ޗާގޯސްގެ މައްޗަށް ސިޔާދަތީ ބާރު އޮތްކަމަށް މޮރިޝަސްއިން ކުރާ ދަޢުވާގައި މޮރިޝަސްއަށް އިދިކޮޅު ޕީޕީއެމްއިން ކުރިން ތާއީދު ކޮށްފައި ވާކަމަށް ސަރުކާރުން ވިދާޅު ވެއްޖެއެވެ.

ސަރުކާރުން މިހެން ވިދާޅުވެފައިވަނީ، ޗާގޮސްއާއި ރާއްޖެއާދެމެދު ޚިޔާލުތަފާތު ވެފައިވާ މެރިޓައިމް ބައުންޑަރީގެ މައްސަލާގައި އިދިކޮޅު ޕީޕީއެމްއިން އިޓޮލްސްއަށް ފޮވުނި ސިޓީއަށް ރައްދުދީ ނެރުނު ބަޔާނުގައެވެ.

މި ބަޔާނުގައި ސަރުކާރުން ވިދާޅުވެފައިވަނީ 2019 މޭ 24 ގައި ޕްރޮގްރެސިވް ޕާޓީ އޮފް މޯލްޑިވްސް އިން ނެރުނު ބަޔާނުގައި ޗާގޯސްގެ މައްޗަށް ސިޔާދަތީ ބާރު އޮތްކަމަށް މޮރިޝަސްއިން ކުރާ ދަޢުވާގައި މޮރިޝަސްއަށް ނުހަނު ތާއީދުކޮށްފައިވާކަމުގައެވެ. އަދި ޗާގޯސް އާކިޕެލާގޯ މޮރިޝަސްއަށް އަނބުރާ ދިނުމަށް ގޮވާލި އ.ދ.ގެ ޢާއްމު މަޖިލީހުގެ ޤަރާރާ ދެކޮޅަށް ރާއްޖެއިން އޭރު ވޯޓުލުމާ ގުޅިގެން ދިވެހިރާއްޖޭގެ ސަރުކާރުން މޮރިޝަސްގެ ރައްޔިތުންގެ ކިބައިން މަޢާފަށް އެދެންޖެހޭނެކަމަށް އިދިކޮޅު ޕީޕީއެމްއިން އޭރު ނެރެފައިވާ މި ބަޔާނުގައި ބުނެފައިވާކަމަށްވެސް ސަރުކާރުގެ ބަޔާނުގައި ވިދާޅުވެފައި ވެއެވެ.

އިދިކޮޅު ޕީޕީއެމްއިން މިމައްސަލާގައި އެކި ދުވަސްވަރު އެކިގޮތަށް ސްޓޭންޑް ނަގަމުން ދާކަން ފާހަގަކޮށް، އަދި އިދިކޮޅު ޕާޓީން ފިތުނަ އުފެއްދުމަށް މަސައްކަތް ކުރަމުންދާކަމަށް މޭރުންކޮށް ސަރުކާރުން ވިދާޅުވެފައިވަނީ، ކުރިން މޮރިޝަސްގެ ރައްޔިތުންގެ ކިބައިން މި ސަރުކާރުން މާފަށް އެދެން ޖެހޭނަކަމަށް ޕީޕީއެމް ބުނެފައިވާއިރު، އޭގެ ކުރިން، ޕްރޮގްރެސިވް ޕާޓީ އޮފް މޯލްޑިވްސްގެ ސަރުކާރުން 2017 ޖޫން 22 ގައި ވަނީ ޗާގޯސްގެ މައްސަލާގައި އިންޓަނޭޝަނަލް ކޯޓް އޮފް ޖަސްޓިސްގެ އިސްތިޝާރީ ލަފައަކަށް އެދި މޮރިޝަސްއިން އ.ދ.ގެ ޢާއްމު މަޖިލީހަށް ހުށަހެޅި ޤަރާރާ ދެކޮޅަށް ވޯޓު ލާފައިކަމުގައެވެ.

ސަރުކާރުން އިތުރަަށް ވިދާޅުވެފައިވަނީ، މިފަދަ މައްސަލައެއްގައި ދިވެހި ޢާއްމު ރައްޔިތުންނާއި ބައިނަލްއަޤުވާމީ މުޖުތަމަޢަށް އޮޅުން އަރާގޮތަށް ސިޔާސީ ޕާޓިތަކުން ކުރާ މަސައްކަތްތަކާމެދު ދިވެހި ސަރުކާރުން ނުހަނު ހިތާމަ ކުރާކަމުގައެވެ.

އަދި ދިވެހިރާއްޖެއާއި ޗާގޯސް އާކިޕެލާގޯއާ ދެމެދު ކަނޑުގެ އިން ވަކިކުރުމުގެ މައްސަލައިގައި ރާއްޖެއިން ހުށަހަޅާފައިވާ ކަންކަމަށް ރިޢާއަތްކޮށް، ޢަދުލުވެރިކަމާއި އިންސާފުވެރިކަމާއެކު އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ އިން މި މައްސަލަ ނިންމަވާނެކަމާމެދު ދިވެހި ސަރުކާރުގެ ފުރިހަމަ އިތުބާރު އޮތްކަމަށްވެސް މިމައްސަލާގައި ސަރުކާރުން ނެރުނު ބަޔާނުގައި ވިދާޅުވެފައި ވެއެވެ.