މިއަދު ކުރިއަށްދާ ގުރައިދޫ ދާއިރާގެ ބައި އިލެކްޝަންގައި ވެރިކަން ކުރާ މައި ޕާޓީ އެމްޑީޕީގެ ކެނޑިޑޭޓާއި، އިދިކޮޅު ޕީޕީއެމްގެ ކެނޑިޑޭޓް ވޯޓުލައިފިއެވެ.
ގުރައިދޫ ދާއިރާގެ އިންތިޚާބުގައި ވާދަކުރަނީ ގުރައިދޫއަށް ނިސްބަތްވާ ތިން ކެނޑިޑޭޓުންނެވެ. ޕީޕީއެމުން ކުރިމަތިލީ، އަވަހާރަވި މެންބަރު އިބްރާހީމް ރިޒާގެ ކޮއްކޮ، ޙުސައިން ރިޒާއެވެ. އެމްޑީޕީން ވާދަކުރަނީ އެ ޕާޓީގެ ޕްރައިމަރީ ކާމިޔާބުކުރި އިބްރާޙިމް ޝާޒްއެވެ. އަދި މޯލްޑިވްސް ނެޝަނަލް ޕާޓީގެ ޓިކެޓް ދީފައިވަނީ އަލީ ޢާރިފަށެވެ.
ތިން ކެނޑިޑޭޓުންގެ ތެރެއިން މިހާތަނަށް ވޯޓުލާފައިވަނީ އެމްޑީޕީގެ ކެނޑިޑޭޓް ޝާޒުއާއި، ޕީޕީއެމްގެ ކެނޑިޑޭޓް ރިޒާއެވެ. އިންތިޚާބުގެ ކަންކަން މިހާތަނަށް ކުރިއަށްދަނީ ވަރަށް އަމާންކަމާއި އެކުގައެވެ. އިލެކްޝަންސް ކޮމިޝަނުން ކަނޑައަޅާފައިވަނީ ގުރައިދޫ ދާއިރާގެ ބައި-އިލެކްޝަންގެ ވޯޓުލުން މިއަދު ހެނދުނު 8:00 އިން ހަވީރު 4:00 އާއި ހަމައަށް ކުރިއަށްގެންދިއުމަށެވެ. އަދި ހަވީރު 4:00 ޖަހާއިރު ވޯޓު ފޮށި ކައިރީގައި ވޯޓުލުމަށް މީހަކު ނެތްނަމަ ފޮށި ބަންދުކޮށް 30 މިނެޓުފަހުން ވޯޓު ގުނަން ފެށުމަށްވެސް އިލެކްޝަންސް ކޮމިޝަނުން ވަނީ ނިންމާފައެވެ.
މިފަހަރުގެ ބައި-އިލެކްޝަން ރޯދަމަހު ކުރިއަށް ދިޔަނަމަވެސް، އިންތިހާބުގެ ކަންކަމަށްވެސް އެއްވެސް ބަދަލެއް ގެނެސްފައެއް ނުވެއެވެ. ގުރައިދޫ ދާއިރާގެ ބައި-އިލެކްޝަންގައި ޖުމްލަ 6 ވޯޓު ފޮއްޓެއް ވަނީ ބަހައްޓާފައެވެ. އެއީ ގުރައިދޫގައި 2 ފޮށި، މާފުށީގައި 2 ފޮށި، ގުޅީގައި 1 ފޮށި އަދި ގުރައިދޫ ދާއިރާގެ މީހުން ވޯޓުލުމަށް މާލޭ ޢިއްޒުއްދީން ސްކޫލްގައި 1 ފޮއްޓެވެ. މި ބައި-އިލެކްޝަންގައި ޖުމްލަ 3423 މީހަކަށް ވޯޓުލުމުގެ ހައްޤު ލިބިގެންވެއެވެ.
