަލަ ނިމުނު ގޮތަށް ރާއްޖެއަށް މަސްކަނޑުން 44،000 އަކަ ކިލޯ މީޓަރު ގެއްލިފައިވާކަމަށެވެ.
ބޮޑުކަންނެލި މަސްވެރި ޔޫނިއަންގެ އާދޭހަކީ ”ދިވެހި މަސްކަނޑުން އެންމެ އިންޗިއެއްވެސް އެހެން ބަޔަކަށް ލިބޭގޮތަށް މަގުފަހިވާ އެއްވެސް ކަމެއް ނުކުރުން” ދައުލަތުން މަސްކަނޑު ހިމާޔަތްކުރަން ނުވެސް އެދޭ. މަސްވެރިނަށް ގެއްލުނީ 44،000 އަކަ ކިލޯމީޓަރު.
– ޓޮމް ވިދާޅުވިއެވެ.
ޗާގޯސް އަދި ރާއްޖޭގެ ކަނޑުގެ ސަރަޙައްދާ ގުޅޭގޮތުން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)އިން ނިންމި ނިންމުމާ ގުޅިގެން ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ. ޙުސައިން ރަޝީދު ޙަސަން ވިދާޅުވީ ފުރަތަމަ ފަހަރަށް ރާއްޖޭގެ ދެކުނުގެ ކަނޑުގެ ސަރަޙައްދުގެ އިން ވަކިވެ، އދ.ގެ ޤަރާރުތަކާ އެއްގޮތަށް ރާއްޖޭގެ ސަރަޙައްދު ކަނޑައެޅިގެން ދިޔުމަކީ ރާއްޖެއަށް ލިލިބުނު ތާރީޚީ ކުރިއެރުމެއްކަމަށެވެ.
މިނިސްޓަރ ވިދާޅުވީ މީގެކުރިން ދެކުނުގެ ކަނޑުގެ ސަރަޙައްދުގައި އޮންނަނީ ސިޔާސީ ސަރަޙައްދެއްގެ ގޮތުގައިކަމަށެވެ. މީގެ ކުރިން ރާއްޖޭގެ ދެކުނުގެ ކަނޑުތަކުން މަސްވެރިކަންކޮށްގެން އެފަދަ އުޅަނދުތައް ރާއްޖޭގެ އިޤްތިޞާދީ ސަރަޙައްދު ހުރަސްކޮށް ބައިނަލްއަޤުވާމީ ކަނޑުގެ ސަރަޙައްދަށް ނިކުންނަށްކަމަށް މިނިސްޓަރ ވިދާޅުވިއެވެ. އެގޮތުން އިންކަނޑައެޅުމުގެ ކުރިން ރާއްޖެއަށް ލިބިފައިވާ 12 މޭލު ހުރަސްކޮށް ބޭރަށް ދިއުމުން އެފަރާތްތަކަށް ފިޔަވަޅުއެޅުމަށް ކުރެވޭނެ އެއްވެސް ކަމެއް މީގެކުރިން ދިވެހި ސަރުކާރަކަށް ނޯންނަކަމަށް މިނިސްޓަރ ވިދާޅުވިއެވެ. އެހެންނަމަވެސް އިޓްލޮސްގެ ނިންމުމާއެކު ދިވެހިންގެ މާކަނޑުތަކުގެ ރައްކާތެރިކަން ކަށަވަރުކުރުމުގެ ބާރު ދިވެހިންނަށް ލިބިއްޖެކަމަށް މިނިސްޓަރ ވިދާޅުވިއެވެ.
