އެވޯޑް ޝޯވ ތަކުގައި ޕާފޯމް ކުރުމަށް އެންމެ ފުރަތަމަ ފީ އެއް ނެގި ތަރި އަކީ ސަލްމާން ހާން ކަމަށް އޭނާ ބުނެފިއެވެ.
މީކުރިން ގެނެސް ދިން ކޮފީ ވިތް ކަރަންގެ ޝޯވ އެއްގައި އަނިލް ކަޕޫރު އާއި ވެސް ކަރަން އެސުވާލު ކުރިއެވެ. ޖަވާބުގައި އަނިލް ބުނީ އޭނާ އަށް އެނގިފައިވާ ގޮތުގައި އެވޯޑް ޝޯވ އެއް ޕާފޯމް ކުރުމަށް އެންމެ ފުރަތަމަ ފީއެއް ނެގި މީހަކީ ސަލްމާން ހާން ކަމަށެވެ.
އެގޮތުން ދާދި މިދާކަށް ދުވަހު ހުދު ސަލްމާން ހާން ވެސް ވަނީ އެވާކަ ދައްކައިފައިއެވެ. މިދިއަ މަހުގެ 27 ވަނަ ދުވަހުގައި ބޭއްވި ޕްރެސް ކޮންފަރެންސް އެއްގައި ވާހަކަ ދައްކަމުން ސަލްމާން ވަނީ އެވާހަކަ އަށް އަލި އަޅުވާލާފައިއެވެ. މި ޕްރެސް ކޮންފަރެސް އަކީ މިއަހަރުގެ ފިލްމްފެއާ އެވޯޑްސް ހަފުލާ ހޯސްޓު ކުރުމާއި ގުޅޭ ގޮތުން ބޭއްވި ޕްރެސްކޮންފަރެންސް އެކެވެ. މިއަހަރުގެ ފިލްމް ފެއާ ހޯސްޓް ކުރާނީ ސަލްމާން ހާންއެވެ.
މި ޕްރެސް ކޮންފަރެންސް ގައި ވާހަކަ ދައްކަމުން ސަލްމާން ބުނީ އެއްފަހަރަކު އޭނާއަށް ފިލްމްފެއާ އެވޯޑުގައި ޕާފޯމްކުރަން ދައުވަތު ލިބުނެވެ. އަދި އެ ހަފުލާގައި އޭނާއަށް އެންމެ މޮޅު އެކްޓަރުގެ އެވޯޑު ލިބޭނެ ކަމަށް ހީވާ ގޮތަކަށް ޝޯ އިންތިޒާމްކުރި ފަރާތުން ކަންތައް ކުރި އެވެ. އަދި ޝޯވ އަށް އާއިލާގެ ގިން ބަޔަކާއި އެކުގައި ނަލަ ހެދިގެން ދިއަ ކަމަށްވެސް އޭނާ ވަނީ ބުނެފައިއެވެ.
ނަމަވެސް ކަންތަށްވީ ހީކުރި ގޮތާއި ހިލާފަށް ކަމަށް ސަލްމާން ވަނީ ބުނެފައިއެވެ. އަދި އެފަހަރުގެ ބެސްޓް އެކްޓަރުގެ އެވޯޑް ގެންދިއައީ ޖެކީ ޝްރޮފް ކަމަށް ވެސް އޭނާ ވަނީ ބުނެފައިއެވެ.
"އަހަރެން ގާތަށް ވަރަށް ރުޅި އައި. އެވޯޑް ބަލާދާން ގޮންޑިން ތެދުވެސްވިން. އަރައިގެން ރުޅިން ބެކް ސްޓޭޖް އަށް ގޮސް ބުނިން ނުކުރާނަމޭ ޕާފޯމްއެއް. އެ އެވޯޑް ހަފްލާގައި އަހަރެންގެ ޕާފޯމް އެއް ވެސް ހިމެނޭ. އަހަރެން ބުނިން ނުކުރާނަމޭ ޕާފޯމްއެއް."
ޝޯވ އިންތިޒާމް ކުރި ފަރާތުން އެކަމާއި ވަރަށް ބޮޑަށް ފިކުރު ބޮޑު ވެ ގޮތް ގުސްވި ކަމަށް އޭނާ ބުނެފައިއެވެ. އަދި އެއީ އެވޯޑް ޝޯވ ތަކުގެ އެންމެ މުހިންމު އެއްބައި ކަމުން އެމީހުން އޭނާއަށް ފައިސާ އޮފާ ކުރި ކަމަށް ވެސް ބުނެފައިއެވެ.
"އަހަރެން ބުނިން އޮޅުވާލީތީ ވެސް ޕާފޯމް ނުކުރާނަމޭ. ދެން އެމީހުން ބުނި ޝޯގައި ޕާފޯމްކުރާ މަތިން ފައިސާ ދޭނަމޭ. އަހަރެން ބުނިން ކިހާ ވަރެއްހާ ދޭނީ. ދެން އެމީހުން އަގެއް ބުނީމަ އަހަރެން ބުނިން ތިވަރަކުން ޕާފޯމެއް ނުކުރާނަމޭ. ފުރަތަމަ ކީ އަގުގެ ފަސް ގުނަ އަގު ބޮޑުކުރީމަ ދެން އެއްބަސްވީ. އެމީހުން ބުނި ނަމަ ނަމަ އިތުރު މީހެއް ކައިރީ ފައިސާ ދިން ވާހަކަ ނުބުނައްޗޭ. އަހަރެން ބުނިން ތިވާހަކަ ތި ބުނީ ގޮސް މީހެއް ކައިރގައިކަމަށް."
ސަލްމާން ބުނީ އޭނާ ޑީލް ހަދައިފައި ނިކުތް އިރު ދިމާވީ އަނިލް ކަޕޫރު އާއި ޖޫހީ ޗާވްލާ އާއި ކަމަށެވެ. އެއީ އެ އެވޯޑް ޝޯވގައި އެ އަހަރު ޕާފޯމް ކުރުމަށް އެބަސްވެފައިވާ ތަރިން ކަމަށްވެސް އޭނާ ބުންޔެވެ.
"އެމީހުން ފެނުން ތަނާ އަހަރެން ބުނިން. އަނިލް، ޖޫހީ، އަހަރެންނަށް މި ޝޯވ ގައި ޕާފޯމް ކުރުމަށް މިވެނި ވަރެއް ލިބިއްޖެއޭ. ކަލޭމެންނަށް ވެސް ލިބޭނެ އޭ އަވަހަށް ދާށޭ ވާހަކަ ދައްކަން." ހެމުން ހެމުން ސަލްމާން ބުންޏެވެ.
ސަލްމާން އެ އެވޯޑް ޝޯވ ބޭއްވި އަހަރު ނުބުނި ނަމަވެސް އޭނާ އެ އިޝާރާތް ކުރީ 1990 ވަނަ އަހަރު ބޭއްވި ފިލްމްފެއާ އެވޯޑް ޝޯވ އަށެވެ. ސަބަބަކީ ޖެކީ އެ ފަހަރު ބެސްޓް އެކްޓަރުގެ އެވޯޑް ހާސިލު ކުރުމުވެ. މި އެވޯޑު އޭނާ ގެންދިޔައީ "ޕަރިންދާ"ގައި އޭނާ ކުޅެފައިވާ ރޯލުންނެވެ. އެއީ 1989 ވަނަ އަހަރުގެ ފިލްމް އެކެވެ.
