މާލެއަތޮޅު މާފުއްޓާއި ގުޅީގައި ސަރުކާރުން ބޮޑު ދެ މަޝްރުޢެއްގެ މަސައްކަތް ފަށަން ތައްޔާރުވެއްޖެއެވެ.
އެގޮތުން މާފުށީގެ ބަނދަރުގެ މަސައްކަތާއި ގުޅީ ބިން ހިއްކުމާއި ގޮނޑުދޮށް ޙިމާޔަތްކުރުމުގެ މަޝްރޫޢުގެ މަސައްކަތް ފަށަން އެމްޓީސީސީން ވަނީ ތައްޔާރުވެފައެވެ.
އެމްޓީސީސީގެ ސީއީއޯ އާދަމް އާޒިމްވަނީ މިކަން ހާމަކުރައްވާފައެވެ. އެގޮތުން މި މަޝްރޫޢުތަކުގެ މަސައްކަތަށް ބޭނުންވާ ސައިޓުތައް މިދިޔަ ހޮނިހިރުދުވަހު ވަނީ މޮބިލައިޒް ކޮށްފައިކަމަށް އާޒިމް ވިދާޅުވިއެވެ.
ކ. މާފުށީ ބަނދަރު ތަރައްޤީ ކުރުމުގެ މަޝްރޫޢުގެ އަމަލީ މަސައްކަތް ފެށުމަށްޓަކައި 8 އޭޕްރީލް 2023 ވަނަ ދުވަހު ޕްރޮޖެކްޓް ސައިޓް މޮބިލައިޒްކޮށްފި.#MTCCProjects #RayyithungeKunfuni @MTCCPlc @governmentmv @ibusolih pic.twitter.com/4rrJ8czHG1
— Adam Azim (@adamazim) April 12, 2023
މި ދެރަށުގައި ކުރިއަށް ގެންދާ މަޝްރޫޢުތަކުގެތެރެއިން ގުޅީގައި 10.15 ހެކްޓަރުގެ ބިން ހިއްކަން ހަމަޖެހިފައިވެއެވެ. އަދި 940 މީޓަރުގެ ސަރަހައްދެއްގައި ބޮޑުހިލައިގެ ރިވެޓްމެންޓެއް ޖަހައި 362 މީޓަރުގެ ސަރަހައްދެއްގައި ޖިއޯބޭގް ރިވެޓްމެންޓު ޖަހައި 88 މީޓަރުގެ ސަރަހައްދެއްގައި ބޮޑުހިލައިގެ ގްރޮއިން ޖެހުމުގެ މަސައްކަތް ހިމެނެއެވެ. ގުޅީ ބިންހިއްކުމުގެ މަޝްރޫއަކީ 82.99 މިލިޔަން ރުފިޔާގެ މަޝްރޫޢެކެވެ. މިމަޝްރޫޢުގެ މަސައްކަތްތައް 450 ދުވަހުގެ ތެރޭގައި ނިންމަން އެމްޓީސީސީއާ ވަނީ ހަވާލުކޮށްފައެވެ.
ކ. ގުޅީ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫޢުގެ އަމަލީ މަސައްކަތް ފެށުމަށްޓަކައި 8 އޭޕްރީލް 2023 ވަނަ ދުވަހު ޕްރޮޖެކްޓް ސައިޓް މޮބިލައިޒްކޮށްފި.#MTCCProjects #RayyithungeKunfuni @MTCCPlc @governmentmv @ibusolih pic.twitter.com/C1beS1etEj
— Adam Azim (@adamazim) April 12, 2023
މީގެ އިތުރުން މާފުށީގެ ބަނދަރު ހެދުމުގެ މަޝްރޫއުގެ ދަށުން 63,711 އަކަމީޓަރުގެ ސަރަހައްދެއްގައި މުޅިން އަލަށް ހާބަރ ބޭސިން ފުންކުރުމާއި ކުރިން ފުންކޮށްފައިވާ ފަޅުގެ 28,836 އަކަމީޓަރުގެ ސަރަހައްދެއް އަލުން ފުންކުރުން ހިމެނެއެވެ. އަދި 4,414 އަކަމީޓަރުގެ ސަރަހައްދެއްގެ ނެރު ފުންކުރުމާއި 31 މީޓަރުގެ ސަރަހައްދެއްގައި ބޭރުތޮށި ލުމާއި 680 މީޓަރުގެ ސަރަހައްދެއްގައި ބޮޑުހިލައިގެ ރިވެޓްމެންޓް ޖެހުމުގެ މަސައްކަތް ހިމެނެއެވެ. އަދި 700 މީޓަރުގެ ސަރަހައްދެއްގައި ޖިއޯބޭގް ރިވެޓްމެންޓް ޖެހުމާއި 374 މީޓަރުގެ ސަރަހައްދެއްގައި އެއްގަމުތޮށި ލުމާއި 160 މީޓަރު ދިގު ކޮންކްރީޓް ޖެޓީއެއް ހެދުމާއި 19 މީޓަރު ދިގު ބްރިޖެއް ހެދުންވެސް މިމަޝްރޫޢުގައި ހިމެނެއެވެ.
މިއީ 76.48 މިލިޔަން ރުފިޔާގެ މަޝްރޫޢެކެވެ. 600 ދުވަސް މިމަޝްރޫޢުގެ މަސައްކަތް ނިންމަން ޖެހެއެވެ.
