ފާއިތުވި ކޯވިޑް ކާރިސާއިން އަރައިގަތުމަށް ރައީސް އިބުރާހިމް މުހައްމަދު ސާލިހު ގެންގުޅުއްވި ފޯމިއުލާ ހޯދުމަށް އެދުނު ގައުމުތަކުގެ ނަންތަައް ހާމަކުރުމަށް އިތިރު 5 ދުވަހުގެ މުހުލަތެއް ދީ، އެމައުލޫމާތު އެ މުއްދަތުގައި ހާމަކުރުމަށް އިންފޮމޭޝަން ކޮމިޝަނަރ އާހިދު ރަޝީދު އިއްޔެ ފޮރިން މިނިސްޓްރީއަށް އަންގައިފިއެވެ.
ކޯވިޑް ކާރިސާއިން އަރައިގަތުމަށް ރައީސް އިބުރާހިމް މުހައްމަދު ސާލިހު ބޭނުން ކުރެއްވި ފޯމިއުލާ ހޯއްދެވުމަށް ބޭރުގެ ގައުމުތަކުން އެދެމުންދާކަމަށް ފޮރިން މިނިސްޓަރ އަބުދުﷲ ޝާހިދު ވިދާޅުވެފައިވަނީ ފާއިތުވި ޖަނަވަރީ މަހު އައްޑޫ ސިޓީގައި ބޭއްވުނު ކެމްޕޭން ޖަލްސާއެއްގައި ވާހަކަ ދައްކަވަމުންނެވެ.
ރައީސް ސާލިހުގެ މި ފޯމިއުލާއާއި އަދި މި ފޯމިއުލާ ހޯދުމަށް އެދުނު ގައުމުތަކުގެ ނަންތައް ހޯދުމަށް މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން، "ދިޔަރެސް" ކިޔާ ނޫހަކުން ފޮރިން މިނިސްޓްރީގައި އެދުމުން އެ މިނިސްޓްރީންވަނީ އެމައުލޫމާތު ހާމަކުރުމަށް ދެކޮޅު ހަދާފައެވެ.
އެި މައުލޫމާތު ހާމަކުރުމަށް ދެކޮޅުހަދަމުން ފޮރިން މިނިސްޓްރީން ބުނެފައިވަނީ، ރައީސް ސޯލިހްގެ ފޯމިއުލާ ހޯދަން އެދުނު ގައުމުތަކުގެ ނަންތަކަކީ ޑިޕްލޮމެޓިކް ޗެނަލްތައް މެދުވެރިކޮށް ލިބޭ މައުލުމާތުތަކެއް ކަމަށާއި އެފަދަ ލިޔުންތައް ވިއެނާ ކޮންވެންޝަން އޮން ޑިޕްލޮމެޓިކް ރިލޭޝަންސް (1961) އަދި ވިއޭނާ ކޮންވެންޝަން އޮން ކޮންސިއުލާ ރިލޭޝަންސް (1963) ގެ ދަށުން ހިމާޔަތާއި ރައްކާތެރިކަން ލިބިގެންވާ ލިޔުންތަކެއް ކަމުގައިވާތީ އެއީ ހާމަކުރެވެން ނެތް މައުލޫމާތެއް ކަމަށެވެ.
މިނިސްޓްރީން އެމައުލޫމާތު ހާމަކުރުމަށް ދެކޮޅު ހެދުމާއި ގުޅިގެން، އެ ނޫހުންވަނީ އިންފޮމޭޝަން ކޮމިޝަނަރު އޮފީހުގައި އެމައްސަލަ އިލްތިމާސް ކޮށްފައެވެ. މިގޮތުން އިއްޔެ ފޮރިން މިނިސްޓްރީއާއި "ދިޔަރެސް" ނުހާއި އެކު އިންފޮމޭޝަން ކޮމިޝަނަރު ބޭއްވި އަޑުއެހުމުގައި އެމައުލުމާތު މިނިސްޓްރީގައި ހުރިތޯ ނެތްތޯ ނުވަތަ އެއީ އެމިނިސްޓްރީން ބަލަހައްޓަމުންދާ މައުލޫމާތެއްތޯ ސާފު ކޮށްދިނުމަށް ވަނީ ދަންނަވާފައެވެ. އެހެންނަމަވެސް ފޮރިން މިނިސްޓްރީންވަނީ އިތުރު އެއްވެސް ވާހަކައެއް އެ މައްސަލައާއި ގުޅޭގޮތުން ދައްކަން ނެތްކަމަށް ވިދާޅުވެފައެވެ.
މިނިސްޓްރީގެ ފަރާތުން މި ޖަވާބު ދެއްވުމުން، އެމައުލޫމާތަކީ، މައުލުމާތު ހޯދައި ލިބިގަތުމުގެ ގާނޫނުގެ 12 ވަނަ މާއްދާ ދަށުން، އެއީ މިނިސްޓްރީގައި ހުރި މައުލޫމާތޯ ނުވަތަ ނޫންތޯ ބުނެދޭން ޖެހޭނެ ކަމަށް ވިދާޅުވެ އިންފޮމޭޝަން ކޮމިޝަނަރ އާހިދު ތަކުރާރުކޮށް ސުވާލު ކުރުމުން ވެސް ފޮރިން މިނިސްޓްރީން ވިދާޅުވެފައިވަނީ ދައްކާނެ އިތުރު ވާހަކައެއް ނެތްކަމުގައެވެ.
އެއާއެކު އިންފޮމޭޝަން ކޮމިޝަނަރު ވިދާޅުވެފައިވަނީ މިނިސްޓްރީން ބުނި ދެ ކޮންވެންޝަންގައި ހިމާޔަތް ކޮށްދީފައިވާ ކަންތައްތަކުގެ ތެރޭގައި އެ މައުލޫމާތު ހިމެނޭ ކަމަށް ނުފެންނަ ކަމަށެވެ. އެހެންނަމަވެސް އެއާއެކުވެސް މިނިސްޓްރީގެ ފަރާތުން އެ މައުލޫމާތު ހާމަކުރަން ދެކޮޅު ހަދަމުންދާތީ، މައުލޫމާތު ހާމަކުރަން އިތުރު 5 ދުވަހުގެ މުހުލަތެއް ދިނީކަމުގައި އިންފޮމޭޝަން ކޮމިޝަނަރު ވިދާޅުވެފައި ވެއެވެ.
