އެކި ކުޅިވަރުތަކުގައި ތަފާތުކުރުންތައް ނައްތާލައި، މި ސަރުކާރުގެ ކުޅިވަރު ވައުދުތަކުގެ 95 އިންސައްތަ ހާސިލުކުރެވިފައިވާ ކަމަށް ކުޅިވަރާ ބެހޭ ވަޒީރު އަޙްމަދު މަޚްލޫފް ވިދާޅުވެއްޖެއެވެ.
ރާއްޖޭގެ ކުޅިވަރުގެ ތާރީޚުގައި ބާއްވާ ފުރަތަމަ ބައިނަލްއަގުވާމީ ބިލިއާޑް މުބާރާތް ކަމަށްވާ މޯލްޑިވްސް އޯޕަން 2023 – 10 ބޯލް ޗެމްޕިއަންޝިޕުގައި ދުނިޔޭގެ އެންމެ ވަރުގަދަ 10 ކުޅުންތެރިން ވާދަކުރާއިރު, ރާއްޖޭގެ 16 ކުޅުންތެރިއަކުވެސް މި މުބާރާތުގައި ވާދަކުރެއެވެ.
މި މުބާރާތް ހުޅުވުމަށް ހޮނިހިރު ދުވަހު ބޭއްވި ރަސްމިއްޔާތުގައި ވާހަކަފުޅުދައްކަވަމުން މަޚްލޫފް ވިދާޅުވީ ބިލިއާޑުގެ ފުރަތަމަ ބައިނަލްއަގުވާމީ މުބާރާތް ރާއްޖޭގައި ބޭއްވުމަށް ކުޅިވަރާ ބެހޭ ވުޒާރާ އާއި މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) ގުޅިގެން ގިނަ މަސައްކަތްތަކެއް ކޮށްފައިވާ ކަމަށެވެ. އަދި ގައުމީ ބިލިއާޑް ސެންޓަރު ހުޅުވި ދުވަހު އެންމެ ދެކެން ބޭނުންވީ ބައިނަލްއަގުވާމީ މުބާރާތެއް އެ ސެންޓަރުގައި ބޭއްވޭނެ ދުވަހަކަށް ކަމަށާއި އެކަން ހާސިލުވުމުން އުފާކުރައްވާ ކަމަށްވެސް ވިދާޅުވިއެވެ.
ކުޅިވަރުތަކަށް ހަމަހަމަގޮތެއްގައި ޚިދުމަތްތަކެއް ކުރެވޭކަން ހާމަކުރައްވައި މަޚްލޫފް ވިދާޅުވީ އުއްމީދުކުރަނީ މިއަހަރު އަދި އިތުރު މުބާރާތްތަކެއް ބޭއްވުމަށް ކަމަށެވެ. އަދި އެކި ކުޅިވަރުތަކުގެ ފަރަގު ނައްތާލައި، ޔަގީނުންވެސް ރިޔާސީ ވައުދުތަކުގެ 95 އިންސައްތަ ހާސިލުކުރެވިފައިވާ ކަމަށާއި، އެ މަސައްކަތުގައި އެސޯސިއޭޝަންތަކާއި މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ދެއްވާ އެއްބާރުލުމަށް ޝުކުރު އަދާކުރައްވާ ކަމަށްވެސް ވިދާޅުވިއެވެ.
މި މުބާރާތް ހުޅުވުމުގެ ރަސްމިއްޔާތު ޝަރަފްވެރިކޮށްދެއްވައި ވާހަކަފުޅުދައްކަވަމުން ޚާރިޖީ ވަޒީރު ޝާހިދު ވިދާޅުވީ ދުނިޔެ ގަބޫލުކުރާ ފެންވަރުގެ މުބާރާތްތައް ރާއްޖޭގައި އިންތިޒާމުކުރުމުގެ ވަސީލަތްތައް ހުރެ، އެ ކަންކަން އިންތިޒާމްކުރުމުގެ ގާބިލުކަން ހުރި ޒުވާނުންތަކެއް ރާއްޖޭގައި އުފެދިގެންދިއުމަކީ ލިބޭ އެންމެ ބޮޑު ޝަރަފު ކަމަށެވެ. އަދި ކުރިއާ އަޅާ ބަލާއިރު މިހާރު އެންމެ ބޮޑަށް ފާހަގަކޮށްލެވެނީ ކުޅިވަރަށް އައިސްފައިވާ ކުރިއެރުން ކަމަށާއި، އެކަމަށް ފަޚުވެރިވާ ކަމަށްވެސް ވިދާޅުވިއެވެ.
ހޮނިހިރު ދުވަހު ފެށި މޯލްޑިވްސް އޯޕަންގައި ރާއްޖޭގެ 16 ކުޅުންތެރިންނާއެކު ޖުމްލަ 62 ކުޅުންތެރިން ވާދަކުރެއެވެ.
