ރާއްޖޭގެ ކަނޑުގެ ސަރަހައްދުން 44،000 އަކަކިލޯމީޓަރ ގެއްލުމަކީ ލިބުނު ކާމިޔާބެއް ނޫން ކަމަށް ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވެއްޖެއެވެ.

އުޝާމް މިހެން ވިދާޅުވީ ރާއްޖެއާއި މޮރިޝަސްގެ ކަނޑުގެ ސަރަޙަދުން ފުށުއަރާ ސަރަޙައްދުގެ އިން ވަކި ކުރުމުގެ މައްސަލަ، ރާއްޖެއަށް ބޮޑު ބައި ލިބޭގޮތަށް، ރާއްޖެއިން ހުށައެޅިގޮތަށް، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސްއިން)އިން ނިންމާފައިވާ ނިންމުމަކީ ސަރުކާރަށް ލިބުނު ބޮޑު ކާމިޔާބީއެއްކަމަށް ބުނެ ދައްކަމުންދާ ވާހަކަތަކާއި ގުޅިގެން ކުރެއްވި ޓުވީޓެއްގައެވެ.

އުޝާމް ވިދާޅުވީ ދިވެހިރާއްޖޭއިން މީގެކުރިން EEZ ގެ ގޮތުގަ ބޭނުންކުރަމުންދިޔަ 200 ނޯޓިކަލް މޭލުގެ ތެރެއިން 44،000 އަކަކިލޯމީޓަރ ގެއްލުމަކީ ލިބުނު ކާމިޔާބެއް ނޫންކަމަށެވެ. މިމައްސަލާގައި ހުރިހާ ކަމެއް ގޯސްވެފައިވަނީ ސަރުކާރުން ނަގާފައިވާ ސްޓޭންޑުގެ ސަބަނުން ކަމަށާއި، މިކަމުގައި ދިވެހި މަސްވެރިންނަށް ލިބުނު ގެއްލުމަކީ ސަރުކާރުން ޒިންމާ ނަގަންޖެހޭ ވަރުގެ ގެއްލުމެއްކަމަށް މެމްބަރު އުޝާމް ވިދާޅުވިއެވެ.

ދިވެހިރާއްޖޭއިން މީގެކުރިން EEZ ގެ ގޮތުގަ ބޭނުންކުރަމުންދިޔަ 200 ނޯޓިކަލް މޭލުގެ ތެރެއިން 44،000 އަކަކިލޯމީޓަރ ގެއްލުމަކީ ލިބުނު ކާމިޔާބެއް ނޫން. މިސަރުކާރުން މިމައްސަލާގަ ނަގާފައިވާ ސްޓޭންޑުގެ ސަބަބުން ދިވެހި ބޭނުންކުރަމުންދިޔަ މަސްކަނޑުން ބޮޑު ބައެއް ނުގެއްލޭކަމަކަށް ނުވާނެ.

– އުޝާމް ވިދާޅުވިއެވެ.

ކަނޑުގެ ސަރަހައްދުގެ މައްސަލާގައި މޮރިޝަސް އިން ރާއްޖެއާ ދެކޮޅަށް ހުށަހަޅާފައިވާ މައްސަލައިގެ އަޑުއެހުންތައް މިދިޔަ އަހަރު ވަނީ ނިންމާލައި މިއަދު ވަނީ ހުކުމް ކޮށްފައެވެ.

އެ މައްސަލަ ޓްރައިބިއުނަލްގައި އޮތުމުން ރާއްޖެ އިން ވަނީ ޗާގޯސް އައިލެންޑްސްގެ މައްސަލާގައި މޮރިޝަސްއާ އެއްކޮޅަށް އދ. ގައި ވޯޓު ދޭން ނިންމައިފައެވެ. އޭގެ ކުރިން ޗާގޯސްގެ މައްސަލާގައި މޮރިޝަސް އާއި އިނގިރޭސި ވިލާތާ ދެމެދު އުފެދިފައިވާ މައްސަލާގައި ރާއްޖެ އޮތީ މޮރިޝަސްއާ ދެކޮޅަށެވެ.

އެކަމަކު މިދިޔަ އަހަރު ރާއްޖޭގެ ސްޓޭންޑް ބަދަލުކޮށް، މޮރިޝަސްއާ އެއްކޮޅަށް ވޯޓު ދޭން ނިންމުމުން ރާއްޖޭގެ ކަނޑުގެ ސަރަހައްދުގެ ބައެއް ދޫކޮށްލަން ސަރުކާރުން އެއްބަސްވީ ކަމަށް ބުނެ ގިނަ ފާޑުކިޔުންތަކެއް އަމާޒުވި އެވެ. އެކަމަކު ސަރުކާރުން ބުނެފައިވަނީ ކަނޑުގެ ބައެއް އޭގެ ސަބަބުން ނުގެއްލޭނެ ކަމަށެވެ. ޗާގޯސްއަކީ އިނގިރޭސި ވިލާތުން އެމެރިކާ އަށް ކުއްޔަށް ދިނުމުން އެމެރިކާ އިން މިހާރު އަސްކަރީ މަރުކަޒެއް ގާއިމް ކޮށްފައިވާ ތަނެވެ. އެތަނުގެ މިލްކުވެރިކަމުގެ މައްސަލާގައި އިނގިރޭސި ވިލާތާއި ޗާގޯސްއާ ދެމެދު އަބަދުވެސް ހިޔާލު ތަފާތުވެފައި ވެއެވެ.