ހެލްތް މިނިސްޓްރީން ގައުމީ ޔުނިވާސިޓީއަށް ކޮވިޑް-19 އަށް ޓެސްޓްކުރަން ބޭނުންކުރާ ޕީސީއާރް އަދި އެކްސްޓްރެކްޝަން މެޝިނެއް ހަދިޔާކޮށްފި އެވެ.
ހެލްތް މިނިސްޓްރީގެ ފަރާތުން މި ތަކެތި ހަވާލުކުރުމުގެ އެއްބަސްވުމުގައި ސޮއިކޮށްފައިވަނީ ސްޓޭޓް މިނިސްޓަރު އަހުމަދު އާދިލް އެވެ. އަދި މި ތަކެއްޗާއި ގައުމީ ޔުނިވަރސިޓީއިން ހަވާލުވެފައިވަނީ ޑީން, ފެކަލްޓީ އޮފް ހެލްތު ސައިންސަސް ޑރ.އައިޝަތު ސަނޫރާ އެވެ.
މިނިސްޓްރީން ބުނީ ރާއްޖޭގެ ޞިއްޙީ ނިޒާމު އިތުރަށް ހަރުދަނާކޮށް މީހުން ބިނާ ކުރުމަށް ގައުމީ ޔުނިވަރސިޓީން މުހިއްމު ދައުރެއް އަދާކުރާ ކަމަށެވެ. އަދި މި މެޝިންތައް ހަދިޔާކުރީ ކޮވިޑް-19 ގެ ތަޖުރިބާ އަށް ބަލާ ލެބޯރެޓަރީ ޓެކްނޮލޮޖިސްޓުން އަދާ ކުރި މުހިއްމު ދައުރު ފާހަގަކޮށް އިތުރަށް މިދާއިރާ ހަރުދަނާކުރުމުގެ ގޮތުން ކަމަށް މިނިސްޓްރީން ބުނެ އެވެ.
މި ދުވަސްވަރަކީ ރާއްޖޭގައި ކޮވިޑަށް ޕޮޒިޓިވްވާ މީހުންގެ އަދަދު އަނެއްކާވެސް އިތުރުވާން ފަށާފައިވާ ދުވަސްވަރަކެވެ. އެގޮތުން މިދިޔަ ހަފްތާގައި ވެސް މި ބައްޔަށް 80 އަށް ވުރެ ގިނަ މީހުން ވަނީ ޕޮޒިޓިވް ވެފަ އެވެ.
