ޔޫތު މިނިސްޓަރ އަހުމަދު މަހުލޫފްއާއި ސުވާލު ކުރުމަށް މަދަމާ ބާއްވާ ރައްޔިތުންގެ މަޖިލީހުގެ ޖަލްސާއަށް އެޖެންޑާކޮށްފިއެވެ.
ޔޫތު މިނިސްޓަރު އަހުމަދު މަހުލޫފް އާލާސްކަންފުޅާ އުޅުއްވާތީ ރައްޔިތުންގެ މަޖިލީހަށް ހާޒިރުވެ ވަޑައިގެންނެވޭ ގޮތް ނުވުމުން މިއަދު މަޖިލިސް ޖަލްސާގައި އޭނާ އާއި ކުރަން ތާވަލް ކުރި ސުވާލު ވަނީ ކެންސަލް ކޮށްފައެވެ. މަޖިލީހުން ވަނީ މަހުލޫފާއި ސުވާލު ކުރަން މާދަމާގެ ޖަލްސާއަށްވެސް އެޖެންޑާކޮށްފައެވެ.
މާދަމާގެ ޖަލްސާގެ ފުރަތަމަ މަސައްކަތެއްގެ ގޮތުގައި އޮތީވެސް މަހުލޫފާއި ސުވާލު ކުރުމެވެ. މިއީ އެމްއެމްޕީއާރުސީ ޚިޔާނާތުގެ މައްސަލާގައި މަހުލޫފަށް ކުރި ދައުވާ އަނބުރާ ގެންދިޔަ ފަހުން މަޖިލީހަށް ހާޒިރު ކުރާ ފުރަތަމަ ފަހަރެވެ.
މިއަދުގެ ޖަލްސާގައި އެޖެންޑާ ކޮށްފައި އޮތީ ތިމަރަފުށީ ދާއިރާގެ މެންބަރު ރިޔާޒް، ވޭމަންޑޫ ޒުވާނުންގެ މަރުކަޒާ ގުޅޭ ގޮތުން ކުރާ ސުވާލަކާ ގުޅިގެން ވަޒީރު ހާޒިރުކުރުމެވެ. މާދަމާވެސް މަހުލޫފާއި ކުރުމަށް އެޖެންޑާ ކޮށްފައިވަނީ ހަމަ މިސުވާލެވެ. މިއަދުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ރައީސް ވިދާޅުވީ ވަޒީރު ބަލިވެ އުޅުއްވާތީ ވަޑައިގެންނެވެން ނެތް ކަމަށް އަންގާފައިވާ ކަމަށެވެ.
ރިޔާޒް މަހުލޫފާ ސުވާލުކުރަން ހުށަހެޅުއްވީ ރިޔާޒްގެ ދާއިރާގައި ހިމެނޭ ތ. ވޭމަންޑޫގެ ޒުވާނުންގެ މަރުކަޒުގެ މަސައްކަތްތަކާ ގުޅޭ ގޮތުންނެވެ.
އެ މަރުކަޒު ތަރައްގީ ކުރުމުގެ މަސައްކަތް މިދިޔަ ނޮވެމްބަރު މަހު ފަށައި މި އަހަރުގެ ޖެނުއަރީ އެކަކަށް ނިމޭނެކަމަށް ސަރުކާރުން ލަފާކުރި ނަމަވެސް އެ މަސައްކަތް ކުރިއަށް ނުދާ ކަމަށް ރިޔާޒް ވިދާޅުވެއެވެ. އެހެންކަމުން އެ މަސައްކަތް ކުރިއަށް ގެންދަން މިހާރު ރާވާފައި އޮތް ގޮތާއި އަދި އެ މަސައްކަތް ނިމޭނެ ތާރީގާ ގުޅޭ ގޮތުން ރިޔާޒް ސުވާލު ހުށަހަޅުއްވާފައި ވެއެވެ.
މިއީ މިސުވާލު މަހުލޫފާއި ކުރަން ހުށަހެޅާ 3 ވަނަ ފަހަރެވެ. ނަމަވެސް ދެފަހަރުވެސް މަހުލޫފް ވަނީ މަޖިލީހަށް ދިއުމަށް އުޒުރުވެރި ވެފައެވެ.
