ކޮންޓްރެކްޓަރުން އުޅެނީ މަސައްކަތްތައް ގިނަވެ ނުކަތާ ވަރު ވެގެން ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، ތ. ވޭމަންޑޫ ޒުވާނުންގެ މަރުކަޒުގެ މަސައްކަތް ކުރިއަށް ނުދާތީ އެކަމާގުޅޭ ގޮތުން ތިމަރަފުށި ދާއިރާގެ މެންބަރު ރިޔާޒް ކުރެއްވި ސުވާލަށް ޖަވާބު ދެއްވަމުން މިނިސްޓަރު މަހުލޫފް ވިދާޅުވީ މިނިސްޓްރީން ގިނަ މަސައްކަތްތަކެއް ކުރަމުންދާ ކަމަށެވެ.

އެ މަރުކަޒު ތަރައްގީ ކުރުމުގެ މަސައްކަތް މިދިޔަ ނޮވެމްބަރު މަހު ފަށައި މި އަހަރުގެ ޖެނުއަރީ އެކަކަށް ނިމޭނެކަމަށް ސަރުކާރުން ލަފާކުރި ނަމަވެސް އެ މަސައްކަތް ކުރިއަށް ނުދާ ކަމަށް ރިޔާޒް ވިދާޅުވެއެވެ. އެހެންކަމުން އެ މަސައްކަތް ކުރިއަށް ގެންދަން މިހާރު ރާވާފައި އޮތް ގޮތާއި އަދި އެ މަސައްކަތް ނިމޭނެ ތާރީގާ ގުޅޭ ގޮތުން ރިޔާޒް ސުވާލު ކުރެއްވިއެވެ. އެ ސުވާލަށް ޖަވާބު ދެއްވައި މަހުލޫފް ވިދާޅުވީ މިނިސްޓްރީން ވަރަށް ގިނަ މަސައްކަތްތަކެއް ކުރަމުން ގެންދާ ކަމަށެވެ.

މިނިސްޓްރީން ވަރަށް ބައިވަރު މަސައްކަތް ކުރަމުން އެބަ ގެންދަން. ދެން އަޅުގަނޑަށް ހީވަނީ އަސްލު މަސައްކަތްތައް ގިނަވެގެން ގޮސް ކޮންޓްރެކްޓަރުންނަށް ނުކަތާ ވަރަށް މަސައްކަތް ލިބިގެން.

– މަހުލޫފް ވިދާޅުވިއެވެ.

މަސައްކަތަށް ސައިޓް މޮބިލައިޒް ކުރަން އޮންނަ ދުވަހު މޮބިލައިޒް ނުކުރެވުމުން އެކަމާ ގުޅޭ ގޮތުން ސުވާލުކުރާ ކަމަށާއި މަސައްކަތާ ގުޅޭ ގޮތުން ކޮންޓްރެކްޓަރު އެކި ތާރީހުތައް ދޭކަން މަހުލޫފް ފާހަގަކުރެއްވި އެވެ. މަހުލޫފް ވަނީ މަސައްކަތަށް ބާރު އަޅަމުން އަންނަ ކަމަށްވެސް ވިދާޅުވިއެވެ. މަހުލޫފް ވިދާޅުވީ މީގެ ކުރިން ބަޔަކު ނުކުރާ ވަރަށް ފާއިތުވި ހަތަރު އަހަރުގެ ތެރޭގައި މިނިސްޓްރީން މަސައްކަތްކޮށްފައިވާ ކަމަށެވެ.

ޔޫތު މިނިސްޓްރީން އަޅުގަނޑުމެން މިދިޔަ ހަތަރު އަހަރު ދުވަހު މިކުރި މަސައްކަތް ނުބައްދަލުވާނެ މީގެ ކުރިން ބަޔަކު ނުކުރާ ވަރަށް މަސައްކަތްކޮށްފައި ހުންނާނެ.

– މަހުލޫފް ވިދާޅުވިއެވެ.

ވޭމަންޑޫ ޒުވާނުންގެ މަރުކަޒުގެ މަސައްކަތް ކުރިއަށް ނުދިއުމުން ކޮންޓްރެކްޓް ބާތިލުކޮށް އެ މަސައްކަތް ކުރިއަށް ގެންދަން ކައުންސިލާ ހަވާލުކޮށްފައިވާ ކަމަށް މަހުލޫފް ވިދާޅުވިއެވެ. ރަށު ކައުންސިލާ މަސައްކަތް ހަވާލުކުރީ ޔޫތު މިނިސްޓްރީއަށް އެ މަސައްކަތް ނުވުމުން ރައްޔިތުން ބޭނުންވާ ގޮތަށް މަސައްކަތްކުރުމުގެ ފުރުސަތު ދިނުމުގެ ގޮތުން ކަމަށް ވިދާޅުވިއެވެ.