ނެޝަނަލް ސްޕޯޓްސް ކައުންސިލްގެ ރައީސްކަމުގެ މަޤާމަށް އެ ކައުންސިލްގެ ނައިބްރައީސްގެ މަޤާމު ފުރުއްވަމުންދިޔަ އިބްރާހިމް ނާހިދު އައްޔަން ކުރައްވައިފި އެވެ.
ނާހިދު މިމަޤާމަށް އައްޔަން ކޮށްފައިވަނީ ސްޕޯޓްސް ކައުންސިލްގެ ރައީސްކަމުން އިސްތިއުފާ ދެއްވައި އިބްރާހިމް އިސްމާއިލް ކުޅިވަރުގެ ހިންގުމުގެ ދާއިރާއާ ރަސްމީކޮށް ފެއަށް ޖެހިވަޑައިގަތުމާއި ގުޅިގެންނެވެ.
ބާސްކެޓް ބޯޅައިން މަޝްހޫރުވެފައިވާ ނާހިދަކީ 13 އަހަރު ދުވަހު ބާސްކެޓް ކުޅުއްވައި، 15 އަހަރު ދުވަހު ބާސްކެޓްބޯޅައިގެ ކޯޗިންގެ ދާއިރާގައި ހަރަކާތްތެރިވެފައި ބޭފުޅެކެވެ. މިހާތަނަށް ކައުންސިލްގެ ނައިބް ރައީސްގެ މަޤާމުގައި ހުންނެވި ނާހިދަކީ ރާއްޖެއިން ބޭރުގެ ބައިނަލް އަގުވާމީ އެކި މުބާރާތްތަކުގައި ޝެފް ޑި މިޝަންގެ މަޤާމު އަދާކުރައްވާފައިވާ ބޭފުޅެއްވެސް މެއެވެ.
ސްޕޯޓްސް ކައުންސިލްއަކީ 11 މެންބަރުންގެ މައްޗަށް އެކުލެވޭ ކައުންސިލެކެވެ. 5 މެންބަރުން އައްޔަން ކުރާނީ ޔޫތް މިނިސްޓަރެވެ. އެއީ ޤާނޫނީ ވަކީލަކާއި ދެ އަންހެން މެންބަރުންނާއި ޔޫތް މިނިސްޓްރީގެ ދެ ބޭފުޅުންނެވެ. ދެން އެ ކައުންސިލްގައި ތިބޭނީ އޮލިމްޕިކް ކުޅިވަރުތަށް ތަމްސީލް ކުރާ ދެ މެންބަރުންނާއި، އޮލިމްޕިކް ނޫން ކުޅިވަރުތައް ތަމްސީލް ކުރާ ދެ މެންބަރުންނާއި، އެޑިޢުކޭޝަން މިނިސްޓަރ އައްޔަން ކުރައްވާ މެންބަރަކާއި މޯލްޑިވްސް އޮލިމްޕިކް ކޮމެޓީން ކަނޑައަޅާ މެންބަރެކެވެ. ނެޝަނަލް ސްޕޯޓްސް ކައުންސިލްގެ މައިގަނޑު މަސްޢޫލިއްޔަތަކީ ޔޫތް މިނިސްޓަރަށް މަޝްވަރާއާއި ލަފާ ދިނުމެވެ.
