ރާއްޖޭގެ ބޯޑަރ ސެކިއުރިޓީގެ މަސައްކަތަށް ބޭނުންވާ ބައެއް ސާމާނާއި އެހެނިހެން، ޖަޕާނުން ރާއްޖެއަށް ފޯރުކޮށް ދިނުމުން ރާއްޖޭގެ ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީ އެޤައުމަށް ޝުކުރު އަދާކުރައްވައި ތައުރީފްކުރައްވައިފިއެވެ.
މިއީ 2020ވަނަ އަހަރު ރާއްޖެއާއި ޖަޕާނާއި ދެމެދު ސޮއިކޮށްފައިވާ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމްގެ ދަށުން ހަދިޔާކުރި ތަކެއްޗެވެ.
މިނިސްޓަރ ވިދާޅުވީ މިއީ ރާއްޖޭގެ ބޯޑަރ ސެކިއުރިޓީގެ ވަރުގަަދަކުރުމަށް ޖަޕާނުން ރާއްޖެއަށް ފޯރުކޮށްދިން އެހީއެއްކަކަމަށެވެ. އަދި މިއާއެކު ކުއްލި ހާލަތްތަކުގައި މަސައްކަތްކުރުމަށް ފަސޭހަވެ ބޯޑަރުގެ ރައްކާތެރިކަން ކަށަވަރުކުރެވިގެންދާނެކަމށް މިނިސްޓަރ މާރިޔާ އަޙްމަދު ދީދީ ވިދާޅުވިއެވެ.
މި އެހީ ޖަޕާނުގެ ފަރާތުން ރާއްޖެއާ ޙަވާލުކުރުމަށް ބޭއްވި ރަސްމިއްޔާތު އޮތީ މޯލްޑިވްސް ކަސްޓަމްސް ބިލްޑިންގްގައެވެ. މި ރަސްމިއްޔާތުގައި މިނިސްޓަރ މާރިޔާ ވިދާޅުވީ ރާއްޖެއަށް އެތެރެވެވޭ ކޮންމެ ބަނދަރެއްގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ޤައުމީ ދިފާޢީ ބާރާއި ކޯސްޓްގާޑައި ކަސްޓަމްސްއާއި އެހެނިހެން އިދާރާތައްވެސް ގުޅިގެން މަސައްކަތްކުރުމަށް ދައުރެއް އޮންނާނެކަމަށެވެ. އަދި ބޯޑަރު ރައްކާތެރިކުރުމަށް މި އިދާރާތަކަށް ޖަޕާނު ސަރުކާރުން އަންނަނީ އެހީތެރިކަން ފޯރުކޮށްދެމުންކަމަށް މާރިޔާ ވިދާޅުވިއެވެ.
ޖަޕާނުން ދިން އެހީގެތެރޭގައި އެއްގަމުގައި ދުއްވާ 4 އުޅަނދަކާއި ބައެއް އުޅަނދުތަކުގެ ސްޕެއަރ ޕާޓްސްއާއި، ކެމިކަލްއާއި ގޮވާ ޒާތުގެ ތަކެއްޗާއި މަސްތުވާތަކެތި ދެނެގަންނާނެ 8 ސްޕެކްޓްރޮ މީޓަރ ހިމެނެއެވެ. އަދި ވަގު ނޫޓް ދެނެގަންނާނެ 4 ޑިޓެކްޓަރާއި 2 މޯބައިލް އެކްސްރޭ މެޝިންވެސް ވަނީ ހަދިޔާކޮށްފައެވެ.
މިތަކެތި ރަމްޒީގޮތުން ކަސްޓަމްސްއާ ހަވާލުކޮށްދެއްވީ ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޓެކްއުޗި މިޑޯރިއެވެ. ތަކެއްޗާއި ހަވާލުވެވަޑައިގަތީ މިނިސްޓަރ މާރިޔާ އަޙްމަދު ދީދީއެވެ.
