މާލޭގެ ރައްޔިތުންނަށް ގޯއްޗާއި ފްލެޓް ދިނުމަށް ސަރުކާރުން ނިންމާފައިވާ ނިންމުމާއި އެއްގޮތަށް މަސައްކަތް ކުރިއަށްދާކަމަށާއި، މިދައުރުގެ ތެރޭގައި ފްލެޓާއި ގޯތި ދެވިގެންދާނެކަމަށް ޕްލޭނިން މިނިސްޓަރ މުޙައްމަދު އަސްލަމް ވިދާޅުވެއްޖެއެވެ.
ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫޢުގެ ދަށުން "ބިންވެރިޔާ ސްކީމް" އާއި "ގެދޮރުވެރިޔާ" ސްކީމުގެ ދަށުން ގޯއްޗާއި ފްލެޓް ދޫކުރުމަށް ހަމަޖެހިފައިވަނީ ހުޅުމާލެއާއި ގުޅީފަޅުންނެވެ. މިޕްރޮގްރާމްގެ ދަށުން ހުޅުވާލާފައިވަނީ 4000 ފްލެޓާއި، 3000 ގޯއްޗަށް ކުރިމަތިލުމަށެވެ. މީގެތެރެއިން 1000 ގޯއްޗާއި، 4000 ފްލެޓް ދޫކުރުމަށް ހަމަޖެހިފައިވަނީ ހުޅުމާލެއިންނެވެ. އަދި ބާކީ 2000 ގޯތި ދޫކުރުމަށް ނިންމާފައި ވަނީ ގުޅީފަޅުންނެވެ.
ގޯއްޗާއި ފްލެޓަށް އެދި ފޯމް ހުށައެޅުމަށް ހުޅުވާލި ފުރުޞަތުގައި 35،861 ފޯމް ލިބިފައިވާކަމަށް ޕްލޭނިން މިނިސްޓްރީން ވިދާޅުވެއެވެ. މީގެ ތެރޭގައި ބިންވެރިޔާ ސްކީމަށް 15،164 ފޯމު ހުށައަޅާފައިވެއެވެ. އަދި ގެދޮރުވެރިޔާ ސްކީމްގެ ދަށުން 3 ކޮޓަރީގެ އެޕާޓްމަންޓަށް 14،489 ފޯމް ހުށައަޅާފައިވެއެވެ. އަދި މިސްކީމްގެ ދަށުން 2 ކޮޓަރީގެ އެޕާޓްމަންޓަށް އެދި 6208 ފޯމް ވަނީ ހުށައަޅާފައެވެ.
މާލޭގެ ރައްޔިތުންނަށް ޚާއްސަކޮށްގެން ދޫކުރުމަށް ހަމަޖެހިފައިވާ ފްލެޓާއި، ގޯތި ދިނުމަށް ނިންމާފައިވާ ނިންމުމާއި އެއްގޮތަށް މަސައްކަތް ކުރިއަށްދޭތޯ މެދުހެންވޭރު ދާއިރާގެ މެމްބަރު އަލީ އާޒިމް މިނިސްޓަރ އަސްލަމާއި ވަނީ މަޖިލީހުގައި ސުވާލު ކުރައްވާފައެވެ. މިސުވާލުގެ ޖަވާބުގައި މިނިސްޓަރ ވިދާޅުވީ މިސަރުކާރުން ވެފައިވާ ވަޢުދާއި އެއްގޮތަށް މިދައުރުގެ ތެރޭގައި މާލޭގެ ރައްޔިތުންނަށް ޚާއްސަ ކުރައްވާފައިވާ ފްލެޓާއި ގޯތި ދެވޭނެކަމުގެ ފުރިހަމަ ޔަގީންކަން އޮތްކަމަށެވެ.
މާލޭގެ ރައްޔިތުންގެ ބޯހިޔާވަހިކަމަށް ގޯއްޗާއި ފްލެޓް ހަމަ ދޭނަން. ހަމައެކަނި ލިޔުމެއްނޫން ދޭނީ. ގޯތި ދައްކާފަ އެކަން ކުރަނީ. ފްލެޓްތަކުގެ ތެރޭގައި ބައެއް ފްލެޓްތައް ސީދާ ވަންނަ މިންވަރަށް ނުނިމި ހުރެދާނެ. އެހެން ނަމަވެސް އޭގެ ބޮޑުބައި ނިމިފަ، އަދި އެއްބައި ފްލެޓްތައް ނިމޭނެ އެކީގަ.
– އަސްލަމް ވިދާޅުވިއެވެ.
މެމްބަރު އާޒިމްގެ ސުވާލުގައި ވަނީ ނިމިދިޔަ ސަރުކާރުން ދައުރު ނިމެންކައިރިވެފައި ވަނިކޮށް ފްލެޓް ދިން އުސޫލުން މިސަރުކާރުން ހަވާލުކުރާ ފެލްޓްގެ ކަންކަން ކުރިއަށް ގޮސްދާނެތޯވެސް ސުވާލު ކުރައްވާފައެވެ. މިނިސްޓަރ އަސްލަމް ވިދާޅުވީ މިސަރުކާރުން ހަވާލުކުރާ ފްލެޓާއި ގޯއްޗަކީ އޭގެ ހައްގުވެރިންނަށް ލިޔުމާއިއެކު ފްލެޓްވެސް ލިބޭނެ ގޮތައް އިންތިޒާމު ކުރެވެމުންދާ ކަންތައްތަކެއް ކަމަށެވެ.
އަޅުގަނޑަށް ފުރިހަމަ ޔަގީންކަން އެބައޮތް ގޯއްޗާއި ފްލެޓް އަޅުގަނޑުމެންނަށް ދެވޭނެކަމުގެ. ދެން އިއްޒަތްތެރި މެމްބަރު ފާހަގަކުރި ފަދައިން މިއަދު އަދި މިތިބީ އުންމީދުގަ. އިރާދަކުރެއްވިއްޔަ އެކަން ހަގީގަތަކަށް ވެގެން ދާނެ.
– އަސްލަމް ވިދާޅުވިއެވެ.
އަސްލަމް މިހެން ވިދާޅުވި ނަމަވެސް މަޖިލިސް ރައީސް މުހައްމަދު ނަޝީދުވަނީ އަސްލަމް މަޖިލީހުގައި އެކި ތާރީހު މިކަމަށް ދެއްވި ކަމަށެވެ. ނަމަވެސް މިކަމަށް އެކަށީގެންވާ ހައްލެއް އަދާއިހަމައަށްވެސް ލިބިފައި ނުވާކަމަށެވެ.
