2024 ވަނަ އަހަރު އެމެރިކާގައި އޮންނަ ރިޔާސީ އިންތިޚާބުގައި ވާދަކުރައްވާނެކަން އެމެރިކާގެ މިހާރުގެ ރައީސް ޖޯ ބައިޑްން އިއުލާން ކުރައްވައިފިއެވެ.
ބައިޑްން ރިޔާސީ އިންތިޚާބުގައި ވާދަ ކުރައްވާނެކަން އިއުލާން ކުރެއްވުމާއެކު، ކުރިޔަށް އޮތް ރިޔާސީ އިންތިޚާބުގެ ކެމްޕޭނަކީ އަނެއްކާވެސް ކުރީގެ ރައީސް ޑޮނަލްޑް ޓްރަމްޕްއާއި ބައިޑްންގެ ގަދަ ހިފުމަކަށް ވެގެންދާނެ ކަމަށް ވަނީ ބެލެވެން ފަށާފައެވެ.
ކުރިޔަށް އޮތް ރިޔާސީ އިންތިޚާބުގައި ވާދަކުރައްވާނެކަން އިއުލާން ކުރައްވަމުން، ރިޔާސީ އިންތިޚާބުގެ ކެމްޕޭން ބައިޑްން ލޯންޗް ކުރައްވާފައިވަނީ ވީޑިއޯ ލިންކު މެދުވެރިކޮށެވެ.
ވީޑިއޯ ލިންކު މެދުވެރިކޮށް ވާހަކަ ދައްކަވަމުން ބައިޑްން ވިދާޅުވެފައިވަނީ، "މިއީ ހާސިލްކުރެވުނު ކާމިޔާބީތަކަށް އުފާކޮށް ހަމަޖެހިލެވެން އޮތް ދަނޑިވަޅެއް ނޫން" ކަމަށާއި، ކުރިޔަށް ރިޔާސީ އިންތިޚާބުގައި ވާދަކުރައްވަން ނިންމެވި ސަބަބަކީވެސް އެއީކަމުގައެވެ.
ބައިޑްން ރިޔާސީ އިންތިޚާބުގައި ވާދަ ކުރައްވާއިރު އޭނާ ރަނިންގ މޭޓަކަށް ދެންވެސް ވަވަޑައިގަންނަވާނީ މިހާރުގެވެސް ނާއިބު ރައީސް، އުމުރުން 58 އަހަރުގެ ކާމަލާ ހެރިސްއެވެ.
އެމެރިކާގެ ތާރީޚުގައި، ރައީސްކަން ކުރައްވާ އެންމެ އުމުރުން ދުވަސްވީ ރައީސެއްގެ ގޮތުގައި މިހާރުވެސް ހުންނެވި، އުމުރުން 80 އަހަރުގައި އަނެއްކާވެސް ބައިޑްން ރައީސްކަމަށް ކުރިމަތިލައްވަން ނިންމެވުމާއެކު، ބެލެވޭ ގޮތުގައި ކުރިޔަށް އޮތް ކެމްޕޭންގައި އޭނާގެ އުމުރުގެ ގޮތުން ރައީސްކަމަށް ތަންދޭތޯއާއި އަދި މިމޭރުމުން އޭނާއާ ގިނަ ސުވާލުތަކެއް ކުރިމަތިވެގެން ދާނެއެވެ.
ބައިޑްންގެ ދެވަނަ ދައުރެއް ނިމިގެން ދާއިރު އޭނާގެ އުމުރުން 86 އަހަރު ފުރޭނެއެވެ. އެއީ 2029ގައެވެ.
"އަހަރެން އުމުރާއި ގުޅޭގޮތުން ސުވާލު އުފެއްދުމުގެ ހައްގު ރައްޔިތުންނަށް އެބައޮތް،" ބައިޑްން މީގެ ކުރިން ވިދާޅުވެފައި ވެއެވެ. "އަދި އެއަށް އަރަހެއްނަށް ދެވެން އޮތް ހަމައެކަނި ޖަވާބަކީ، ބަލަން ތިބޭށޭ."
ބައިޑްންއާއި މީގެ ކުރިން ވާދަކުރެއްވި، ކުރީގެ ރައީސް ޑޮނަލްޑް ޓްރަމްޕް ގެންދަވަނީ 2024ގެ ރިޔާސީ އިންތިޚާބުގެ ރިޕަބްލިކަން ޕާޓީގެ ޓިކެޓް ހޯދެއްވުމަށް އެޕާޓީގެ ޕްރައިމަރީގައި މިހާރު ކެމްޕޭން ކުރައްވަމުންނެވެ.
