ވިސާ ހަމަނުޖެހިގެން ދަތުރު ލަސްވި އަލްޞަފާ ޕްރައިވެޓް ލިމިޓެޑްގެ ޢުމްރާވެރިން، ޢުމްރާގެ އަޅުކަމަށް ފުރައިފިއެވެ.
ޞަފާ ގްރޫޕް މެދުވެރިކޮށް ޢުމްރާގެ އަޅުމަށް ދިއުމަށް 181 މީހުން ފައިސާދައްކާފައިވެއެވެ. މިގުރޫޕުގެ އުމުރާވެރިން މިމަހުގެ 6 ވަނަ ދުވަހު ފުރަން ތައްޔާރުވެފައި ވަނިކޮށް، ދަތުރު ހުއްޓާލީ ފަހުވަގުތާ ހަމައަށްވެސް ވިސާ ހަމަނުޖެހިގެންނެވެ. ނަމަވެސް މި ހުރިހާ ޢުމްރާވެރިންވެސް މިހާރު މިވަނީ ސަޢުދީއަށް ފުރާފައެވެ.
ޞަފާ ގްރޫޕުން ބުނެފައިވަނީ ދަތުރުގެ އެހެނިހެން ހުރިހާ އިންތިޒާމްތައްވެސް ހަމަޖައްސާފައިވާކަމަށެވެ. އެގޮތުން ވިސާއާއި، ޓިކެޓްގެ އިތުރުން، ސަޢުދީގައި ތިބުމާއި އަޅުކަމާއި ގުޅޭ ހުރިހާ އިންތިޒާމްތަކެއްވެސް ހަމަޖައްސާފައިވާކަމަށެވެ. ޞަފާ ގްރޫޕުން ބުނެފައިވަނީ މިފަހަރު އެފަދަ މައްސަލައެއް ދިމާނުވާނެހެން، ގްރޫޕްގެ ފަރާތުން ހަމަޖައްސަންޖެހޭ އިންތިޒާމްތައް ހަމަޖައްސާފައިވާކަމަށެވެ.
ވިސާ ހަމަނުޖެހުމުގެ ސަބަބުން މިއަހަރުގެ ރަމަޟާންމަހަށް ތާވަލްކުރި ޢުމްރާ ދަތުރު ކެންސަލް ކުރިކަމަށްވެސް އެ ގްރޫޕުން މިދިޔަ ހުކުރު ދުވަހު ނެރުނު ބަޔާނެއްގައިވެއެވެ. ނަމަވެސް ދަތުރު ކެންސަލްނުކޮށް، ވީހާވެސް އަވަހަށް ދަތުރު ހަމަޖައްސާ ޢުމްރާވެރިން ފުރުވާލުމަށް މިނިސްޓްރީ އޮފް އިސްލާމިކް އެފެއާޒުން އެގްރޫޕަށް އެންގިއެވެ. މި މައްސަލައިގައި ކަންހިނގާއިދިޔަ ގޮތް މިނިސްޓްރީންވެސް އަންނަނީ ގާތުން ބަލަމުންނެވެ.
އިސްލާމިކް މިނިސްޓްރީން ވިދާޅުވީ، ޢުމްރާވެރިން ފުރަން ހަމަޖައްސާފައިވާ ދުވަހު ނުފުރުނީ ސަޢުދީ ސަރުކާރުން ނުވަތަ ދިވެހި ސަރުކާރުން ދޭންޖެހޭ އެއްވެސް ހުއްދައެއް ނުލިބިގެން ނޫންކަމަށެވެ.
ޢުމްރާ ވިސާއަކީ ސަޢުދީ ސަރުކާރުން އެކަމަށް ހުއްދަ ދީފައިވާ އެޖެންސީތަކުން ޢުމްރާ ކުންފުނިތަކަށް ދޭ ޚިދުމަތެކެވެ. އެގޮތުން މި ވިސާއަކީ މޯލްޑިވްސް ޙައްޖު ކޯޕަރޭޝަނުންވެސް ފޯރުކޮށްދޭ ޚިދުމަތެއް ކަމަށް އިސްލާމިކް މިނިސްޓްރީން ވިދާޅުވެއެވެ. ނަމަވެސް މައްސަލަ ދިމާވީ ޞަފާ ގްރޫޕުން ވިސާ ހަމަޖެއްސުމަށް މަސައްކަތްކުރި ސަޢުދީގެ އެޖެންޓުން އެކަން ހަމަޖައްސާފައިނުވާތީކަމަށް އިސްލާމިކް މިނިސްޓްރީން ވިދާޅުވެފައިވެއެވެ.
މިފަދަ މަތިވެރި އަޅުކަމަކަށް ދިއުމަށް ފައިސާ ދައްކާ، ފުރަން އޮންނަ ދުވަހަށް، ދަތުރުވެރިނަން ފުރޭގޮތް ނުވުމަކީ މިނިސްޓްރީން ކަންބޮޑުވާ ކަމެއްކަމަށް އެ މިނިސްޓްރީން ވިދާޅުވެފައިވެއެވެ.
ޢުމްރާއަށް މީހުން ގެންދިއުމަށް މިނިސްޓްރީން ހުއްދަ ދީފައިވާ ކުންފުނިތަކުން "ދިވެހިރާއްޖެއިން ޢުމްރާއަށް މީހުން ގެންދިއުމާބެހޭ އުސޫލު"އާއި އެއްގޮތަށް ދަތުރުގެ އިންތިޒާމްތައް ހަމަޖެއްސުމަށް އެ މިނިސްޓްރީން ވަނީ އިލްތިމާސްކުރައްވާފައެވެ.
ޞަފާ ގްރޫޕްގެ އުމްރާވެރިން ސަޢުދީއަށް ދަތުރުކުރަނީ އޮމާންގެ "ސަލާމް އެއަރ"ގެ ޗާޓަރ ފްލައިޓަކުންނެވެ.
