ރައީސް އިބުރާހިމް މުހައްމަދު ސާލިހުގެ ރިޔާސީ ދައުރުގައި އިދިކޮޅު ޕާޓީއެއްގެ ދައުރު އަދާކުރަމުން އަންނަ ޕީޕީއެމް/ޕީއެންސީއަށްވެސް ސަރުކާރު ޒިންމާދާރުކުރާ ޕާޓީއެއްގެ ދައުރު އަދާކުރުމަށް ލިބުނު 5 އަހަރުގެ މުއްދަތު ނިމުމަކާއި ހަމައަށް އައިސް، އިތުރު 5 އަހަރަށް މަގުމަތި ވެގެން ދިޔަ ނުދިއުމަށްޓަކާ، އެޕާޓީއަށާއި ޕާޓީގެ އާންމު މެމްބަރުންގެ މިހާރުގެ އެންމެ ބޮޑު އުއްމީދަކަށް ވެގެން ގޮސްފައި މިވަނީ ކުރިޔަށް އޮތް ރިޔާސީ އިންތިޚާބެވެ.

އެއީ، ސިޔާސީ ޕާޓީއެއް އުފެދި މަސައްކަތް ކުރާންޖެހޭ ހަގީގީ މަގުސަދުވެސް މެއެވެ. ސަބަބަކީ ސިޔާސީ ޕާޓީތަކުން އިދިކޮޅު ހަރަކާތްތަކާއި އެއްކޮޅު ހަރަކާތަތައް ހިންގަމުން އައިނަމަވެސް މި ހުރިހާ ހަރަކާތެއްގެވެސް ހަގީގީ އަމާޒަކަށް ވާންޖެހެނީ ޕާޓީން އިންތިޚާބުތައް ކާމިޔާބުކޮށް، ގައުމަށް ޚިދުމަތް ކުރުން ކަމަށް ވާތީއެވެ.

މިގޮތުން ކުރިޔަށް އޮތް ރިޔާސީ އިންތިޚާބަށް އެންމެ 5 މަސްދުވަހަށް ވެފައިވާއިރު، ރާއްޖޭގެ ހުރިހާ ސިޔާސީ ޕާޓީތަކުންވެސް، އެކި ޕާޓީތަކުން އެކި ބީދައިން އިންތިޚާބަށް މުޑި ނަގަމުން ދާއިރު، ރިޔާސީ އިންތިޚާބަށް ޕާޓީތަކުގެ އެތެރޭގައި ހުރި ފޯރިއާއި، ކުރަމުންދާ މަސައްކަތްތަކާއި، އޮތް ވާދަވެރިކަމުގެ ތެރެއިން ފެންނަމުންދަނީ ވަރަށްވެސް ތަފާތު މަންޒަރުތަކެއް ކަމުގައި ދަންނަވާން ޖެހެއެވެ.

މިގޮތުން ފާހަގަވާން އޮތް އެންމެ މުހިންމު އެއްކަމަކީ އިދިކޮޅު ޕީޕިއެމްގެ ފަރާތުން ރިޔާސީ އިންތިޚާބުގައި ވާދަކުރުމަށް ޓިކެޓް ހަވާލުކޮށްފައިވާ އެ ޕާޓީގެ ކެނޑިޑޭޓް، ކުރީގެ ރައީސް ޔާމިން އަދިވެސް ޖަލުގައި އޮންނެވި އޮންނެވުމެވެ.

އަދި އެމަނިކްފާނުގެ މައްޗަށް މަތިމައްޗަށް ހިގަމުންދާ ޝަރީއަތްތަކާއި، އިސްތިއުނާފްގެ މަރުހަލާގައި ކުރިޔަށްދާ ހުކުމްތަކާއި، މި ހުރިހާ ހަގީގަތްތަކާއެކުވެސް އެމަނިކްފާނަށް ކުރިޔަށް އޮތް ރިޔާސީ އިންތިޚާބުގައި ވާދަކުރެއްވޭނެކަމަށް އަދިވެސް ބައެއް ފަރާތްތަކުން ކުރަމުންދާ އުއްމީދުތަކެވެ.

ހަމަ އެއާއެކު، އިދިކޮޅު ޕީޕީއެމްގެ މަތިފަޑީގައި ތިއްބެއްވި ބައެއް ފަރާތްތަކަށް، ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަ ކުރެއްވޭނެކަމަށް އޮތް އުއްމީދުތައް ފަނޑުވެ، ޕާޓީގެ ފަރާތުން އެހެން ރިޔާސީ ކެނޑިޑޭޓަކު ނެރުމަށް ޕާޓީގެ އެތެރޭގައި އޮތް ޕްރެޝަރާއެކު، އިދިކޮޅުގެ ރިޔާސީ ޓިކެޓަށް މުޑި ނަގައިގެން ޕާޓީގެ އެތެރޭގައި ތިބި ފަރާތްތަކުގެ މެދުގައި އޮތް ވާދަވެރިކަމާއި ބައިބައިވުމަކީވެސް އެންމެ ދަންނަ "ބޮޑު ސިއްރެއްގެ" ގޮތުގައި އޮތް، އާދަޔާ ޚިލާފު ވާދަވެރިކަމެއް ކަމުގައިވެސް މިފުރުސަތުގައި ދަންނަވާން ޖެހެއެވެ.

ޕީޕީއެމްގެ ކެނޑިޑޭޓަކު ކުރިޔަށް އޮތް ރިޔާސީ އިންތިޚާބުގައި ވާދަ ނުކޮށްފާނެ؟

އިދިކޮޅު ޕީޕީއެމް އިދިކޮޅުގައި އޮވެ 5 އަހަރުގެ ދައުރެއް ފުރިހަމަވެ، ކުރިޔަށް އޮތް ރިޔާސީ އިންތިޚާބުގެ ކެމްޕޭނަށް އަމާޒު ހިފާންޖެހުނު މުހިންމު ދަނޑިވަޅުގައި، ކަން ދިމާކުރި ގޮތުން ޕާޓީގެ ރިޔާސީ ކެނޑިޑޭޓަށް އޮންނަވަން ޖެހިވަޑައިގަތީ 11 އަހަރުގެ ޖަލު ހުކުމެއް ތަންފީޒުކުރައްވާން ޖަލުގައެވެ.

ނަތީޖާއެއްގެ ގޮތުން ރިޔާސީ އިންތިޚާބު ބޯމަތިވެފައި އޮތްނަމަވެސް ޕާޓީގެ އެންމެ މުހިންމު އެއް އަމާޒަކަށް ވާން ޖެހިފައި އޮތީ، ޕާޓީގެ ރިޔާސީ ކެނޑިޑޭޓް، ކުރީގެ ރައީސް ޔާމިން ޖަލުން މިނިވަންކުރުމަށް ކެނޑިނޭޅި މަސައްކަތް ކުރަމުން ގެންދިއުމެވެ.

އެހެންނަމަވެސް، ހަމަ އެއާއެކު، މިމުހިންމު މަގުސަދާއެކުވެސް، ކުރިޔަށް އޮތް ރިޔާސީ އިންތިޚާބުގެމަތިން ހަނދާން ނައްތާލުމަކީ ޕާޓީގެ ލީޑަރޝިޕަށްވެސް އަދި އާންމު މެމްބަރުންނަށްވެސް ކުރެވެން އޮތް ކަމެއް ނޫންކަންވެސް މިފުރުސަތުގައި ގަބޫލުކުރާން ޖެހެއެވެ. ސަބަބަކީ އިތުރު 5 އަހަރު ޕާޓީ މަގުމަތިވެގެން ދާން ޖެހިއްޖެނަމަ، އޭގެ ނަތީޖާއެއްގެ ގޮތުން އެތައްބަޔަކު ބިކަވެ، ކުރިމަގަށްޓަކާ ޕާޓީގެ ލީޑަރޝިޕްވެސް ހިމެނޭގޮތުން އެތައް ބަޔަކު ކުރަމުން ދިޔަ އެތަކެއް އުއްމީދުތަކެއް ފެނަށް ވެގެން ދާނެތީއެވެ.

އެހެންނަމަވެސް، އިސްވެ ދެންނެވުނު ހަގީގަތްތައް އެގޮތުގައި ހުރި ނަމަވެސް، އިދިކޮޅު ޕީޕީއެމްގެ އެތެރެއިން ފެންނާން އޮތީ މިއާއި ވަރަށްވެސް ބޮޑަށް ތަފާތު މަންޒަރެއް ކަމުގައި ދަންނަވާން ޖެހެއެވެ. މަތިމައްޗަށް ހިނގަމުންދާ ޝަރީއަތްތަކާއެކު، ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަކުރެއްވޭނެ ކަމުގެ އުންމީދު އިންތިހާއަށް ފަނޑުކޮށް އޮތް ނަމަވެސް، ޕާޓީގެ ރިޔާސީ ޓިކެޓް ރައީސް ޔާމިނަށް ރަސްމީކޮށް އަރުވާފައި ވުމުގެ ސަބަބުން، ޕާޓީގެ އެތެރޭގައި، ޓިކެޓަށް އޮތް ވާދެވެރިކަން ވަންހަނާ ކޮށްގެން ތިއްބެވުމަށް، އެ ހުވަފެން ދެކެމުންދާ ފަރާތްތަކަށްވެސް ވަނީ މަޖުބޫރު ވެފައެވެ.

މިގޮތުން، އިދިކޮޅު ޕީޕީއެމްގެ އިސް ބައެއް ފަރާތްތަކުން ދެކޭ ގޮތުގައި، ޕާޓީގެ ރިޔާސީ ޓިކެޓް އެހެން ބޭފުޅަކަށް ލިބި، ކުރިޔަށް އޮތް ރިޔާސީ އިންތިޚާބުގައި އިދިކޮޅު ޕީޕިއެމްގެ ރިޔާސީ ކެނޑިޑޭޓް ގައުމުގެ ވެރިކަމަށް ވަޑައިގެންފިނަމަ، ޖަލުން މިނިވަންވި ނަމަވެސް، އޭގެ ފަހުން ޕާޓީ އެތެރޭގައި އުފެދޭ ސިޔާސީ ވާދަވެރިކަމުގައި އަމިއްލަފުޅު ޕާޓީ ގެއްލިގެން ދާނޭކަމުގެ ކަންބޮޑުވުން ރައީސް ޔާމިންގެ ވިސްނުންފުޅުގައި އިންތިހާއަށް އެބަ އޮތެވެ.

ޖަލުގައި އޮންނެވި ނަމަވެސް، މި ހަގީގަތް މި ބީދައިން ރައީސް ޔާމިންގެ ވިސްފުޅުގައި ދައުރުވާން ނުޖެހޭ އެއްވެސް ސަބަބެއް ނެތްކަމުގައި ދަންނަވާން ޖެހެއެވެ. އޭގެ އެންމެ މުހިންމު އެއް ސަބަބަކީ، ރައީސް ޔާމިންގެ ވެރިކަމުގައި އޭރު ޕީޕީއެމްގެ ޒައީމްކަމުގައި ހުންނެވި، އެޕާޓީގެ ބާނީ ރައީސް މައުމޫނުގެ އަތްޕުޅުން ޕާޓީ ޖައްސަވައިގެންނެވި ގޮތް އެންމެ ރަގަޅަށް އެނގިލައްވާނެ އެއް ބޭފުޅަކީ ޚުދު ރައީސް ޔާމިންކަމަށް ވާތީއެވެ.

އެއަށްފަހު، ދައުރެއް ބަދަލުވެ، ރައީސް އިބުރާހިމް މުހައްމަދު ސާލިހު ވެރިކަމަށް ވަޑައިގެންނެވުމަށްފަހު، ނުހަނު ވަރުގަދަކަމާއެކު އޮތް އެމްޑީޕީ، އެޕާޓީގެ 15 އަހަރުވީ ރައީސް، ކުރީގެ ރައީސް ނަޝީދުގެ އަތްޕުޅުން އިބުރާހިމް މުހައްމަދު ސާލިހު ޖައްސަވައިގެންނެވި ގޮތާއި، އެތައް ބައެއްގެ ތާއީދު އޮތް ނަޝީދު ހަވާސާ ވެގެންދާ ގޮތުގެ މަންޒަރުތަކަކީ މިއަދުވެސް ތަމްސީލުވަމުންދާ ސާފު ހަގީގަތްތަކެވެ.

އެހެންކަމުން، ކުރިޔަށް އޮތް ރިޔާސީ އިންތިޚާބުގައި ރައީސް ޔާމިނަށް ވާދަ ނުކުރެއްވޭ ހާލަތެއްގައި، އެމަނިކާފަށް އެންމެ ރަގަޅު ފޯމިއުލާއަކީ، އަމިއްލަފުޅު ޕާޓީ އަތްޕުޅުން ބީވެގެން ނުދާނޭ ފޯމިއުލާއަކަށް މަސައްކަތް ކުރެއްވުންކަމީ ކަށަވަރުވެ ޔަގީންވާން އޮތް ކަމެކެވެ. އަދި އެއާއެކު، އަމިއްލަފުޅު ޕާޓީ ގެއްލިގެން ނުގޮސް، ކުރިޔަށް އޮތް ދައުރުގައި ޖަލުންވެސް މިނިވަން ވެވަޑައިގެންނެވޭނެ ފޯމިއުލާއެއް ހޯއްދެވިއްޖެނަމަ އެއީ އަދި ރައީސް ޔާމީނަށް "މާމޮޅު" ފޯމިއުލާއެއްގެ ގޮތުގައި އެމަނިކްފާނަށް ވިސްނިވަޑައިގަންނަވަމުން ދާކަމަށްވެސް ޕީޕީއެމްގެ ލީޑަރޝިޕްގެ ބައެއް ބޭފުޅުން ދެކެވަޑައިގަންނަވައެވެ.

މިހާލަތުގައި، ކުރިޔަށް އޮތް ދައުރުގައި ރައީސް ޔާމިން ޖަލުން މިނިވަންކޮށްދޭނެ ކަމުގެ ޔަގީންކަން ދެއްވާ ކެނޑިޑޭޓަކަށް އެންޑޯސްމަންޓް ދެއްވާ، އިދިކޮޅު ޕީޕީއެމްގެ ކެނޑިޑޭޓަކުން ކުރިޔަށް އޮތް ރިޔާސީ އިންތިޚާބަށް ނުނެރުއްވުމަށް ރައީސް ޔާމިން ނިންމެވުމަކީ، މިހާރު ފެންނަމުންދާ މަންޒަރުތަކަށް ބަލާއިރު ވަރަށްވެސް ގާތްތަކަމެއް.

ޕީޕިއެމް ލީޑަރޝިޕްގެ އިސް ބޭފުޅަކުން "ޚަބަރު އޮންލައިން" އާއި ވާހަކަ ދައްކަވަމުން ވިދާޅުވެފައި ވެއެވެ.

ޓިކެޓަށް ވާނެ ގޮތެއް ނޭނގި މިހާރުވެސް ޕާޓީ އޮތީ ބައިބައިވެފަ؟ އެއްބަޔަކު ތިބީ ގާސިމްގެ ފަހަތްޕުޅުގަ!

ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވޭނެކަމަށް ބަލާ، ޕާޓީގެ އެތެރޭގައި ރިޔާސީ ޓިކެޓަށް އޮތް ވާދަވެރިކަން މިހާރުވެސް އޮތީ "ހައްދުން ނެއްޓިފައި" ކަމުގައި "ޚަބަރު އޮންލައިން"އާއި މާއުލޫމާތު ހިއްސާކުރި ލީޑަރޝިޕްގެ ބައެއް ބޭފުޅުން ވިދާޅުވެފައި ވެއެވެ.

މިގޮތުން، މި ރިޕޯޓަށް މައުލޫމާތު ދިން ފަރާތުން ވިދާޅުވި ގޮތުގައި، ރައީސް ޔާމިނަށް ކުރިމަތި ނުލެވޭ ހާލަތެއްގައި، ރިޔާސީ ޕްރައިމަރީއަކުން، އިދިކޮޅު ޓިކެޓް ލިބުން ދެން އެންމެ ގާތްކަން ބޮޑު ފަރާތަކީ މާލޭ ސިޓީ ކައުންސިލްގެ މޭޔަރު ޑރ. މުއިއްޒުއެވެ. މިގޮތުން، ރިޔާސީ ޓިކެޓަށް ޕާޓީގެ އެތެރޭގައި އޮތް ވާދަވެރިކަމުގައި، ޑރ. މުއިއްޒަށް ތާއީދު ކުރުމާމެދު ލީޑަރޝިޕްގެ މެދުގައި ބައިބައިވުން އޮތް ނަމަވެސް، ޕީޕީއެމްގެ ސެނެޓާއި، ޕީޕީއެމް/ޕީއެންސީގެ ޖޮއިންޓް ކައުންސިލްގައި ޑރ. މުއިއްޒަށް އޮތް ތާއީދު ބޮޑު ކަމުގައި މައުލޫމާތު ހިއްސާކުރި ލީޑަރޝިޕްގެ އިސް ބޭފުޅާ ފާހަގަ ކޮށްފައި ވެއެވެ.

އެހެންނަމަވެސް، ޕީޕީއެމްގެ ކެނޑިޑޭޓަކު ރިޔާސީ އިންތިޚާބުގައި ވާދަކުރުމަށް ރައީސް ޔާމިނަށް އޮތް ފުރުސަތު ގެއްލި، އެފަދަ ނިންމުމަކާ ހަމައަށް ޕާޓީއަށް ދާންޖެހިއްގެ ހާލަތެއްގައި، ޕާޓީގެ ރިޔާސީ ޓިކެޓް ހޯއްދެވުމަށް މީގެކުރިން އުއްމީދު ކުރައްވަމުން ގެންދެވި ބައެއް ބޭފުޅުން މިހާރު އެއުއްމީދުތައް ދޫކޮށްލަވާފައިވާކަންވެސް ވަނީ ކަށަވަރުވެ ޔަގީން ކުރެވިފައެވެ. އޭގެތެރޭގައި ހިމެނޭ އެއް ބޭފުޅެއްގެ ގޮތުގައި "ޚަބަރު އޮންލައިން"އާއި މައުލޫމާތު ހިއްސާކުރި ފަރާތުން ފާހަގަ ކުރައްވާފައިވަނީ ޕީޕީއެމްގެ ނާއިބު ރައީސް އައްސާން މައުމޫނެވެ.

ގާސިމް އިބުރާހިމް ރިޔާސީ އިންތިޚާބުގައި ވާދަކުރުމަށް ނިންމެވި ހިސާބުން، މި ދެންނެވުނު ބޭބޭފުޅުން ކުޅުއްވަމުން އެ ގެންދަވަނީ ގާސިމަށް. އޭގެ ތެރޭގައި ހިމެނޭ އައްސާން މައުމޫންއާއި، އިބުރާހިމް ޝުޖާއުއާއި، ނައިފަރު ދާއިރާމެމްބަރު ޝިޔާމްގެ އިތުރުން ޕީޕީއެމް ހިންގުމާއި ހަވާލުވެ ހުންނެވި އަބުދުއްރަހީމްވެސް.

އިދިކޮޅު ޕީޕީއެމްއަށް ރިޔާސީ ކެނޑިޑޭޓަކު ނުނެރެވިއްޖެ ހާލަތެއްގައި، ލީޑަރޝިޕްގައި ހިމެނިވަޑައިގަންނަވާ ގިނަ ބޭފުޅުން ޖުމުހޫރީ ޕާޓީގެ ކެނޑިޑޭޓް ގާސިމް އިބުރާހިމްއާއި ބައިއަތު ހިފާނެކަމަށް މޭރުން ކުރައްވަމުން، "ޚަބަރު އޮންލައިން"އާއި މައުލޫމާތު ހިއްސާ ކުރި ފަރާތުން ވިދާޅުވެފައި ވެއެވެ.

އިސްވެ ދެންނެވުނު މައުލޫމާތަށް ރަގަޅަށް ވިސްނާ ނަޒަރެއް ހިންގާލާއިރު ފާހަގަވާން އޮތްކަމަކީ، އިދިކޮޅު ޕީޕީއެމްގެ އެތެރޭގައި އޮތް ރިޔާސީ ޓިކެޓްގެ ވާދަވެރިކަން އެންމެ ދަންނަ "ބޮޑު ސިއްރެއްގެ" ގޮތުގައި އޮތް ނަމަވެސް، މި ވާދަވެރިކަމުގެ ހުޅު މިހާރު ވަރަށްވެސް ބޮޑަށް ރޯވެގެން ގޮސްފައިވާ ކަމެވެ. މިގޮތުން ޕީޕީއެމްގެ ރިޔާސީ ޓިކެޓް ޑރ. މުއިއްޒަށް ހޯދާ ދިނުމަށް މަސައްކަތް ކުރާކަމުގެ ތުހުމަތު ކުރެވި، ޕީޕީއެމްއަށް ނިސްބަތްވާ މާލޭ ސިޓީ ކައުންސިލްގެ މެދު ހެންވޭރު ދާއިރާގެ މެމްބަރު އާދަމް ރަމީޒުގެ ސުލޫކީ މައްސަލައެއް ޕީޕީއެމްއިން ބަލަން ފެށުމާއެކު އޭނާ މިހާރުވަނީ ޕާޓީން އިސްތިއުފާ ދީފައެވެ.

ޕީޕީއެމްގެ އިސް ބައެއް ފަރާތަތަކުން ވިދާޅުވާ ގޮތުގައި މުއިއްޒުއަށް ޕާޓީގެ ޓިކެޓް ލިބުނަ ނުދިނުމަށް ޕާޓީގެ އެތެރޭގައި ހިންގުނު މި ހަރަކާތުގެ އިސް ސަފުގައި ތިއްބެވީވެސް ލީޑަރޝިޕްގެ ބައެއް ބޭފުޅުންނެވެ. އޭގެ ތެރޭގައި ފާހަގަ ކޮށްފައިވާ ބައެއް ފަރާތްތަކަކީ، ޕާޓީގެ ކެނޑީޑޭޓަކު ނެތް ހާލަތެއްގައި، ގާސިމް އިބުރާހިމަށް ތާއީދު ކުރާނޭކަމަށް މިހާރު ބެލެވޭ، ޕީޕީއެމްގެ ނާއިބު ރައީސް އައްސާން މައުމޫންއާއި، މާލޭ ސިޓީގެ ކައުންސިލަރ އިބުރާހިމް ޝުޖާއުގެ އިތުރުން ނައިފަރު ދާއިރާގެ މެމްބަރު އަހުމަދު ޝިޔާމް ފަދަ ބޭބޭފުޅުންނެވެ.

ހަމަ އެއާއެކު، ރައީސް ޔާމިނަށް ވާދަ ނުކުރެވޭ ހާލަތެއްގައި ރިޔާސީ ޓިކެޓަށް ޕީޕީއެމްގެ އެތެރޭގައި އެންމެ ބޮޑު ތާއީދެއް އޮތްކަމަށް ބެލެވޭ، މޭޔަރު ޑރ. މުއިއްޒުއާއި ދެކޮޅަށް ޕާޓީގެ އެތެރޭގައި ކުރެވޭ މަސައްކަތްތަކުގެ ފަހަތުގައި ތިއްބެވި ބައެއް ބޭފުޅުންގެ ގޮތުގައި، ރައީސް ޔާމީންގެ ގާނޫނީ ވަކީލެއްގެ ގޮތުގައި ހުންނެވި، ކުރީގެ ނާއިބު ރައީސް ޑރ. މުހައްމަދު ޖަމީލް އަހުމަދާއި، އެ ފެކްޝަނަށް ނިސްބަތްވާ، މާވަށު ދާއިރާގެ މެމްބަރު މުހައްމަދު ސައީދުވެސް މައުލޫމާތު ހިއްސާކުރެއްވި ފަރާތުން ފާހަގަ ކޮށްފައި ވެއެވެ.

އެހެންނަމަވެސް މި ދެބޭފުޅުން، ގާސިމް އިބުރާހިމްއަށް ތާއީދު ކުރެއްވުމުގެ ބަދަލުގައި ގެންދަވަނީ ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަކުރެއްވޭނެ ކަމުގެ ހުވަފެން ދައްކަވަމުން.

"ޚަބަރު އޮންލައިން"އާއި މައުލޫމާތު ޙިއްސާ ކުރެއްވި އިދިކޮޅު ޕީޕީއެމްގެ ލީޑަރޝިޕްގެ ބޭފުޅަކު ވިދާޅުވެފައި ވެއެވެ.

ކޮންމެއަކަސް، ސާފުވާން އޮތް އެއް ހަގީގަތަކީ، ކުރިޔަށް އޮތް ރިޔާސީ އިންތިޚާބުގެ ކުރިން ރައީސް ޔާމިން މިނިވަންވެ ވަޑައިގެންފިނަމަ، ޕާޓީގެ ޓިކެޓްގައި އެމަނިކުފާނު ރިޔާސީ އިންތިޚާބުގައި ވާދަކުރައްވާނޭ ކަމެވެ. އެހެންނަމަވެސް، މިއީ ބިލާހަކަށްވެ، ޕާޓީއަށް އެހެން ކެނޑިޑޭޓަކު ދެއްކުން ލަސްވަމުން ދާވަރަކަަށް، މިހާރުވެސް ޕާޓީގެ އެތެރޭގައި އޮތް ވާދަވެރިކަމުން އުފެދުމެންދާ ބައިބައިވުން ބޮޑުވެ، މިބައިބައިވުމުން އުފައްދާ ފިތުނައިގެ އަލިފާނުގެ ހުޅު އިތުރަށް ރޯވެ ފެތުރެމުން ދާނޭކަމީވެސް ކަށަވަރުވެ ޔަގީންވާން އޮތް ކަމެވެ.

އަދި އެފަދަ ހާލަތެއްގައި އިދިކޮޅު ޕީޕީގެ ލީޑަރޝިޕްގެ ގިނަ ބޭފުޅުން ގާސިމް އިބުރާހިމަށް ތާއީދު ކުރެއްވުމަކީ ގާތްކަމެއް ކަމުގައި ބެލެވުނުނަމަވެސް، ޖަލުގައި އޮންނެވި ރައީސް ޔާމިނަށް އެންމެ ރަގަޅު ފޯމިއުލާއަކީ، އެމަނިކާފަނަށް ވާދަ ނުކުރެއްވޭ ހާލަތުގައި އަދިވެސް ރައީސް ސާލިހު ވެރިކަމުގައި ހުންނަވާ، ކުރިޔަށް އޮތް ދައުރުގައި މިނިވަންވެވަޑައިގެން، އަމިއްލަފުޅު ޕާޓީވެސް މުށުތެރޭގައި ބާއްވަވާ، އިދިކޮޅު ލީޑަރެއްގެ ގޮތުގައި ދެމިހުރުންކަމަށް ދެކޭ ފަރާތްތައްވެސް ވަރަށްވެސް ގިނައެވެ.

އަދި މިބީދައިން ރައީސް ޔާމިން ވިސްނަވާ، މިމަގުން އެމަނިކުފާނު ހިންގެވުމަކީ ދުރުގައި އޮތްކަމެއް ކަމުގައި ދެންނެވޭކަށްވެސް ނެތެވެ.