މާލޭގެ މަގެއްމަތި އެންމެ ބާރުބޮޑުވި ވަގުތު އެމްއެންޑީއެފްގެ ވެހިކަލެއް ބަރުގޮނު އަޅަމުން ދިޔަ ކަމަށް ބުނެ، މީހަކު ކޮށްފައިވާ ޓުވިޓެއްގައި ހަގީގަތް އެމްއެންޑީއެފުން ހާމަ ކޮށްފިއެވެ.
ސިފައިންގެ 131 ވަނަ އަހަރީ ދުވަހާ ގުޅިގެން މާލޭގައި ކުރިއަށްގެންދިޔަ ހަވާއެރުވުމުގެ ހަރަކާތަށްފަހު، ހަވާ އެރުވި ސަރަހައްދުގެ މަގުތައް ވަނީ ވަރަށް ބޮޑަށް ތޮއްޖެހި، ކާރުބާރު ބޮޑުވެފައެވެ.
ފައިމަގުގައި އާއި އުޅަނދުތަކުގައި ވެސް ގިނަ ބަޔަކު މަގުމަތީގައި އުޅުނުއިރު، އެވަގުތު އެމްއެންޑިއެފްގެ ވެހިކަލެއް ބަރުގޮނު އަޅާ މަންޒަރާއި އަޑު ފެންނަ ވީޑިއޯއެއް މީސްމީޑިއާގައި މީހަކު ވަނީ ދައުރުކޮށްފައެވެ. މި ކާރަކީ އެމްއެންޑީއެފްގެ އިސް ބޭފުޅެއްގެ ކާރު ކަމަށާއި، އިސް މަގާމުތަކުގައި ތިއްބަވާ "ޕްރިވިލެޖްޑް" ބޭފުޅުން، އާންމު ރައްޔިތުންނާ މެދު އެއްވެސް ވަރަކަށް ނުވިސްނާކަމަށް މި ވީޑިއޯ ހިއްސާކުރި ފަރާތުން ބުނެފައިވެއެވެ.
މިކަމާއި ގުޅިގެން އެމްއެންޑީއެފްގެ މީޑިއާ އޮފިޝަލް ވިދާޅުވީ، މިމަހުގެ 21 ވަނަ ދުވަހުގެ ރޭ އަމީރު އަޙްމަދު މަގުން ދުއްވާފައިދަމުން ހަތަރު ސިގްނަލާއެކު ވެހިކަލް ބަރުގޮނު އަޅަންޖެހުނީ ޢާންމުންގެ ކުޑަކުއްޖަކު ހޭނެތި ކުއްލި އަވަސް ޞިއްޙީ ފަރުވާދިނުމަށް އޭޑީކޭ ހޮސްޕިޓަލަށް ގެންގޮސްދިނުމަށް މަގުމަތި ބަލަހައްޓަމުންދިއަ ފުލުހުން އެދިލެއްވުމުން ކަމުގައި ކަމަށެވެ.
އެވަގުތަކީ އެސަހަރައްދުގައި މީހުން ވެސް ވަރަށްގިނަ ކާރޫބާރޫ ވަރަށްބޮޑު ވަގުތެއް ނަމަވެސް ވެހިކަލްގެ ޑްރައިވަރު ފުރަތަމަ މަސައްކަތްކުރީ ބަރުގޮނު ނާޅައި ހަތަރު ސިގްނަލް ޖައްސައި ވީ އެންމެ އަވަހަށް ހޮސްޕިޓަލަށް ގެންދެވޭތޯ ކަމަށާއި ނަމަވެސް ހަތަރު ސިގްނަލް ޖެއްސި ނަމަވެސް ކުރިއަށްދެވޭގޮތްނުވެ، ކުއްޖާގެ ޙާލަތު އިތުރަށް ގޯސްވާތީ ބަރުގޮނު އަޅަންޖެހުނީ ކަމަށް މީޑިއާ އޮފިޝަލް ވިދާޅުވިއެވެ.
އަދި ހަތަރު ސިގްނަލާއެކު ބަރުގޮނު ޖައްސައިގެން ވެސް އޭޑީކޭ ހޮސްޕިޓަލާއި ހަމައަށް ދިއުމަށް 15 މިނެޓް ހޭދަވިކަމުގައި ހިތާމައާއެކު މީޑިއާ އޮފިޝަލް ވަނީ ފާހަގަ ކޮށްފައެވެ.
