ރަޝިއާއިން ޔޫކުރެއިންގައި ކުރަމުންދާ ހަނގުރާމައާއި ފާޅުގައި ދެކޮޅު ހެދުމުގެ ކުށުގައި، ރަޝިއާގެ ހިއުމަން ރައިޓްސް އެކްޓިވިސްޓެއް ކަމަށްވާ، އަދި ޕުޓިންގެ ސިޔާސަތުތަކަށް ފާޑުވިދާޅުވަމުން ގެންދަވާ ލާޑިމިރު ކަރަ މުރުޒާ 25 އަހަރަށް ޖަލަށް ލާން ރަޝިއާގެ މޮސްކޯ ސިޓީ ކޯޓުން ހޯމަ ދުވަހު ހުކުމް ކޮށްފިއެވެ.
ރަޝިއާގެ ކޯޓުގެ ހުކުމަށްފަހު ކަރަ މުރުޒާގެ ގާނޫނީ ވަކީލު ސީއެންއެންއާއި ވާހަކަ ދައްކަވަމުން ވިދާޅުވެފައިވަނީ މިހުކުމް މަތީ ކޯޓުގައި އިސްތިއުނާފް ކުރާނޭ ކަމުގައެވެ.
ބޭރުގެ މީޑިއާތަކުން ރިޕޯޓު ކޮށްފައިވާ ގޮތުގައި، މި ހުކުމާއި ގުޅޭގޮތުން އެއްވެސް ކޮމެންޓެއް ކުރުމަށް ކްރެމްލިންއިން ވަނީ ދެކޮޅު ހަދާފައެވެ.
"އެގިލައްވާނެ، އަހަރެމެން ކޯޓުގެ އެއްވެސް ހުކުމަކާއި ގުޅޭގޮތުން ވާހަކައެއް ނުދައްކާނެ،" ކްރެމްލިންގެ ތަރުޖަމާން ޑިމިޓްރީ ޕެސްކޯވް ނޫސްވެރިންނާއި ވާހަކަ ދައްކަވަމުން ވިދާޅުވެފައި ވެއެވެ.
ރަޝިއާގެ ސަރުކާރުން ކަރަ މުރުޒާ ހައްޔަރު ކޮށްފައިވަނީ މީގެ އަހަރެއް ކުރިން، ސީއެންއެންއިން އޭނާއާއި ކުރިން އިންޓަރވިއުއެއްގައި ރަޝިއާގެ ރައީސް ލާޑިމިރު ޕުޓިންއަށް ފާޑު ވިދާޅުވިތާ ކުޑަ އިރުކޮޅެއްގެ ތެރޭގައެވެ. މި އިންޓަރވިއުގައި އޭނާ ވިދާޅުވެފައިވަނީ ރަޝިއާގެ ސަރުކާރަކީ "މުޖުރިމުންގެ ސަރުކާރެއް" ކަމުގައެވެ.
ރަޝިއާއިން އޭނާ ޖަލަށް ލާން ހުކުމް ކުރުމާއި ގުޅިގެން އެމްނެސްޓީ އިންޓަރނޭޝަނަލްއިން ވަނީ މިހުކުމް ކުށްވެރި ކޮށްފައެވެ. އަދި ބުނެފައިވަނީ އޭނާ ޖަލަށް ލާފައިވަނީ "ހަމަ އެކަނި އޭނާގެ ސިޔާސީ ފިކުރުގެ ސަބަބުން" ކަމުގައެވެ.
އަދި އެމްނެސްޓީ އިންޓަރނޭޝަނަލްއިން ވަނީ ކާރާ މުރުޒާ ވަގުތުން ދޫކޮށްލުމަށް ރަޝިއާގެ ސަރުކާރަށް ގޮވާލާފައެވެ.
އެމްނެސްޓީގެ އިތުރުން، ޔޫއެން ހައި ކޮމިޝަނަރ ފޯރ ހިއުމަން ރައިޓްސް ޗީފް ޓާރކް ވިދާޅުވެފައިވަނީ، މިއީ ގާނޫނުތަކަށާއި ރަޝިއާގައި އިޖުތިމާއީ ހަރަކާތްތައް ހިންގުމަށް އޮތް ފުރުސަތުތަކަށް ގޮންޖެހި ޖެހުމެއް ކަމަށެވެ.
ކަރަ މުރުޒާއަކީ އިނގިރޭސިވިލާތުގެ ރައްޔިތުކަންވެސް އޮންނަ ބޭފުޅަކަށް ވާތީ، އިނގިރޭސިވިލާތުންވެސްވަނީ އޭނާ ވަގުތުން ދޫކޮށްލުމަށް ގޮވާލާފައެވެ.
މީގެ ކުރިން ދެފަހަރެއްގެ މަތިން ވަނީ ކަރަ މުރުޒާއަށް ވިހަ ދީފައެވެ. އެހެންނަމަވެސް އޭނާވަނީ، ބިރެއް ނެތި ރަޝިއާއަށް އެބުރި ގޮސްފައެވެ. އޭނާ ހައްޔަރު ކޮށްފައިވަނީ ރަޝިއާގައި ހުންނަވަނިކޮންވެ. ކަރަ މުރުޒާގެ އަނބިކަނބަލުން ވިދާޅުވެފައިވަނީ ވިހަ ދިނުމާއި ގުޅިގެން ލިބުނު ގެއްލުންތަކުން އަދިވެސް އޭނާ މުޅިން ރަގަޅުވެފައި ނުވާކަމުގައެވެ.
