މަކުނުދޫ ދާއިރާގެ ކުޅިވަރު ވަސީލަތްތައް ޤާއިމް ކުރުމަށް ޔޫތު މިނިސްޓަރ އަހުމަދު މަހުލޫފް ވައުދުވެފައިވާ ގޮތާއި އެއްގޮތަށް މަސައްކަތްތައް ކުރިއަށް ނުދާނީ މެމްބަރު ރާއީގެ ފާޑުކިޔުން މިނިސްޓަރ މަހުލޫފަށް އަމާޒުވެއްޖެއެވެ.
ރާއްޖޭގެ ކުޅިވަރު ވަސީލަތައް ގާއިމް ކުރުމަށް މިހާތަނަށް ދުވަހަކުވެސް ނުކުރެވޭ ވަރަށް މިދައުރުގައި މަސައްކަތް ކުރެވިފައިވާކަމަށް މިނިސްޓަރ މަހުލޫފް ވަނީ ވިދާޅުވެފައެވެ. ރާއްޖޭގެ އެކި ކަންކޮޅުތަކުގައި ކުޅިވަރު ވަސީލަތްތައް ގާއިމް ކުރުމަށް ކުރަމުންދާ މަސައްކަތްތަކުގެ ތެރެއިން މަކުނުދޫ ދާއިރާގައި ފުޓުބޯޅަ ދަނޑަކާއި، ހޭންޑްބޯޅަ ކޯޓެއް އެޅުމަށް ކޮންޓްރެކްޓް ކުރެވި މަސައްކަތް ނުފެށޭތީ ތާއީވަނީ މިނިސްޓަރަށް މަލާމާތް ކުރައްވާފައެވެ.
ރާއީ ވިދާޅުވީ ނޭކުރަންދޫ ބޮޑު ފުޓުބޯޅަ ދަނޑަކީ 2020 ގައި އެއް އަހަރު ތެރޭ ނިންމަން ހަވާލު ކުރެވިފައިވާ މަސައްކަތެއް ކަމަށެވެ. ނަމަވެސް ރާއީވަނީ މިވަގުތު ދަނޑު އޮތް ހާލަތާއި ދަނޑުގައި ބޮޑެތި ގަސްތައް ހެދިފައިވާ ވީޑިއޯއަކާއިއެކު ޓުވިޓާގައި ހިއްސާ ކުރައްވާފައެވެ. ވީޑިއޯއިން ފެންނަ ގޮތުން ދަނޑުގެ މަސައްކަތް އެއްވެސް ވަރަކަށް ކުރިއަށް ނުދެއެވެ.
ނޭކުރަންދޫ ބޮޑު ފްޓްބޯޅަ ދަނޑު 2020 ގައި އެއް އަހަރު ތެރޭ ނިންމަން ހަވާލު ކުރެވިފައި، ވަރަށް ބޮޑަށް ޝުކުރިއްޔާ މިނިސްޓަރ @AhmedMahloof 🙏@MoYSCEmv pic.twitter.com/gEuXgRZxLI
— Mohamed Raee / Makunudhoo Constituency (@Mraee12) April 13, 2023
މީގެ އިތުރުން މަކުނުދޫގައި ހޭންޑްބޯޅަ ކޯޓެއް އެޅުމަށް ކޮންޓްރެކްޓަރަކާއިއެކު މީގެ ހަމަސް ކުރިން މިނިސްޓަރ މަހުލޫފްގެ ހާޒިރުގައި ވަނީ އެއްބަސްވުމެއްގައި ސޮއިކޮށްފައެވެ. ނަމަވެސް މިމަސައްކަތް އެއްވެސް ވަރަކަށް ނުދާތީ ރާއީ ވަނީ މިނިސްޓަރ މަހުލޫފަށް ޝުކުރު ދަންނަވާފައެވެ.
ވަރަށް ބޮޑަށް ޝުކުރިއްޔާ މިނިސްޓަރު @AhmedMahloof އަދި މަސައްކަތް ހަވާލުވި ކޮންޓްރެކްޓަރ އަށް، 6 މަސްވީ އަދި ހަބަރެއްނުވޭ 🙏 @MoYSCEmv pic.twitter.com/DnRYVKotKV
— Mohamed Raee / Makunudhoo Constituency (@Mraee12) April 13, 2023
މިދިޔަ ހަފްތާގައި މަޖިލީހުގައި ވާހަކަ ދައްކަވަމުން މަހުލޫފް ވިދާޅުވީ ކުޅިވަރުގެ ވަޞީލަތްތައް ތަރައްޤީކުރުމަށް މިވީ ހަތަރު އަހަރު ކުރަމުންދާ މަސައްކަތުގައިވެސް އަދި މިހާރުވެސް އޮތް ގޮންޖެހުމަކީ މިނިސްޓްރީ އާއި، ރަށްރަށުގެ ރައްޔިތުން އެދޭހާ ބާރު މިނުގައި ކޮންޓްރެކްޓަރުންނަށް މަސައްކަތްތައް ނުނިމި ލަސްވުންކަމަށެވެ. މިހެންވަނީ ކޮންޓްރެކްޓަރުންނަށް ވެސް މަސައްކަތް ގިނަވެ، ކުރަންޖެހޭ މަސައްކަތްތައް އިތުރުވުމުންކަމަށް މަޚްލޫފް ވިދާޅުވިއެވެ.
މިނިސްޓްރީން ވަރަށް ބައިވަރު މަސައްކަތްތައް ކުރިއަށް އެބަ ގެންދަން. އަޅުގަނޑަށް ހީވަނީ މަސައްކަތްތައް ގިނަވެގެން ގޮސް މިހާރު މިއުޅެނީ ކޮންޓްރެކްޓަރުންނަށް ނުކަތާވަރަށް މީހުންނަށް މަސައްކަތް ލިބިގެން. އެހެން ވުމުން ކަނޑައެޅޭ މުއްދަތަށް ނުނިމި މިދަނީވެސް.
– މަޚްލޫފް ވިދާޅުވިއެވެ.
މިނިސްޓަރ ވިދާޅުވީ މިވީ ހަތަރު އަހަރުގެ ތެރޭގައި ރާއްޖޭގެ އެކި ކަންކޮޅުތަކުގައި ކުޅިވަރުގެ ވަޞީލަތްތައް ޤާއިމްކުރުމަށް ކުރި މަސައްކަތުން، ތާރީޚުގައިވެސް ކުރެވިފައިނުވާ މިންވަރަށް ކުޅިވަރުގެ ވަޞީލަތްތައް ޤާއިމްކުރެވިފައިވާ ކަމަށެވެ. މިނިސްޓްރީގެ އަމާޒަކީ ރަށްރަށުގައި ތަރައްޤީކުރެވޭ ވަޞީލަތްތައް ރައްޔިތުން އެދޭގޮތަށް ނިންމުން ކަމަށާއި، މިހާތަނަށްވެސް ގިނަ މަސައްކަތްތަކެއް އެގޮތުގައި ކުރެވެމުންދާ ކަމަށްވެސް ޔޫތު މިނިސްޓަރ އަޙްމަދު މަޚްލޫފް ވިދާޅުވިއެވެ.
