އެމްޑީޕީގެ ޑެޕިއުޓީ ޕީޖީ ލީޑަރު ހުސެއިން ޝަހީމް، އަނދުން ހުސެއިން އުޅުއްވަނީ އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު މަރާނުލެވިގެންތޯ، ނަޝީދު ހުސެއިންއާއި ސުވާލު ކުރައްވައިފިއެވެ.

ނިމިދިޔަ ގުރައިދޫ ދާއިރާގެ ބައި އިލެކްޝަންގައި، އެމްޑީޕީގެ ފަރާތުން ވާދަކުރި ކެނޑިޑޭޓަށް ތާއީދުނުކޮށް، ޕީޕީއެމްގެ ކެނޑިޑޭޓަށް ރައީސް ނަޝީދާއި އެމަނިކުފާނުގެ ފިކުރެއްގެ ދިރުމުގެ ޓީމުން ކެމްޕެއިން ކޮށްދެއްވިކަމަށް މަޑުއްވަރީ ދާއިރާގެ މެމްބަރު އާދަމް ޝަރީފްވަނީ މަޖިލީހުގައި ވިދާޅުވެފައެވެ. ނަމަވެސް މިވާހަތަކަށް އާދަމް ޝަރީފް ދެއްކެވުމުން ފަރެސްމާތޮޑާ ދާއިރާގެ ޕީޕީއެމްގެ މެމްބަރު ހުސެއިން މުހައްމަދު ލަތީފްވަނީ ރައީސް ނަޝީދުގެ ފަރާތުން އެއިންތިޚާބުގައި އެއްވެސް އެއްބާރުލުމެއް ނުލިބޭކަމަށް ބުނެފައެވެ. އަދި ނަޝީދާއި ވެސް އެއްވެސް ޕާޓީއަކާއިއެކުވެސް އަދި އެއްވެސް އެއްބަސްވުމެއް ހެދިފައި ނުވާނެކަމަށެވެ.

މިވާހަތަކަށްފަހު މިއަދު މަޖިލީހުގެ ވަޓްސްއަޕް ގްރޫޕަށް ހުސެއިން ފޮނުވި މެސެޖުގައި ވިދާޅުވީ އާދަމް ޝަރީފަށް މަޖިލީހުގެ ޖަލްސާގައި ރައީސް ނަޝީދުގެ ފިކުރެއްގެ ދިރުމުން ގުރައިދޫ ދާއިރާގެ ބައި އިލެކްޝަންގައި އެއްބާރުލުން ދެއްކިކަމަށް ވިދާޅުވެވުނީ ދޫ އޮޅިގެންކަމަށެވެ. އަދި އާދަމް ޝަރީފެކޭ އެއްގޮތަށް އޭނާވެސް ވަރަށް ރޯދަ ވަރުބަލިވާނެކަމަށް ހުސެން ވިދާޅުވިއެވެ.

ހުސެއިން މުހައްމަދު ލަތީފްގެ ވާހަތަކާއި ގުޅިގެން އެމްޑީޕީގެ ޕީޖީ ގްރޫޕްގެ ޑެޕިއުޓީ ލީޑަރު ހުސެއިން ޝަހީމް، އަނދުން ހުސެއިން ވިދާޅުވީ ގުރައިދޫ ދާއިރާގެ ބައި އިލެކްޝަންގައި ކަންކަން ހިނގާދިޔަ ގޮތް އާދަމް ޝަރީފް އޭނާއަށް ވަރަށް ސާފުކޮށް ކިޔާދެއްވި ކަމަށެވެ. ހުސެއިންގެ ވާހަކަތަކާއި ގުޅިގެން ރައީސް ނަޝީދު ވިދާޅުވީ ހުސެއިިން އުޅުއްވަނީ އެމަނިކުފާނު މަރާނުލެވިގެންތޯ ސުވާލު ކުރައްވާފައެވެ.

ހުސެއިން އަޅުގަނޑު މަރާނުލެވިގެން ކަންބޮޑުވަނީތޯ؟

– ރައީސް ނަޝީދު އަނދުން ހުސެއިންއަށް އަމާޒުކޮށް ވިދާޅުވިއެވެ.

ރައީސް ނަޝީދުގެ ސުވާލާއި ގުޅިގެން ހުސެއިން ވިދާޅުވީ އޭނާއަކީ މީހުންގެ މަރު ހިފުމުގެ އެއްވެސް ބާރެއް އޮތް މީހެއް ނޫންކަމަށެވެ. އެކަން މާތް ރަސްކަލާންގެ ހަވާލު ކުރައްވާފައިވާ ވަކި ފަރާތެއް ވާކަމަށާއި، އެމީހެއްގެ މަރު އައިސްޖެހުމުން އެކަން އެއޮންނަ ގޮތަކަށް ނިމިގެންދާނެކަމަށެވެ.

ގެ ކުރިންވެސް ރައީސް ނަޝީދު ވަނީ އެކި ފަހަރުމަތީން އެމަނިކުފާނަށް ދެވުނު ބޮމުގެ ހަމަލާއާއި، ދޭ ސެކިއުރިޓީއާއި ގުޅިގެން އަނދުން ހުސެއިން ދަައްކަވާ ވާހަކަތަކަށް ރައްދު ދެއްވައި ކަންބޮޑުވުން ފާޅުކޮށްފައެވެ. އެގޮތުން މިއަހަރުގެ ފެބްރުއަރީ މަހު މަޖިލީހުގައި ވާހަކަ ދައްކަމުން ހުސެއިން ވިދާޅުވީ ރައީސް ނަޝީދަށް ދައުލަތުން 23 މިލިއަން ރުފިޔަގެ ބަޖެޓެއް އެމަނިކުފާނުގެ ސެކިއުރިޓީއަށް ހަރަދުކުރި ނަމަވެސް އެމަނިކުފާނު ދަނީ ސަރުކާރަށް ޖެއްސުންވާ ގޮތަށް ފުރައްސާރަވާ ގޮތަށް ކަންކަން ކުރަމުން ކަމަށެވެ.

އަނދުން ހުސެއިން އެފަދައިން ވިދާޅުވުމުން ރައީސް ނަޝީދު އޭނާއަށް ހަނދާންކޮށްދެއްވީ އެމަނިކުފާނު އަވަހާރަކޮށްލުމަށް ދިން ބޮމުގެ ހަމަލާއެވެ.