މާލޭގައި އަންހެނަކާއި އޭނާގެ ކުދަ ދެކުދިންނާއެކު ގެއިންނެރެ މަގުމަތި ކޮށްފައިވަނިކޮށް، އެއާއިލާ ޖެންޑަރ މިނިސްޓްރީގެ ބެލުމުގެދަށަށް ގެންގޮސްފިއެވެ.
މިއާއިލާ މަގުމަތިވެފައިވާ ފޮޓޯތައް ސޯޝަލް މީޑިއާގައި ދައުރުވަމުން ދަނިކޮށް، އެއާއިލާ ޖެންޑަރ މިނިސްޓްރީގެ ބެލުމުގެ ދަށަށް ގެންގޮސްފައިވަނީ، އާންމުންގެ އެހީތެރިކަމާއެކު "މަމްސް" ޖަމިއްޔާއިން އެއާއިލާއަށް ވަންނާނެ ތަނެއް ހޯދާދީފައި ވަނިކޮށެވެ.
ޖެންޑަރ މިނިސްޓްރީން ބުނެފައިވަނީ، އެއާއިލާ ޖެންޑަރގެ ބެލުމުގެ ދަށަށް ގެންގޮސްފައިވަނީ މިކަމަކީ ގެވެށި އަނިޔާއާއި ގުޅޭ މައްސަލައަކަށް ވާތީ ކަމުގައެވެ. ޖެންޑަރއިން އިތުރަށް ބުނެފައިވަނީ ގެވެށި އަނިޔާ ލިބޭ ފަރާތްތަކަށް ގާނޫނުން ލިބިދޭ ހިމާޔަތާއި ރައްކާތެރިކަން ފޯރުކޮށް ދިނުމަށް އެމިނިސްޓްރީން މަސައްކަތް ކުރަމުންދާ ކަމުގައެވެ. އަދި އެފަދަ ފަރާތްތަކަށް ބޭނުންވާ ނަފްސާނީ، އިޖުތިމާއީ އެހީތެރިކަންވެސް އެ މިނިސްޓްރީން ފޯރުކޮށްދެމުންދާ ކަމަށްވެސް ޖެންޑަރ މިނިސްޓްރީން ހާމަކޮށްފައި ވެއެވެ.
މަގުމަތިވި އަންހެން މީހާ ގެއިން ނެރެފައިވަނީ އޭނާގެ ކުރީގެ ފިރިމީހާކަމަށް ތުހުމަތު ކުރެވުނުނަމަވެސް އޭނާގެ ކުރީގެ ފިރިމީހާ އެ ތުހުމަތުތަކަށް އިންކާރު ކުރެއެވެ.
"މަމްސް" ޖަމިއްޔާއިން ބުނެފައިވަނީ، އަންހެން މީހާއަށް އެޖަމިއްޔާއިން އެހީތެރިކަން ފޯރުކޮށްދެމުން ދަނިކޮށް މިއަދު އޭނާ ޖެންޑަރގެ ބެލުމުގެދަށަށް ގެންގޮސްފައިވާކަމަށެވެ. އެ ޖަމިއްޔާއިން ބުނެފައިވަނީ އެކި ފަރާތްތަކުގެ އެހީތެރިކަމާއެކު އެ އާއިލާއަށް އެހީތެރިކަން ފޯރުކޮށް ދިނުމަށް 164،730 ރުފިޔާގެ ފަންޑެއް ރެއިސް ކޮށްފައިވާކަމަށެވެ. އަދި ޖެންޑަރގެ ބެލުމުގެދަށަށް އެއާއިލާ ގެންގޮސްފައިވިނަމަވެސް، އެއާއިލާގެ ހުރިހާ ޚަރަދެއް "މަމްސް" ޖަމިއްޔާއިން ކުރާގޮތަށް ހަމަޖެހިފައިވާކަމަށްވެސް އެ ޖަމިއްޔާއިން ބުނެފައި ވެއެވެ.
