ޕީޕީއެމްއަށް ނިސްބަތްވާ މާލޭ ސިޓީ ކައުންސިލްގެ މެދު ހެންވޭރު ދާއިރާގެ މެމްބަރު އާދަމް ރަމީޒުގެ ސުލޫކީ މައްސަލައެއް ޕީޕީއެމްއިން ބަލަން ފަށާފައިވާކަމަށް އަޑުފެތުރިފައި ވަނިކޮށް ރަމިޒް އެޕާޓީން ވަކިވެއޖެއެވެ.
އޭނާ އެޕާޓީން ވަކިވުމަށް ނިންމައި ފޮނުއްވި ސިޓީއެއްވެސް މިހާރުވަނީ ޢާންމުވެފައެވެ. އެސިޓީ ލިބިފައިވާ ކަމަށް ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލު ވަނީ މީޑިއާއަށް ޔަޤީންކޮށްދެއްވާފައެވެ.
ރަމީޒްގެ ސިޓީގައި ބުނެފައިވަނީ މިވަގުތު ޕާޓީގެ ހަރަކާތްތަކުގައި އުޅެވެން ނެތުމުގެ ސަބަބުން ޕާޓީން ކެނޑުމަށް އަޅުގަނޑު ނިންމާކަމަށެވެ. އަދި ޕީޕީއެމްގެ ދަފުތަރުން އޭނާގެ ނަން ވަކިކޮށް ދެއްވުން އެދޭކަމަށެވެ. ޕީޕީއެމްގެ ރައީސް ޢަބްދުﷲ ޔާމީން ޢަބްދުލްޤައްޔޫމަށް އެޑްރެސްކޮށް ޒަމީރު ފޮނުވި ސިޓީގައި މާގިނަ ވާހަކަތަކެއް ނެތެވެ.
ޕީޕީއެމްގެ ސުލޫކީ ކޮމިޓީން ރަމީޒްގެ މައްސަލައެއް ބަލަން ފެށީ، ކުރިޔަށް އޮތް ރިޔާސީ އިންތިޚާބަށް އިދިކޮށް ޕީޕީއެމްގެ ޓިކެޓްގައި ނިކުތުމަށް މާލޭ ސިޓީގެ ކައުސިލަރ އާދަމް ރަމީޒު މޭޔަރު މުއިއްޒުއަށް ކެމްޕޭން ކޮށްދޭކަމުގެ ތުހުމަތުގައެވެ.
މި މައްސަލާގައި ރަމީޒް ސުލޫކީ ކޮމިޓީއަށް އިއްޔެ މެންދުރު ހާޒިރުކޮށް ވަނީ ބަޔާންވެސް ނަގާފައެވެ. ޚަބަރު އޮންލައިނަށް މައުލޫމާތު ލިބިފައިވާ ގޮތުގައި، ޕީޕީއެމްގެ ރިޔާސީ ކެންޑިޑޭޓަކު ހުންނަވަނިކޮށް އެހެން ފަރާތަކަށް ކެމްޕޭން ނުކުރާކަމަށް ހެކިބަސް ދެއްކެވުމަށް ރަމީޒުވަނީ ޕީޕިއެމްގެ ބައެއް ސެނެޓަރުން ސުލޫކީ ކޮމިޓީއަށް ހުށަހަޅުއްވާފައެވެ.
އިދިކޮޅު ޕީޕީއެމް އަދި ޕީއެންސީގެ ލީޑަރޝިޕުން ސުލޫކީ ކޮމިޓީއަށް ހުށަހެޅުނު މިމައްސަލާގައި ސުލޫކީ ކޮމިޓީން ރަމީޒާއި ކޮށްފައިވާ ސުވާލަކީ ޔާމިންގެ ކެނޑިޑަސީއަށް އަސަރު ކުރާގޮތަށް ޕީޕީއެމްގެ ސެނެޓަރުންނާއި ވާހަކަ ދައްކާ އަދި އެކި ތަންތަނުގައި ވާހަކަ ދައްކާތޯއެވެ.
ޚަބަރު އޮންލައިންއާއި މައުލޫމާތު ހިއްސާކުރި ބައެއް ފަރާތްތަކުން ވިދާޅުވި ގޮތުގައި ރަމީޒު ސުލޫކީ ކޮމިޓީއަށް ހާޒިރު ކޮށްފައިވަނި، 11 އަހަރަށް ޖަލަށް ލާފައިވާ ޕީޕިއެމްގެ ރައީސް އަދި ކުރީގެ ރައީސް ޔާމިންގެ ނޯޓަކުން އެމައްސަލަ ބެލުމަށް އަންގަވައިގެންނެވެ. އަދި ރަމީޒުގެ މައްސަލަ ސުލޫކީ ކޮމިޓީން ބެލި ނަމަވެސް، މިމައްސަލައިގެ ހަގީގީ އަމާޒަކީ މޭޔަރު މުއިއްޒު ޕީޕިއެމްގެ ޓިކެޓް ހޯއްދެވުމަށް މަސައްކަތް ކުރައްވަމުން ގެންދަވާތީ މުއިއްޒުގެ ފިޔަ ކޮށާލުން ކަމަށްވެސް ޕީޕީއެމްގެ އިސް ބައެއް ބޭފުޅުން ޚަބަރު އޮންލައިނާއި މައުލޫމާތު ހިއްސާކުރަމުން ވިދާޅުވެފައި ވެއެވެ.
