އަންނަ ހޮނިހިރު ދުވަހު އޮންނަ ގުރައިދޫ ދާއިރާގެ ބައި އިލެކްޝަން ކެމްޕޭނަށް ރައީސް ސާލިހު ގުރައިދޫ ދާއިރާއަށް ވަޑައިގެންފިއެވެ. ގުޅި، ގުރައިދޫ އަދި މާފުއްޓަށް ރައީސް ސާލިހު ކުރައްވާ މިދަތުރުފުޅުގައި ފުރަތަމަ ވަޑައިގެންފައިވަނީ ގުޅިއަށެވެ.
ރައީސް ސާލިހުއާއެކު ކެބިނެޓްގެ ބައެއް ވަޒީރުންނާއި، ކުންފުނިތަކުގެ އެމްޑީންނާއި ރައްޔިތުންގެ މަޖިލިހުގެ ބައެއް މެމްބަރުންވެސް ބައިވެރިވެ ވަޑައިގަންނަވައެވެ.
އެޕްރިލްމަހުގެ 15 ވަނަ ދުވަހު ގުރައިދޫ ދާއިރާގެ ބައި އިލެކްޝަން ބޭއްވުމަށް އިލެކްޝަން ކޮމިޝަނުން ހަމަޖައްސާފައިވަނީ، އެ ދާއިރާގެ ގޮނޑި ފުރުއްވަމުން ގެންދެވި ޕީޕީއެމްގެ މެމްބަރު އިބްރާހިމް ރިޒާ ފާއިތުވި ފެބްރުއަރީމަހުގެ 23 ވަނަދުވަހު އަވަހާރަވުމާއި ގުޅިގެންނެވެ.
ރިޒާ އަވަހާރަވީ ކެންސަރުގެ އާލާސްކަންފުޅަށް މެލޭޝިއާގައި ފަރުވާ ހޯއްދަވަމުން ގެންދަވަނިކޮށެވެ. ރިޒާއަކީ މަޖިލީހުގައި އެންމެ ގިނަ ދުވަސްވީ އެއް މެންބަރެވެ. ރިޒާ ވަނީ، ނިމުނު 3 ދައުރުގައިވެސް މަޖިލިސް މެންބަރުކަން ކުރައްވާފައެވެ.
ޤާނޫނީ ވަކީލުކަންވެސް ކުރައްވަމުން ގެންދެވި ރިޒާ ވަނީ ރައްޔިތުން މަޖިލީހުގެ މިދިޔަ ދައުރުގައި އެމަޖިލީހުން ޖޭއެސްސީއަށް ކަނޑައެޅުއްވި މެމްބަރުގެ ގޮތުގައި އެ ކޮމިޝަންގައިވެސް މަސައްކަތް ކުރައްވާފައެވެ. އަދި ޖޭއެސްސީގެ ނައިބު ރައީސްގެ މަޤާމުވެސް ރިޒާވަނީ ފުރުއްވާފައެވެ.
ގުރައިދޫ ދާއިރާގެ ބައި-އިލެކްޝަންގައި ވާދަކުރައްވަނީ 3 ކެނޑިޑޭޓެކެވެ. އެއީ ޕީޕީއެމްގެ ޕްރައިމަރީއަށް ހުޅުވާލުމުން ކުރިމަތިލެއްވި ހަމައެކަނި ފަރާތްކަމަށްވާ، ނިޔާވި ރިޒާގެ ކޮއްކޮ ހުސައިން ރިޒާއާއި، އެމްއެންޕީންވެސް ބައި އިލެކްޝަން ޕްރައިމަރީއަށް ހުޅުވާލުމުން އެޕާޓީންވެސް ޕްރައިމަރީއަށް ކުރިމަތިލި ހަމައެކަނި ފަރާތް ކަމަށްވާ، ކ. ގުރައިދޫ ފިޔާތޮށިގެ އަލީ އާރިފް އާއި އެމްޑީޕީގެ ޕްރައިމަރީ ކާމިޔާބު ކުރި ކ. ގުރައިދޫއަށް ނިސްބަތްވާ އިބްރާހިމް ޝާޒްއެވެ.
