ރައްޔިތުންގެ މަޖިލިސް ދެ ހަފްތާގެ ޗުއްޓީއަކަށް ގޮސްފިއެވެ.
މިއަދު މަޖިލިސް ޗުއްޓީއަށް ގޮސްފައިވާއިރު، ކޮތަޅުން ފީ ނެގުމުގެ މައްސަލައަށް ސަރުކާރުން ހުށަހެޅި އިސްލާހު މަޖިލީހުން ފާސްކޮށްފައެއްނުވެއެވެ.
މިއަދުގެ ޖަލްސާގައި އެކި ރިޕޯޓްތަކަށް ވޯޓަށް އެހުމަށް އެޖެންޑާ ކޮށްފައި އޮތްނަމަވެސް، މަސައްކަތް ނިންމާ ވޯޓަށް އެހުނީ ދެ ރިޕޯޓަށެވެ.
މިއަދުގެ މަޖިލީހުގެ ޖަލްސާގައި ސަރުކާރާއި އިދިކޮޅު މެންބަރުން ވަނީ މަޖިލީހުގެ ތަޅުމުގައި އިހުތިޖާޖު ކޮށްފައެވެ. އެ މެންބަރުން އިހުތިޖާޖު ކޮށްފައިވަނީ ޗާގޯސްގެ މައްސަލައިގައި ރާއްޖެއިން ބައެއް ދޫކޮށްލުމަށް މި ސަރުކާރުން އެއްބަސްވެފައިވާކަމަށް ބުނެއެވެ.
ޗާގޯސްގެ މައްސަލައިގައި ހުކުރު ދުވަހު އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)އިން ގޮތެއް ނިންމާނެއެވެ.
މަޖިލީހުގައި ތަޅުމުގައި އަޑުގަދަކުރުމާއި ގުޅިގެން ނައިފަރު ދާއިރާގެ މެންބަރު އަހުމަދު ޝިޔާމްގެ ނަން އިއްވާ މަޖިލީހުން އޭނާ ވަނީ ނެރެފައެވެ.
ރައްޔިތުންގެ މަޖިލީހުގެ ގަވައިދު ބުނާގޮތުން މަޖިލީހުގެ ޖަލްސާތައް އަހަރެއްގެ ތެރޭގައި ބެހިގެންވަނީ ތިން ދައުރަކަށެވެ.
އެގޮތުން ފުރަތަމަ ދައުރު ހިނގަނީ ފެބްރުއަރީ މަހުން ފެށިގެން އޭޕްރިލް މަހުގެ ނިޔަލަށެވެ. ދެވަނަ ދައުރު މޭ 16 ވަނަ ދުވަހުން ފެށިގެން ޖޫން މަހުގެ ނިޔަލަށް ކުރިއަށްދާނއިރު ތިންވަނަ ދައުރު އޮގަސްޓް މަހު 16 އިން ނޮވެމްނަރު މަހުގެ ނިޔަލަށް ހިނގާނެކަމަށް މަޖިލިސް ގަވައިދުގައި ބުނެފައިވެއެވެ.
