ސިނާއީ މަސައްކަތަށް ފަޅުރަށްތައް ކުއްޔަށް ދޫކުރުން ވަގުތީ ގޮތުން މެދުކަނޑާލާފައިވާ ކަމަށް މިނިސްޓްރީ އޮފް ފިޝަރީޒް އެންޑް އެގްރިކަލްޗަ އިން ހާމަކޮށްފިއެވެ.
އެގްރިކަލްޗަރ މިނިސްޓްރީން އަނގާރަ ދުވަހު ކުރި އިއުލާނުގައި ބުނެފައިވަނީ، އެގޮތަށް ނިންމާފައިވަނީ ދިވެހިރާއްޖޭގެ ފަޅުރަށްރަށާއި ބެހޭ ޤަވާއިދު އިސްލާހު ކުރުމަށް މަސައްކަތް ކުރަމުންދާތީ ކަމަށެވެ. އެގޮތުން މެދު ކަނޑާލާފައިވަނީ އެ ޤަވާއިދު 11 ވަނަ މާއްދާގެ (ހ) ގެ (2) ދަށުން ފަޅުރަށްރަށް ކުއްޔަށް ހޯދުމަށް، އެދި ހުށަހަޅާ ހުށަހެޅުންތައް ބަލައި ގަތުމާއި ކުއްޔަށް ދޫކުރުން ކަމަށެވެ.
ދިވެހިރާއްޖޭގައި ސިނާއީ ބޭނުންތަކަށް ފަޅު ރަށްތައް ދޫކުރަނީ އެގްރިކަލްޗަރ މިނިސްޓްރީގެ ބެލުމުގެ ދަށުންނެވެ. މިގޮތުން ފަތުރުވެރިކަން ފިޔަވައި އެހެން ހުރިހާ ސިނާއީ ބޭނުމަށް ފަޅުރަށްތައް ކުއްޔަށް ހިފުމަށް މިނިސްޓްރީއަށް އެދެވެއެވެ. މިގޮތަށް ދޫކުރާ ގިނަ ރަށްތަކުގައި ދަނޑުވެރިކަމާއި އަދި އެހެނިހެން މަސައްކަތްތައް ވެސް ކުރެއެވެ.
މިނިސްޓްރީން ރަށްތައް ކުއްޔަށް ދޫކުރުން މަޑު ޖައްސާލިއިރު އަލުން، ކުއްޔަށް ދޫކުރަން ފަށާނެ ދުވަހެއް ހާމައެއް ނުކުރެއެވެ.
