ޕީއެސްއެމްގެ ނަމުގައި ސްކޭމް ކޯލްތަކެއް ދައުރުވާތީ މިކަމަށް ސަމާލުވާން އެދިއްޖެ އެވެ.
ބީއެމްއެލުން ހާމަކޮށްފައިވާ ގޮތުގައި މި ދުވަސްވަރު ޕީއެސްއެމްގެ ނަމުގައި ފޯނުކޮށް އަދި, އެއަށް ފަހު ލިންކުލާފައި ހުންނަ އެސްއެމްއެސް މެދުވެރިކޮށް މަކަރާއި ހީލަތުން ކަސްޓަމަރުންނަށް އޮޅުވާލައިގެން ކަސްޓަމަރުންގެ އިންޓަނެޓް ބޭންކިން މައުލޫމާތު ހޯދުމަށް މަސައްކަތް ކުރަމުންދާ ކަމަށެވެ.
އަދި މިފަދަ ބައެއް ކޯލްތަކުގައި އެދޭ މައުލޫމާތު ދީގެންނާއި އޯޓީޕީވެސް ދީގެން ބައެއް ކަސްޓަމަރުން އަތުން ފައިސާ ގެއްލިގެން އެކަމުގެ ޝަކުވާ ބޭންކަށް ހުށަހަޅާފައިވާ ކަމަށް ބީއެމްއެލް އިން ބުނެފައިވެއެވެ. އެގޮތުން މިދިޔަ ފަސް ދުވަސްތެރޭ ދެ ކަސްޓަމަރެއްގެ އަތުން 50،000 ރުފިޔާ އާއި 75،000 ރުފިޔާ ގެއްލިފައިވާ ކަމުގެ ޝަކުވާ ހުށަހަޅާފައިވާ ކަމަށްވެސް ބީއެމްއެލުން ބުނެފައިވެއެވެ.
މީގެ އިތުރުން އޮންލައިން ޕޭޖްތަކުން ވިޔަފާރިކޮށްގެން ފައިސާދެއްކުމަށްފަހު މުދާ އަދި އަނބުރާ ފައިސާވެސް ނުލިބޭކަމުގެ ޝަކުވާ އާއި ކާކުކަން ނޭނގޭ ފަރާތްތަކާއެކު ޑޮލަރުގެ މުއާމަލާތްކޮށްގެން ފައިސާ ނުލިބިގެން އެކަމުގެ ޝަކުވާވެސް ބޭންކަށް ހުށަހަޅާފައިވާ ކަމަށްވެސް ބީއެމްއެލުން ބުނެފައިވެއެވެ.
